एसईई नतिजा सुधार गर्न सामाजिक विकास मन्त्रालयको अभियान

A+ A A-

सामाजिक विकास मन्त्रालय प्रदेश–५ ले एसईई नजिता सुधार गर्न अभियान सुरु गर्ने भएको छ । प्रदेश–५ का सामुदायिक विद्यालयका गणित र विज्ञान विषयको नतिजा सुधार गर्न मन्त्रालयले अभियान नै सञ्चालन गर्न लागेको हो । एसईई २०७५ को नतिजाअनुसार सामुदायिक विद्यालयमा अध्ययनरत ७२ प्रतिशत विद्यार्थी र गणित र विज्ञान विषयमा ई ग्रेड रहेको छ ।

एसईई नजिकिँदै गर्दा प्रदेश सरकारले दुई विषयको ग्रेड वृद्धि गराउने उद्देश्यले यो अभियान सुरु गर्न लागिएको बताएको छ ।

प्रदेशमा सञ्चालनमा रहेका सबै ९ सय ८८ वटा सामुदायिक विद्यालयमा र मदरसामा अध्यनरत ६१ हजार २ सय ९४ विद्यार्थीको शैक्षिक अवस्था सुधार गर्नका लागि १ हजार ९ सय ७६ शिक्षक परिचालन गर्ने सामाजिक विकास मन्त्री सुदर्शन बरालले बताए ।

अतिरिक्त कक्षा प्रदेशका ७ सय ४२ विद्यालयमा विज्ञान र गणित विषय अध्यापन गराइनेछ । विद्यालयमा दिनको डेढ घण्टा ५२ दिन कक्षा सञ्चालन हुनेछ ।

अभियानका लागि प्रदेशलाई संघीय सरकारले विशेष अनुदानको रुपमा ५ करोड रुपैयाँ उपलब्ध गराएको छ ।

त्यहीँबाट विशेष अनुदान रकमको ४ करोड ८२ लाख रकम विद्यालयहरूलाई मन्त्रालयले प्रदान गर्नेछ । विद्यार्थीको गणित र विज्ञानमा नजिता नाजुक रहेकोले यो अभियानपछि नतिजामा सुधार आउने अपेक्षा मन्त्रालयको रहेको छ ।

अभियानलाई प्रभावकारी बनाउने उद्देश्यले जिल्ला स्तरमा समिति प्रमुख समन्वय समिति संयोजकसहित तीन सदस्यीय समिति रहने व्यवस्था गरिएको छ ।

प्रदेशको सामुदायिक विद्यालयका बालबालिकाहरूको गणित र विज्ञानको नतिजाका कारण उनीहरू प्राविधिक शिक्षा अध्ययन गर्नका लागि स्कोर नपुग्ने तथा उनीहरूले पढ्नै नपाउने अवस्था आएकाले विशेष कक्षा सञ्चालन गरिएको मन्त्री बरालको भनाइ छ । अर्को वर्ष यो कार्यक्रम कक्षा ८ देखि नै सञ्चालन हुने बताइएको छ ।

प्रकाशित मिति: मंगलबार, पुस २९, २०७६ ०८:००