पोखरा महोत्सवको तयारी पूरा, २९ पुसबाट सुरु हुने

A+ A A-

युनाइटेड क्लबको आयोजनामा आगामी २९ पुसदेखी १२ माघसम्म आयोजना हुने १०औं संस्करणको पोखरा महोत्सवको सम्पूर्ण तयारी पूरा भएको छ । क्लबले शनिबार आयोजित पत्रकार सम्मेलन गरी पोखराको अमरसिंह चौरमा दुई हप्तासम्म सञ्चालन हुने महोत्सवको सम्पूर्ण तयारी पूरा भएको जानकारी दिएको हो ।

क्लबले प्रत्येक वर्ष महोत्सवको आयोजना गरी पोखरा र आसपासका क्षेत्रमा शिक्षा, स्वास्थ्य, खेलकुद र पर्यटन प्रवद्र्धनका लागी चिडियाखाना निर्माणलगायत विभिन्न विकासनिर्माणका काम गर्दै आएको छ ।

महोत्सवमा विभिन्न जातजातिका कलासंस्कृति झल्कने प्रदर्शनी, औद्योगिक उत्पादन र हस्तकला सामाग्रीहरुको प्रदर्शनी एवं बिक्री, सूचनाप्रविधीको प्रदर्शनीलगायत विभिन्न आकर्षक कार्यक्रम रहेको आयोजकले जनाएको छ ।

त्यसैगरी पर्यटन प्रवद्र्धनका सामाग्रीहरुको प्रदर्शनी, गण्डकी प्रदेशका विभिन्न पर्यटकीय स्थलहरुको जानकारी, खुला नृत्य प्रतियोगिता र बुद्धिचाल प्रतियोगिता पनि आयोजना हुने महोत्सव प्रचारप्रसार संयोजक शान्तबहादुर थापाले जानकारी दिए । महोत्सवमा कुल २ सय ५६ वटा स्टल रहनेछन् ।

महोत्सव आयोजनाबाटै संकलित रकमले पोखरामा नयाँ भ्रमण गन्तव्यका रुपमा क्लबले पोखरा महानगरपालिकाको वडा नम्बर ३०, ३१ र ३२ मा रहेको पचभैया, चापापानी, चिसाकुना र चैनपुर सामुदायीक वन क्षेत्रको १ सय ३४ हेक्टर (२६ सय ८० रोपनी ) क्षेत्रफल जग्गामा हाल चिडियाखाना निर्माण गरिरहेको छ ।

कार्यक्रममा बोल्दै क्लबका अध्यक्ष लालकाजी गुरुङले हालसम्म चिडियाखाना निर्माणका लागि क्लबलको तर्फबाट ५५ लाख रुपैयाँ लगानी भइसकेको जानकारी दिए । तर, स्थानीयको विवादका कारण अहिले भने चिडियाखाना निर्माणको काम रोकिएको पनि उनले बताए ।

‘केही स्थानीयका कारण चिडियाखानाको निर्माण हाल अवरुद्ध भएको छ,’ उनले भने, ‘चिडियाखाना निर्माणको कामलाई निरन्तरता दिनका लागी हामीले पहल गरिरहेका छौं । छिट्टै विवाद समाधान गर्दै द्रुत गतिमा निर्माणको काम अघि बढाउने छौं ।’

चिडियाखाना निमार्णका लागी गत आर्थिक वर्षमा गण्डकी प्रदेश सरकारले ७३ लाख २४ हजार ४ सय ७७ रुपैयाँ विनियोजन गरेको थियो । यसैगरी क्लबको ५५ लाखसहित हालसम्म साविकको लेखनाथ नगरपालिकाबाट १० लाख, पोखरा महानगरपालिकाबाट १२ लाख ८८ हजार, साविक जिल्ला वन कार्यालय कास्कीबाट २४ लाख सहित १ करोड ५१ लाख ४७ हजार ८ सय २६ रुपैयाँ खर्च भइसकेको अध्यक्ष गुरुङले बताए ।

क्लबले प्रवेश टिकटबाट प्रति टिकट एक रुपैयाँ छुट्याएर सेती नदी संरक्षणलाई अभियानकै रुपमा अगाडि बढाएको छ भने विपद् व्यवस्थापनका लागी समेत अक्षय कोष स्थापना गरिएको गुरुङले जानकारी दिए ।

प्रकाशित मिति: शनिबार, पुस २६, २०७६ २०:१२