गण्डकी प्रदेशका ८५ वटै स्थानीय तहमा ‘हेलिप्याड’ बनाइने

A+ A A-

गण्डकी प्रदेश सरकारले प्रत्येक स्थानीय तहमा ‘हेलिप्याड निर्माण’ को अभियान थालेको छ । प्रदेशअन्तर्गतका विभिन्न स्थानीय तहमा विपद् व्यवस्थापन तथा आपतकालीन उद्धारमा सहजता तुल्याउन र पर्यटकहरूलाई हेलिकोप्टरमार्फत सहज रूपमा आवतजावतको व्यवस्था मिलाउने उद्देश्यले ‘हेलिप्याड निर्माण’ को अभियान थालिएको हो ।

गण्डकी प्रदेशका ८५ वटै स्थानीय तहमा एक/एक हेलिप्याड निर्माण गर्ने योजनासहित उद्योग, पर्यटन, वन तथा वातावरण मन्त्रालयले नागरिक उड्डयन प्राधिकरण सँग छलफल गरेको छ । प्रदेश सरकारले नागरिक उड्डयन प्राधिकरणको प्राविधिक सहयोगमा ८५ वटै स्थानीय तहहरूमा हेलिप्याड निर्माणको सम्भावनाका बारेमा अध्ययन अगाडि बढाएको जनाएको छ ।

प्रदेशका ८५ वटै स्थानीय तहमा हेलिप्याड निर्माण गर्ने प्रक्रिया अगाडि बढेको गण्डकी प्रदेशका उद्योग, पर्यटन, वन तथा वातावरण मन्त्री विकास लम्सालले बताए ।

प्रदेश सरकारले म्याग्दी, गोर्खा, मनाङ र मुस्ताङमा हेलिप्याड निर्माण गर्न करिब ८ लाख रूपैयाँ आर्थिक वर्ष २०७५/७६ मा बजेट विनियोजन गरेको छ । सरकारले अन्य जिल्लामा समेत हेलिप्याड निर्माण गर्ने योजना बनाएको मन्त्री लम्साललले बताए ।

हेलिप्याड निर्माणपछि आकस्मिक बिरामी र दुर्घटनाका घाइतेलाई तत्कालै उद्धार गरी अस्पतालसम्म पुर्‍याउन तथा पर्यटकीय क्षेत्रमा हेलिकोप्टरमार्फत पर्यटकलाई सहज रूपमा आवतजावत गर्न सहयोग पुग्ने उनेको भनाइ छ ।

‘हिमाली जिल्लाका रूपमा चिनिएका मुस्ताङ, मनाङ, गोरखा र म्याग्दीमा यही वर्ष हेलिप्याड निर्माण गर्छौं,’ उनले भने, ‘हेलिप्याड निर्माणले हिमाली जिल्लाका स्थानीय तहमा आकस्मिक बिरामी र दुर्घटनाका घाइतेसँगै हिमाल आरोहण तथा पदयात्रामा आउने पर्यटकलाई पनि सहयोग पुग्नेछ ।’

प्रदेश सरकारले हिमाली जिल्लामा हेलिप्याड निर्माणका लागि ८ लाख रकम छुट्याएको छ । यस वर्ष सबै स्थानीय तहहरूमा हेलिप्याड निर्माण गर्न पर्याप्त बजेट विनियोजन नभए पनि स्थानीय तहहरूसँग छलफल गरी आगामी वर्ष यथेष्ट बजेट विनियोजन गरी हेलिप्याड निर्माणको काम गर्ने मन्त्री लम्सालले बताए ।

प्रदेशअन्तर्गतका विभिन्न स्थानीय तहहरूमा हेलिकोप्टरको पहुँच पुर्‍याउन आवश्यक पर्ने प्राविधिक सहयोग गर्न नागरिक उड्डयन प्राधिकरण तयार रहेको पोखराका प्रमुख भोला प्रसाद गुरागाईंले बताए ।

प्राविधिक टोलीद्वारा सहज रूपमा हेलिकोप्टर अवतरण र उडान गर्न सक्ने उपयुक्त स्थानमा हेलिप्याड निर्माण गर्ने उपयुक्त स्थान छनोट गर्नेछ ।

‘हेलिप्याड निर्माण’ गर्न विभिन्न प्राविधिक प्रक्रिया पूरा गर्नुपर्ने पोखरा क्षेत्रीय अन्तर्राष्ट्रिय विमानस्थलका आयोजना प्रमुख ई.विनेश मुनकर्मीले बताए । उनका अनुसार हेलिप्याड निर्माणको मापदण्डमा जमिनको सतहमा सामान्यतया १५ सेन्टिमिटर ढलान पीपीसी ढलान गरेको हुनुपर्दछ । त्यस्तै, खुल्ला सहज रूपमा हेलिकोप्टर बस्न मिल्ने सुरक्षित स्थान हुनुपर्नेछ ।

प्रकाशित मिति: सोमबार, पुस २८, २०७६ ११:२२