देउवा निवासमा उपसभापति गच्छदार र महामन्त्री खड्का बाझेपछि...

A+ A A-

आफ्नाविरुद्ध पार्टी कार्यालय सानेपामा भेला गरेका जिल्ला सभापतिलाई खाजा खान कांग्रेस सभापति शेरबहादुर देउवाले बिहीबार बिहान १० बजे आफ्नो निवास बुढानीलकण्ठमा बोलाएर झण्डै एक घण्टा कुराए ।

हरेक राजनीतिक कार्यक्रममा एक घण्टा सहभागीलाई कुराउनु सभापति देउवाको पुरानै शैली हो ।

देउवा निवासको पहिलो ढोका पार गरेर पूर्वतर्फको घरसँगैको अर्को ढोका खोलेर चौरमा राखिएको कुर्सीमा जिल्ला सभापतिलाई उत्तर, दक्षिण र पूर्वतर्फ फर्काएर कुर्सी राखिएको थियो ।

पश्चिमतर्फ फर्काएर राखिएको कुर्सीमा सभापति देउवासँगै अन्य पदाधिकारी लहरै बसेका थिए । ७७ मध्ये ४७ जना जिल्ला सभापति आफ्नो अध्यक्षतामा ११ पुसमा भएको केन्द्रीय कार्यसमिति बैठकको निर्णय खारेजीको माग गर्दै भेला भएपछि उनीहरूलाई ‘साइज’मा ल्याउने उद्देश्यले आफ्नै निवासमा बोलाएका थिए ।

आफ्नाविरुद्ध कुनकुन जिल्लाका सभापतिले विरोध गर्दा रहेछन् भनेर नाडी छाम्न बोलाएका सभापति देउवाले उनीहरूलाई ‘ह्यारेस’ गर्ने उद्देश्यले आफू पक्षधर पदाधिकारी र केही जिल्ला सभापतिलाई समेत बोलाएका थिए ।

जिल्ला सभापतिलाई थर्काउने उद्देश्यले पहिले नै सम्बोधन गरेका देउवाको सम्बोधनबाट ४७ मध्ये उपस्थित भएका करिव ३० जना सभापति टसको मस भएनन् बरु उनीहरूको एउटा माग उचित भएको भन्दै उल्टै समर्थन गर्न पुगे ।

आफू महाधिवेशनबाट निर्वाचित सभापति भएकाले हारेकाहरूले धम्क्याएकै भरमा पछि नहट्ने भन्दै पार्टीमा सहमतिलाई छाडेर विवाद विभाजनको रेखा कोर्दा कसलाई फाइदा हुन्छ ? भन्दै प्रश्न गरेका थिए ।

‘तपाईंहरूले पार्टी कार्यालयमै जिल्ला सभापतिको भेला बोलाएको हो भने म सभापति हुँ मलाई किन नबोलाएको ? रामचन्द्र (नेता रामचन्द्र पौडेल) र शशांक (महामन्त्री डा. शशांक कोइराला)लाई मात्र किन बोलाएको ? महाधिवेशनबाट जितेको सभापतिलाई वाइपास गरेर चुनाव हारेकाले भनेको मैले मान्नुपर्ने ?’, देउवाको भनाई उद्धृत गर्दै एक सहभागीले भने ।

देउवा ‘चुनाव हारेकाले भनेबमोजिम चुनाव जितेकाले मान्दै जाने हो भने तपाईंहरूको विरुद्ध चुनाव हारेका सभापतिलाई उचालेँ भने के गर्ने ? चुनाव हारेकाले पार्टी चलाउने कि जितेकाले ?’ भन्दै कड्किएका थिए ।

देउवाको जवाफमा उपस्थित जिल्ला सभापतिका तर्फबाट काभ्रेका सभापति मधु आचार्य, गुल्मीका भुवन श्रेष्ठ, रोल्पाका अमरसिंह पुन, बर्दियाका सञ्जय गौतमले आफूहरूले गल्ती गरे सजाय भोग्न तयार रहेको भन्दै निर्वाचन जितेकै आधारमा पार्टीको पद्धति, विधि र विधानलाई कुल्चन कसैले नपाउने भनेर प्रतिवाद गरेका थिए ।

विधान नमान्ने र पद्धति तोड्ने काम कुनै पनि निर्वाचित पदाधिकारीले गर्न नपाउने र गर्न नहुने अडान राखेका थिए । देउवाको भनाइ पछि जिल्ला सभापतिका तर्फकाट काभ्रे सभापति आचार्यले ५ बुँदे मागपत्र सभापति देउवालाई बुझाएका थिए ।

आचार्यले पत्र पढेर सुनाएपछि देउवाले भ्रातृ संस्थाले पार्टीको सदस्यता वितरण गर्न पाउने अधिकार दिनु कुनै हालतमा ठीक नभएको बताएका थिए । उनले आफ्नै सदस्यता वितरण गर्न नसकी महाधिवेशन गर्न नसक्ने भ्रातृ संस्थालाई त्यस्तो अधिकारी दिनुहुन्न भन्ने पक्षमा आफू पनि रहेको बताएका थिए ।

देउवालाई पत्र बुझाएपछि देउवासँगै बसेका उपसभापति विमलेन्द्र निधिले पार्टी केन्द्रीय कार्यसमितिको ११ पुसको बैठकले निर्णय गरेपछि असन्तुष्ट नेता पौडेललगायतको वार्ता टोलीसँग भएको वार्ता र सहमतिको प्रयासका विषयमा जानकारी दिएका थिए ।

निधिपछि बोलेका अर्का उपसभापति तथा पार्टी संसदीय दलका उपनेता विजयकुमार गच्छदारले भ्रातृ संस्थालाई पार्टीको सदस्यता वितरण गर्ने अधिकार दिनु गम्भीर गल्ती हुने भन्दै सभापति देउवाले दिएको अभिव्यक्ति एकदमै ठीक भएको भन्दै जिल्ला सभापतिहरूलाई धन्यवाद भनेका थिए ।
गच्छदारले देउवाको भनाइमा कड्किँदै समर्थन जनाएपछि जिल्ला सभापतिहरूले तालीको गडगडाहटले समर्थन गरेका थिए । गच्छदारको भनाइको महामन्त्री खड्काले प्रतिवाद गर्दै ‘जिल्लामा फर्किएर कार्यान्वयन गर्दा थाहा हुन्छ’ भनेका थिए ।

त्यसपछि गच्छदारले आफूलाई ‘उपसभापति भने पनि पदाधिकारीको रूपमा काम गर्न नै कहाँ दिएको छ र ?’ भन्दै प्रतिवाद गरेका थिए । गच्छदार र खड्काबीच वादविवाद भएपछि सभापति देउवाले रोक्नुपरेको थियो ।

गच्छदारपछि खड्काले बोल्दै ११ पुसको केन्द्रीय कार्यसमितिको बैठकबाट पार्टी विधानका विभिन्न दफा निलम्बन गर्नुपरेको कारण जनाएका थिए । उनले विधानका केही दफा निलम्बन नगरी महाधिवेशन २०७७ फागनुसम्ममा गर्न नसकिने तर्क गरेका थिए ।

महामन्त्री खड्कापछि बोल्ने जिल्ला सभापतिले महाधिवेशन हुनु एक वर्षअघि पार्टीको सदस्यता वितरण गर्नुपर्ने प्रावधानको दफा निलम्बन गरे पनि क्रियाशील सदस्यता वितरण र त्यसको अन्तिम नामावली, स्थानीय तहको अधिवेशनको कार्यतालिकासम्बन्धी विधानको प्रावधान चलाउन नहुने अडान राखेका थिए ।

जवाफमा सभापति देउवाले १४औँ महाधिवेशन हुने मिति ७–१० फागुन २०७७ चलाउन नसक्ने तर अन्य तहको अधिवेशनको कार्यतालिका सहमतिमा तलमाथि गर्न सकिने बताएका थिए ।

जिल्ला सभापतिलाई ‘काउन्टर’ दिन बोलाइएका कांग्रेस ललितपुरका सभापति मदनबहादुर अमात्य, भक्तपुरका सभापति दुर्लभ थापा, दैलेखका सभापति रुद्र खड्का, म्याग्दीका खम्बबहादुर खर्बुजा, धनकुटाका पूर्वसभापति मनोहरनारायण श्रेष्ठ, कञ्चनपुरका बहादुरसिंह थापाले समेत जिल्ला सभापतिहरूको मागपत्रमा समर्थन जनाएका थिए ।

ललितपुर सभापति अमात्यले भ्रातृ संस्थालाई सदस्यता वितरण गर्न अधिकार दिने प्रावधान आपत्तिजनक भएको, समावेशी कोटाबाट कसैलाई पनि एक पटक मात्र अवसर दिनु, सबै पदाधिकारीहरू बुथ समितिबाटै निर्वाचित हुनुपर्ने जिल्ला सभापतिहरूको मागलाई समर्थन जनाएका थिए ।

देउवाले बोलाएको भेला करिव १ घण्टासम्म चलेको थियो । भेलामा उपसभापतिद्वय निधि र गच्छदार, महामन्त्री खड्कासहित सहमहामन्त्री डा. प्रकाशरण महत, पूर्वउपसभापति गोपालमान श्रेष्ठ र प्रवक्ता विश्वप्रकाश शर्माको उपस्थिति थियो ।

२२ र २३ पुसमा पार्टी केन्द्रीय कार्यालय सानेपामा भेला गरेका जिल्ला सभापतिहरूले लिखित रूपमा तयार पारेको प्रतिवेदन सभापति देउवालाई पार्टी कार्यालयमै बोलाएर दिने भनेर बुधबार निर्णय गरेका थिए ।

बिहीबार बिहान देउवा निवासमा गएर सभापति देउवालाई आफूहरूको भेलाको निष्कर्ष सुनाउने मात्र उद्देश्यले जिल्ला सभापतिहरू बुढानीलकण्ठ गएका थिए । उनीहरूको लिखित निष्कर्ष बुझ्न पार्टी केन्द्रीय कार्यालय सानेपामा नजाने अडान लिएपछि देउवाले आफ्नै निवासमा लिखित माग दिन आग्रह गरेका थिए ।

देउवाको सकारात्मक जवाफ सुनेर फर्किएका जिल्ला सभापतिहरू अबको थप बाटो के हो भन्ने निष्कर्षमा पुग्न सकेका छैनन् । देउवाले जिल्ला सभापतिहरूको माग सुनेपछि वरिष्ठ नेता पौडेललगायतसँग छलफल गरेर सहमतिमा मागहरूको सम्बोधन गर्ने जवाफ दिएका थिए ।

प्रकाशित मिति: बिहीबार, पुस २४, २०७६ १९:३१