आइतबारभित्रै सभामुखको उम्मेदवार तय गर्ने नेकपा अध्यक्षद्वयको प्रतिवद्धता

आइतबारभित्रै सभामुखको उम्मेदवार तय गर्ने नेकपा अध्यक्षद्वयको प्रतिवद्धता

A+ A A-

नेपाल कम्युनिस्ट पार्टी (नेकपा) अध्यक्षद्वय केपी ओली र पुष्पकमल दाहाल (प्रचण्ड)ले आइतबारभित्रै सभामुखको उम्मेदवार तय गरिसक्ने प्रतिवद्धता जनाएका छन् ।

नेकपाका कारण प्रतिनिधिसभालाई बन्दी बनाइएको गुनासो बोकेर अध्यक्षद्वयलाई भेट्न पुगेकी उपसभामुख शिवमाया तुम्बाहाम्फेसँग अध्यक्षद्वयले आइतबार सभामुखको उम्मेदवार तय गरिसक्ने बताउँदै आइतवारका लागि तोकिएको बैठक सुचारु गर्न भनेका छन् ।

बारम्बार सदनको बैठक सूचना टाँस्दै स्थगत गर्दै आएकी उपसभामुख डा. तुम्बाहाम्फेले शुक्रबार प्रधानमन्त्री निवास बालुवाटारमा प्रधानमन्त्री ओली र अर्का अध्यक्ष दाहालसँग भेट गरी प्रतिनिधिसभाको बैठक सभामुखको चुनाव हुन नसक्दा अनिर्णित भएको गुनासो गरेकी थिइन् ।

अध्यक्षद्वयको भेटमा तुम्बाहाम्फेले एक महिना हुन लाग्दासमेत सभामुखको उम्मेदवार चयन गर्न नसक्दा सरकारले अघि सारेका धेरै विधेयकहरू अड्किएर बसेको भन्दै गुनासो गरेकी थिइन् ।

बालुवाटार स्रेातका अनुसार भेटमा अध्यक्षद्वय ओली र दाहालले आइतबार १० बजेसम्ममा प्रतिनिधिसभाको सभामुखको उम्मेदवार नेकपाले टुंगो लगाउने प्रतिवद्धता व्यक्त गरेका थिए ।

अध्यक्ष ओलीले सभामुखमा संविधानसभाका पूर्वअध्यक्ष सुभाषचन्द्र नेम्वाङलाई सभामुख बनाउने चाहना राखेका छन् भने अर्का अध्यक्ष दाहालले पूर्वमाओवादीको कोटामा परेको सभामुखमा पूर्वमन्त्री अग्निप्रसाद सापकोटाको नाम अघि सारेका छन् ।

राष्ट्रपति विद्यादेवी भण्डारीले भने सभामुखमा उपसभामुख तुम्बाहाम्फेलाई ल्याउन अध्यक्षद्वयलाई दबाब दिएकी थिइन् । यसरी सभामुख कसलाई बनाउने भन्ने विषयमा नेकपा सचिवालयमा समेत विषय प्रवेश भएको थियो । तर, सहमति हुन नसक्दा सिंगो संसद नै अनिर्णयको बन्दी बनेको छ ।

आइतबार तुम्बाहाम्फेले राजीनामा दिने

संविधानअनुसार संसदको सभामुख र उपसभामुख फरकफरक दलको सदस्य हुनुपर्ने प्रावधान भएकाले नेकपाले सभामुखमा उम्मेदवारी दिएमा उपसभामुखमा अन्य दलको उम्मेदवारलाई समर्थन गर्नुपर्ने देखिन्छ ।

त्यसैले उपसभामुख तुम्बाहाम्फेले आइतबार बिहानसम्म राजीनामा दिने भएकी छन् । तुम्बाहाम्फेले राजीनामा दिएपछि प्रतिनिधिसभाका ज्येष्ठ सदस्य राष्ट्रिय जनता पार्टी (राजपा) नेपाल संसदीय दलका नेता महन्थ ठाकुरले सदनको बैठकको अध्यक्षता गर्नेछन् ।

संसद सचिवालयको रेकर्डअनुसार राजपा नेपालकै महिन्द्र राय यादव सबैभन्दा ज्येष्ठ सदस्य हुन् । तर, उनले प्रतिनिधिसभाको पहिलो अधिवेशनको पहिलो बैठकको अध्यक्षता गर्ने चाहना नराखी अनुपस्थित हुँदा ठाकुरले सदनको बैठकको अध्यक्षता गरेका थिए ।

२० दिनदेखि अनिर्णयको बन्दी

नेकपाले प्रतिनिधिसभाको रिक्त सभामुख पदको उम्मेदवार चयन नगर्दा एक महिनाअघि आह्वान भएको संघीय संसदअन्तर्गतको प्रतिनिधिसभा अनिर्णयको बन्दी बनेको छ ।

प्रतिनिसभामा करिब दुईतिहाइ बहुमतको नजिकको संख्याका सदस्य नेकपाका छन् । नेकपाले समर्थन गरेकाबाहेकका सदस्य सभामुख हुने सम्भावना नहुँदा उपसभामुख तुम्बाहाम्फेले सदनको बैठक दुई पटक सूचना टाँसेर स्थगित गर्दै आएकी छन् ।

सभामुखको उम्मेदवार चयन गर्ने विषयमा नेकपाभित्र अध्यक्ष तथा प्रधानमन्त्री ओली र कार्यकारी अध्यक्ष प्रचण्डबीच सहमति जुट्न नसक्दा व्यवस्थापिका नै अनिर्णयको बन्दी हुँदै आएको छ ।

सरकारको सिफारिसमा राष्ट्रपति विद्यादेवी भण्डारीले ४ पुसमा संघीय संसदको पाँचौं अधिवेशनको आह्वान गरेकी थिइन् । राष्ट्रियसभाको बैठक ४ पुसदेखि नियमित बसिरहे पनि प्रतिनिधिसभाको बैठक भने ४ पुसमा औपचारिक बैठक गरी एजेण्डामा प्रवेश नगरी स्थगित हुँदै आएको छ ।

प्रकाशित मिति: शुक्रबार, पुस २५, २०७६ १४:३३