अजरबैजान भन्दै कुवेत पुर्‍याइन्छन् नेपाली महिला श्रमिक

A+ A A-

पछिल्लो समय नेपाली महिला श्रमिक घरेलु कामका लागि कुवेत तस्करी हुने क्रम बढ्दो छ । अन्य देशको श्रम स्वीकृति निकालेर घरेलु महिला श्रमिक कुवेतका विभिन्न शहरमा घरेलु कामका लागि पुर्‍याउने गरिएको छ । तस्करले नेपालबाट व्यक्तिगत श्रम स्वीकृति निकालेर खाडीका देशमा घरेलु काममा नेपाली महिला लैजाने गरेको नयाँ तथ्य खुलेको छ ।

सरकारले २०७२ सालदेखि मलेसिया र खाडीका देशहरूमा वैदेशिक रोजगारीका लागि नेपाली महिलालाई पठाउन प्रतिबन्ध लगाएको थियो । अफ्रिकी देश अजरबैजानको व्यक्तिगत भिसा निकालेर कुवेतमा घरेलु कामका लागि नेपाली महिला तस्करी भइरहेको नयाँ रहस्य खुलेको हो । अन्य देशको रोजगारीमा पठाउने भनेर व्यक्तिगत भिसामा नेपाली महिलालाई कुवेतमा घरेलु कामका लागि तस्करले पुर्‍याइरहेका छन् ।

गत पुसयता अजरबैजानका लागि करिब १ सय ३७ जना महिलाका लागि व्यक्तिगत भिसामा वैदेशिक रोजगार विभागअन्तर्गतकाे श्रम कार्यालयले श्रम स्वीकृति जारी गरेको छ । अजरबैजानका लागि जारी गरिएको भिसामा नेपाली महिला श्रमिकलाई घरेलु कामका लागि कुवेत पुर्‍याइन्छ ।

वैशाख महिनायता करिब ५ सयभन्दा धेरै महिलाको व्यक्तिगत श्रम स्वीकृति श्रम कार्यालयबाट जारी भएको पाइएको छ । यसरी व्यक्तिगत भिसा निकालेका महिला प्राय: कुवेत र खाडीका अन्य देशसँगै मलेसिया पुर्‍याइने गरिएको हो ।

सबै प्रमाण पेस गरेपछि श्रम कार्यालयले संस्थागत र व्यक्तिगत भिसाका लागि श्रम स्वीकृति दिने गरेको वैदेशिक रोजगार विभागका सूचना अधिकारी भोला गुरागाईँले बताए ।

नेपालमा जुन देशका लागि आवेदन परेको छ, त्यही देशका लागि मात्र श्रम स्वीकृति जारी गर्ने गरेको अधिकारी गुरागाई बताउँछन् । ‘व्यक्तिगत श्रम स्वीकृतिका नाममा धेरै समस्या र विकृति भइरहेको छ । यो विषयमा विभागले गम्भीर भएर काम गरिरहेको छ’, उनले भने ।

यसरी गरिन्छ सेटिङ

अजरबैजानका लागि जारी गरिएको भिसा परिवर्तन गरेर कुवेत लैजाने गरेका छन् । गत कात्तिक महिनामा नेपालबाट रोजगारीका लागि अजरबैजान हिँडेकी सुनसरीकी सविता नाम परिवर्तन हाल कुवेतमा घरेलु काममा कार्यरत छिन् । सवितालाई रोजगारीका लागि अजरबैजान भनेर कुवेतमा तस्करले पुर्‍याएको उनले सामाजिक सञ्जालमार्फत शिलापत्रलाई बताएकी छिन् ।

‘भिजिट भिसालाई वर्किङ भिसा बनाएर रुट परिर्वन गरेर मलाई कुवेत ल्याइएको हो । मसँग अन्य १५ जना महिला थिए । सबैलाई अजरबैजान भनेर कुवेत ल्याएको छ । नेपालबाट अजरबैजानको हस्पिटल, स्कुल र सुपरमार्केटमा क्लिनरको काम भनेर एजेन्टले पठाएका थिए,’ उनले भनिन्, ‘यसरी अजरबैजान हिँडेका प्रत्येक महिलाले १ लाख ८० हजारसम्म तिरेका छन् । कुवेतमा घरेलु कामका लागि आएका महिलालाई साहुले ३ लाख दिने गरेका छन् । यसरी एजेन्टले एक जनाबराबर झण्डै ५ लाख रुपैयाँ खाने गरेका छन् ।’

सवितासँगै गएकी पाल्पाकी सन्जु (नाम परिवर्तन) पनि नेपालबाट एजेन्टमार्फत अजरबैजान भनेर कुवेत पुर्‍याएको सामाजिक सञ्जालमार्फत बताउँछिन् । सन्जु पनि हाल कुवेतमा घरेलु काममा कार्यरत छिन् ।

नेपालबाट मेघराज कुँवर, राजन राई र राजाराम थापाले अजरबैजान भनेर कुवेतमा घरेलु कामका लागि पठाउने गरेको उनीहरूले जानकारी दिएका छन् । अन्य देशको भिसा निकालेर खाडीका देशमा यी एजेन्टले महिला तस्करी गरिरहेको उनीहरूको भनाइ छ । अजरबैजानका लागि ३० डलर अनलाइनमार्फत भिजिट भिसा पाइन्छ ।

नेपालबाट अनलाइनमार्फत भिजिट भिसा निकालेर भिजिटको ठाँउमा वर्किङ भिसा बनाएर यूएई हुँदै कुवेत पुर्‍याइन्छ । यसरी निकालेको भिसाकाे म्याद ३० दिनको हुन्छ । अजरबैजानका लागि निकालेको भिसा यूएईमा अनलाइनमार्फत परिवर्तन गरिन्छ । अजरबैजानकाे स्थानमा कुवेत र भिजिट भिसाका ठाउँमा वर्किङ भिसा बनाइन्छ । उनीहरूलाई दालाले एयर अरेबिया र फ्लाई दुबईबाट दुबईहुँदै कुवेत पुर्‍याउने गरेका छन् ।

केही वर्षअघि भारत, श्रीलंका र बंगलादेश हुँदै कुवेत, खाडीका देश, मलेसिया र अफ्रिकाका देशमा नेपाली महिलाकाे तस्करी गरिथ्यो । भारत, श्रीलंका र बंगलादेशमा कडाइ हुन थालेपछि तस्करले नयाँ रुटमार्फत महिला तस्करी गर्न थालेका छन् । रोजगारीका नाममा विगत केही वर्षयता नेपाली महिला तस्करीमा परिरहेका छन् । यो विषयमा सरकार भने मौन रहेको छ ।

प्रकाशित मिति: आइतबार, माघ ५, २०७६ १३:३०