बढुवा सिफारिसमा परेकी एआईजीमाथि लोगो र पदक दुरुपयोग अभियोग, पुष्टि भए दुई वर्ष कैद

बढुवा सिफारिसमा परेकी एआईजीमाथि लोगो र पदक दुरुपयोग अभियोग, पुष्टि भए दुई वर्ष कैद

A+ A A-

प्राविधिकतर्फ अतिरिक्त प्रहरी महानिरीक्षक (एआईजी) मा बढुवा सिफारिस भएकी डा. आशा सिंहविरुद्ध अख्तियार दुरुपयोग अनुुसन्धान आयोगमा उजुरी परेको छ । १४ पुसमा गृह मन्त्रालयले नेपाल प्रहरी अस्पतालको प्राविधिकतर्फको एआईजीमा उनलाई सिफारिस गरेको थियो ।

उनीमाथि संयुक्त राष्ट्रसंघीय शान्ति मिसनमा सहभागी नै नभई सहभागी प्रहरी अधिकारीले लगाउने लोगो लगाएको, नेपाल सरकारले प्रदान गर्ने पदक नपाई पदकसमेत लगाएर दुरुपयोग गरेको भन्दै छानबिनका लागि अख्तियारमा उजुरी परेको हो ।

अख्तियारमा उजुरी परेको पुष्टि गर्दै त्यसमाथि छानबिन भइरहेको अख्तियार स्रोतको भनाइ छ ।

सिंहले पदक लगाएको फोटोसमेत सार्वजनिक भएको छ । फोटोमा वरिष्ठ प्रहरी उपरीक्षक (एसएसपी) हुँदा उनले उक्त लोगो लगाएको देखिँदैन । तर, डीआईजी हुँदा भने उनले उक्त लोगो लगाएको देखिन्छ । बढुवा हुँदा सरकारले दिएको पदकबापत २ अंक जोडिने गर्छ ।

४ पुसमा प्रहरी अस्पतालकी प्रमुख एआईजी डा. दुर्गा थापाले ३० वर्षे सेवा हदका कारण अवकाश पाएपछि एआईजी पद रिक्त थियो ।

थापाको अवकाशपछि वरिष्ठताका आधारमा अस्पतालका प्रहरी नायव महानिरीक्षक (डीआईजी) डा. मिनराज पाठकले प्रहरी अस्पतालको निमित्त प्रमुखको जिम्मेवारी पाएका थिए ।

तर, वरिष्ठताका आधारमा गृह मन्त्रलायले बालरोग विशेषज्ञ डा. पाठकलाई एआईजीमा बढुवा गर्नुको साटो उनीभन्दा कनिष्ठ आशा सिंहलाई एआईजीमा सिफारिस गरेको थियो ।

सो बढुवाविरुद्ध पाठकले समेत लोकसेवाको बढुवा तथा विभागीय सजाय परामर्श शाखामा उजुरी दिएका छन् । पाठक र सिंह दुवै २०५२ सालमा प्राविधिक प्रहरी निरीक्षकबाट सेवा प्रवेश गरेका थिए ।

छानबानमा कुनै कैफियत देखिए उनको एआईजी बढुवा रोकिनेछ । बढुवा सिफारिस भएको सात दिनभित्र उजुरी लिने र त्यसको सात दिज अनुसन्धानका लागि समय हुन्छ । १५ दिनभित्र कुनै उजुरी पुष्टि भए बढुवा बदर हुने व्यवस्था छ ।

प्रहरी अधिकारीहरूका अनुसार डा. सिंह कनिष्ठ भए पनि प्रधानमन्त्री केपी शर्मा ओलीका निजी चिकित्सक डा. दिव्या सिंहको आफन्त भएकै कारण एआईजी सिफारिसमा परेकी हुन् । डा. आशा स्त्री रोग विशेषज्ञ हुन् ।

पुष्टि भए जेल सजाय हुने

मुलुकी फौजदारी संहिताअनुसार कुनै राष्ट्रसेवक वा कुनै व्यक्तिले आफूले नपाएको ओहोदा, अधिकार, हैसियत वा सुविधा पाए पनि वा कुनै राष्ट्रसेवकको ओहोदा अधिकार हैसियत वा सुविधा प्रयोग गरेमा वा नपाएको ओहोदासम्बन्धी चिन्ह देखाएमा, देखाउने मनशायले त्यस्तो चिन्ह प्रयोग गरेमा कसुरको मात्राअनुसार एक वर्षदेखि दुई वर्षसम्म कैद र ५० हजार रुपैयाँसम्म जरिमाना हुने उल्लेख छ ।

प्रकाशित मिति: बुधबार, पुस २३, २०७६ १४:३४