राजदरबारको सम्बन्धबारे आपत्तिजनक टिप्पणी गरिएको आरोप

A+ A A-

बेलायतका राजकुमार विलियम र ह्यारीले आफूहरूबीचको सम्बन्ध बिग्रिएको भन्ने समाचारमा कुनै सत्यता नरहेको बताएका छन् ।

पूर्वी इङ्ल्याण्डस्थित महारानी एलिजावेथको सन्ड्रिंघम स्टेटमा शाही सम्मेलन चल्दै गर्दा, राजकुमार विलियम र राजकुमार ह्यारीले आफूहरूबीचको सम्बन्धमा कुनै समस्या नरहेको प्रतिक्रिया दिएका हुन् ।

पूर्वी इङ्ल्याण्डमा शाही परिवारको एक अभूतपूर्व सम्मेलन चलिरहेको छ । यहि बेला केम्ब्रिज र ससिक्सका ड्यूकहरूले विगत दुई वर्षको अवधिमा आफूहरूको सम्बन्धमा चिसोपन आएको भन्ने एक पत्रिकामा आएको विवरण अस्वीकार गरेका छन् ।

एक संयुक्त विज्ञप्ति जारी गर्दै राजकुमारद्वय विलियम र ह्यारीले दुई दाजुभाइबीच सम्बन्ध बिग्रिएको भन्ने समाचार आपत्तिजनक भएको बताएका छन् ।

उनीहरूले राजकुमार ह्यारी र उनकी श्रीमती मेगनलाई हेप्ने प्रवृत्ति देखाइएको भन्ने विवरण मानसिक स्वास्थ्यका विषयमा निकै संवेदनशील रहेका दाजुभाइका लागि निकै हानिकारक हुन सक्ने उल्लेख गरेका छन् ।

सन्ड्रिंघम स्टेटको शाही बैठकले आफ्नो शाही भूमिका कम गर्ने र अधिकांश समय विदेशमा बस्ने ड्यूक र डचिस अफ ससिक्सको निर्णयपछि उब्जिएको संकट समाधान गर्ने उद्देश्य लिएको छ।

शाही बैठकमा महारानी, राजकुमार विलियम, राजकुमार ह्यारी र उनीहरूका पिता प्रिन्स अफ वेल्स राजकुमार चार्ल्स सहभागी हुने कार्यक्रम छ। राजकुमार ह्यारीकी पत्नी मेगनले समेत फोनमार्फत क्यानडाबाट छलफलमा भाग लिने अपेक्षा गरिएको छ।

गत साता राजकुमार ह्यारी र मेगनले एउटा विज्ञप्ति जारी गर्दै उनी क्यानडा गएकाे बताएकी थिइन् । छलफलबाट ह्यारी र मेगन दम्पतीको राजपरिवारसँग कस्तो सम्बन्ध रहन्छ भन्ने सो छलफलबाट निर्धारण हुने अपेक्षा गरिएको छ।

प्रकाशित मिति: मंगलबार, पुस २९, २०७६ ०७:४८