माफियाको चँगुलमा फस्दै मेडिकल कलेज, रोकिएन ठगी धन्दा

गण्डकी मेडिकल कलेज

A+ A A-

चिकित्सक उत्पादन गर्ने शैक्षिक संस्थाहरू माफियाको चंगुलमा फस्दै गएको समाचार आजको राजधानी दैनिकले प्रकाशित गरेको छ । एमबीबीएस अध्यापन गराउने देशभरिका अधिकांश निजी मेडिकल कलेजले मनपरी शुल्क असुलेको पुष्टि भएपछि उनीहरूको ठगीको पर्दाफास भएको छ ।

यसरी मनपरी शुल्क असुलेर ठगी गर्ने मेडिकल कलेजका सञ्चालकलाई प्रहरीले पक्राउ गरी आवश्यक कानुनी प्रक्रियासमेत अगाडि बढाएको छ । ठगी गरेको आरोपमा पोखरास्थित गण्डकी मेडिकल कलेजका पूर्वप्रमुख कार्यकारी अधिकृत सन्तोषप्रसाद खनाल र परीक्षा नियन्त्रक लक्ष्मणप्रसाद शर्मालाई पक्राउ गरी उनीहरूमाथि ठगी मुद्दा दायर गर्ने तयारी प्रहरीले गरेको छ ।

नेपाल प्रहरीका प्रवक्ता प्रहरी वरिष्ठ उपरीक्षक (एसएसपी) उत्तमराज सुवेदीले विद्यार्थीहरूको उजुरीका आधारमा उनीहरूलाई पक्राउ गरी अनुसन्धान थालिएको जानकारी दिए । प्रहरी प्रवक्ता सुवदीका अनुसार अन्य जिल्लामा पनि यस्ता कलेजले ठगी गरेको उजुरी आएको आधारमा त्यस्ता सञ्चालकलाई पक्राउ आवश्यक अनुसन्धान र छानबिन गरी दोषीमाथि कानुनी कारबाही गर्ने तयारी गरिएको छ ।

कलेजका सञ्चालक वा कसैले ठगी गरेको पुष्टि भएमा त्यसलाई एक वर्षदेखि १० वर्षसम्म कैद हुने कानुनी व्यवस्था छ । निजी क्षेत्रका अधिकांश मेडिकल कलेजले विद्यार्थीबाट तोकिएभन्दा झन्डै दोब्बर शुल्क असुल्ने गरेका छन् । यसकारण, अभिभावक र विद्यार्थी दुवै मारमा पर्ने गरेका छन् भने कतिपय विद्यार्थी मानसिक तनावमा छन् ।

एमबीबीएस अध्ययनरत एक विद्यार्थीले भने, ‘निजी मेडिकल कलेजका सञ्चालक बस्छन् । आफैं शुल्क निर्धारण गर्छन् । सरकारको निर्णय मान्दैनन्, यो अवैध निर्णय भएन र रु’ हाल देशभरि २२ मेडिकल कलेजमा एमबीबीएसतर्फ १ हजार ५ सय विद्यार्थी अध्ययनरत छन् । जसमध्ये १९ निजी र तीन सरकारी मेडिकल कलेज छन् ।