अमर न्यौपानेलाई मन पर्ने ५ लेडी क्यारेक्टर

A+ A A-

मदन पुरस्कार प्राप्त कृति ‘सेतो धरती’का लेखक अमर न्यौपानेलाई अन्तराष्ट्रिय नारी दिवसको सन्दर्भ पारेर सोधियो, ‘कस्ता नारी पात्र मन पर्छ ?’

उनले साहित्यिक कृतिका पात्रलाई सम्झिए । त्यसमा पनि पाँच पात्रलाई बिशेषरुपमा । उनको सम्झनाका ती पाँच पात्र ।

सुम्निमाः बिपी कोईरालाको यो उपन्यासकी प्रमुख पात्र ‘सुम्निमा’ को जीवनवादी दर्शन लोभलाग्दो छ । कोईरालाको आफ्नै जीवन दर्शन पनि सुम्निमाको माध्यमबाट मुखारित भएको हो कि ?

आत्मावादी प्रेमी ‘सोमदत्त’लाई उसले सुनाएको जीवन दर्शनले नै मलाई लोभ्याएको हो । आत्मा जोगाउन लागिपरेको सोमदक्तलाई आत्मा होईन शरिर जोगाउनुपर्छ भनेर सुनाएको दर्शनले जीवनको भौतिक पाटोको विशिष्टता देखाउँछ ।

‘शरिर त जति गरे पनि मरिहाल्छ, आत्मा त अमर नै छ, त्यसलाई किन जोगाउनु ? बरु शरिर जोगाउनुपर्छ, शरिरको स्याहार गर्नुपर्छ’ भन्दै उसले सुनाउने भोगवादी फिलोसपीले मलाई लोभ्याउँछ । जीवन् आत्मा मात्रै होइन शरिर पनि हो, यस्तै भन्न खोजेकी हो सुम्निमाले ।

द्रौपदीः द्रौपदी जस्तो पात्र सायदै होलान् । प्रेम र सम्बन्धको मामिलामा उनको उदारता आज पनि ग्रहण योग्य छ । ५ जना पति हुँदा हुँदै पनि अव्यक्त रुपमा उनका अरु दुई प्रेमी थिए । कृष्ण र कर्ण ।

कृष्ण र कर्णप्रतिको त्यो अव्यक्त प्रेम महाभारतभरी देखिन्छ । कृष्णको प्रेममा डुबेकी द्रौपदीले स्वयंवरमा कृष्णको इसारामा कर्णलाई सुत पुत्र भनेर होच्याउँछिन् । कर्णसँगको उनको लगाव महाभारतमा मसिनो तवरमा देख्न पाईन्छ । पञ्चकन्या भनिने द्रौपदीको यौनिक उदारता आजपनि उदाहरणीय छ । उसको विद्रोह पनि कम्ती लोभलाग्दो छैन ।

कुन्तीः महाभारतकै अर्को प्रमुख पात्र हुन् कुन्ती । कुन्ती पनि पञ्चकन्यामै पर्छिन् । विवाह अगावै सन्तान जन्माउनसक्ने कुन्तीको सहास सम्माननीय छ । त्यसपछि पनि उनले जन्माएका सबै सन्तानका बाउ फरक–फरक हुन् ।

उनले पतिबाट सन्तान नै जन्माईनन् । लोग्ने हुँदा–हुँदै अन्य पुरुषबाट सन्तान जन्माउने उनको हिम्मत लोभलाग्दो छ । कहिलेकाहीँ लाग्छ, महाभारतमा जे जति भएको सबै उनकै कारणले भएको हो कि ? महाभारत युद्ध रोक्ने क्षमता राख्ने कुन्तीले पाण्डवलाई कहिल्यै भनिन् कर्ण दाई हो भनेर ।

रहस्य लुकाउन सक्ने उनको अर्को क्षमता हो । कल्पना गर्नुहोसः महाभारतको सुरुमै कुन्तीले पाण्डवलाई कर्ण तिमीहरुको दाई हो भनेको भए के हुन्थ्यो ?

माधवीः मदनमणी दिक्षितको माधवी उपन्यासकी पात्र माधवीको प्रेम र समर्पणले मान्छेलाई सोच्न बाध्य बनाउँछ । माधवीको प्रेमप्रतिको लगाव र समर्पणले मलाई अच्चमित तुल्याउँछ ।

महाभारतको उद्योग पर्वबाट साभार गरिएको यो उपन्यासमा माधवी आफ्नो प्रेमी गालवले वाचा गरेको गुरुदक्षिणा जम्मा गर्नकैलागि ३ जना राजासँग १/१ वर्ष बिताउँछे । उनीहरुका सन्तानपनि जन्माउँछे ।

ओहो ! उसको यो समर्पण, गालव विरामी भएको हुन्छ । पानी परेको हुन्छ । अनि गालवलाई माधवीले स्तनपान गराउँछे । आफ्नो प्रेमीलाई सानो बालकजसरी स्तनपान गराउँछे ।

तर, दुर्भाग्य भन्नुपर्छ गालव र माधवी दुवैको दम्भले उनीहरुको बिहे हुँदैन । सुरुमा गालवले मान्दैन पछि माधवीले मान्दिन् । तर, जे जस्तो भएपनि माधवीको त्याग अचम्मको छ ।

हाना स्मिच्जः द रिडर सिनेमाकी यो लेडी क्यारेक्टरको अभिसप्त जीवन र नियती दर्दनाक छ । तपाईका आँखा रसाउन सक्छन् । त्यही भएर त म भन्छु अभिसप्त जीन्दगीको दर्दनाक कथा हेर्न यो सिनेमा हेर्नुपर्छ ।

पढ्न पनि नजान्ने हानालाई उसको प्रेमीले बेडमा शेक्सपियर लगायतका नाटक अभिनय सहित सुनाउँछ । हत्या अभियोग लागेकी हाना जेल पर्छे । जेलमा पनि उसको प्रेमीले उसलाई नाटकका अडियो भरिएका क्यासेट पठाउँछ ।

अन्तमा तिनै क्यासेटको सिढीँ चढेर हानाले सिलिंगमा आफुलाई झुण्ड्याउँछे । आत्महत्या गर्छे । हानाको भूमिकामा रहेकी केट विन्सलेटको अभिनयले मन छिया–छिया बनाउँछ । त्यसैले त म फेरी भन्छु कुनै पनि हालतमा यो फिल्म हेरौं ।

प्रकाशित मिति: शुक्रबार, फागुन २४, २०७५ २३:३३