सफल बन्नु छ ? छोड्नुहोस् यस्ता बहाना

A+ A A-

संसारका हरेका व्यक्तिसँग दिनमा २४ घण्टा हुन्छ । तर, कोही समय नभएको गुनासो गर्दै अल्झिरहेका हुन्छन् भने कोही समयको रफ्तारसँगै अगाडि बढिरहेका हुन्छन् । बहाना बनाउनेहरू गुनासो गर्नमा ब्यस्त हुन्छन् भने अवसर हेर्नेहरू आफ्नो सपनाको सिँढी चढ्नमा ब्यस्त हुन्छन् । त्यस कारण हामीले यस्ता बहानालाई जति छिटो छोड्न सक्यो, त्यत्ति नै छिटो सफल हुन सकिन्छ ।

मसँग स्रोत छैन

धेरैको भनाइ हुने गर्छ, म यस्तो गर्न चाहन्छु, तर मसँग पैसा छैन, स्रोत छैन । यदि आफूले खोजेजस्तै पैसा र स्रोत नमिल्दासम्म काम गर्नु हुन्न भने तपाईंको सपना सधैं सपना नै रहन्छ । आफूसँग तत्काल भएको स्रोतको सक्दो उपयोग गर्नुहोस् । जहाँ हुनुहुन्छ, जति सक्नुहुन्छ आफूले चाहेको कामको सुरूवात गर्नुहोस् । त्यसपछि तपाईंको बाटो बन्दै जान्छ, स्रोतहरू फेला पर्दै जान्छन् ।

मसँग पर्याप्त समय छैन

आफ्नो कामका लागि समय नहुनु भनेको केवल बहाना हो । जीवनका आफ्ना प्राथमिकताहरू छुट्याउनुहोस् । अरूलाई खुशी पार्नका लागि आफ्नो प्राथमिकतालाई नजरअन्दाज नगर्नुहोस् । भोलिका लागि आज राति नै समय तालिका बनाउनुहोस् ।

मलाई सहयोग गर्ने मान्छे छैनन्

तपाईंको सपना तपाईंले देख्नुभएको सपना हो र त्यसका लागि तपाईं एक्लै उभिने साहस गर्न सक्नुपर्छ । अर्को कुरा, जिन्दगी भनेको यात्रा हो, मानिसहरू आउँछन्, जान्छन् । सिंगो यात्रा त तपाईं एक्लैको साहसले गर्नुपर्छ । र सत्य यो हो कि सहयोग गर्नेका वरिपरि कोही हुँदैनन्, त्यो व्यक्ति आत्मनिर्भर बन्छ र जीवनको जस्तोसुकै मोडमा अगाडि बढिरहन सक्ने हिम्मत राख्छ ।

त्यस्तो नभएको भए मैले राम्रो गर्थे‍ं

यो वाक्य धेरै जनाको मुखबाट सुन्ने गरिन्छ । बहाना बनाउनेहरू यो वाक्यलाई आफ्नो मस्तिष्क र जिब्रोमै राखेर हिँड्छन्, निराश हुन्छन् । तर, जो दृढ संकल्पका साथ लागेका हुन्छन्, उनीहरूले त्यसलाई आफ्नो पाठ बनाउँछन्, आफूमा निखारता ल्याउनका लागि अवसर बनाउँछन् ।

काम सजिलो भएको भए हुनेथियो

उद्यमी, लेखक तथा प्रेरक वक्ताको रूपमा प्रसिद्ध जिमा रोमले भनेका छन्, काम सजिलो भएको भए हुने थियो नभन । मैले अझै जानेको भए हुने थियो भन । आफूलाई सजिलो लाग्ने काम मात्र गर्‍याे भने त्याे व्यक्तिले कहिल्यै पनि प्रगति गर्दैन । प्रगति गर्नका लागि व्यक्तिले आफूले आफूलाई चुनौती दिनुपर्छ ।

प्रकाशित मिति: आइतबार, पुस २०, २०७६ १७:०५