५९ सदस्यीय राष्ट्रिय सभामा कांग्रेस ६ सिटमा सीमित !

A+ A A-

प्रमुख प्रतिपक्षी दल नेपाली कांग्रेस संघीय संसदको माथिल्लो सदन राष्ट्रिय सभामा आगामी फागुनदेखि ६ सिटमा खुम्चने भएको छ ।

राष्ट्रिय सभाको २ वर्षे कार्यकाल समाप्त गर्ने १९ सदस्यमध्ये नेपाली कांग्रेसबाट प्रतिनिधित्व गर्ने सात सांसदको कार्यकाल आगामी २० फागुनबाट समाप्त हुँदैछ । ९ माघमा हुने निर्वाचनमा कांग्रेसले १८ मध्ये १६ सिटमा प्रतिस्पर्धा गर्दैछ ।

गत साता मात्रै सत्ताबाट बहिर्गमित दल समाजवादी पार्टीसँग प्रदेश–२ मा हुने चार सिटमध्ये २ सिटमा कांग्रेसले सहकार्य गर्ने निर्णय गरेको छ । समाजवादीसँग सहकार्य र गठबन्धन गरे पनि सत्तारुढ नेपाल कम्युनिस्ट पार्टी (नेकपा) सँग राष्ट्रिय जनता पार्टीले सहकार्य गरेको छ ।

सत्तारुढ नेकपा र राजपाको बहुमत रहेको प्रदेश–२ मा समेत कांग्रेसले आफ्नो पकड गुमाउने देखिएको छ ।

९ माघमा हुने निर्वाचनबाट सर्वाधिक फाइदा सत्तारुढ नेकपालाई हुने देखिन्छ । नौ जना सांसदको कार्यकाल सकिए पनि नेकपाले १९ मध्ये १७ सदस्य आफ्नो पोल्टामा पार्ने सम्भावना देखिन्छ ।

नेकपाले १८ मध्ये दुई सिटमा राजपाका उम्मेदवारलाई प्रदेश–२ मा समर्थन गरेको छ भने बाँकी १६ सिटमा एक्लैले जित्ने सम्भावना छ । एक सिटसमेत सत्तारुढ नेकपाको नेतृत्व रहेको मन्त्रिपरिषद्को सिफारिसमा राष्ट्रपतिबाट मनोनयन हुने संवैधानिक व्यवस्था छ ।

१ सय ८ स्थानीय तह रहेको प्रदेश २ मा नेकपाका स्थानीय तहका १ सय १५ र ७६ जना राजपाका मतदाता छन् ।

राष्ट्रियसभा सदस्यको निर्वाचनमा जिल्ला समन्वय समितिका पदाधिकारी र सदस्य, प्रदेश सभासद् र स्थानीय तहका प्रमुख र उपप्रमुख तथा अध्यक्ष र उपाध्यक्ष मतदाता हुने गर्छन् ।

कांग्रेसले गुमाउँदै गरेका सिट

प्रदेश–१ को महिला कोटामा उम्मेदवार भएकी इन्दु गौतम विजयी हुने सम्भावना छ । जबकि सो कोटामा कांग्रेसकी केन्द्रीय सदस्य तथा प्रमुख सचेतक सरिता प्रसाईं सांसदमा विजयी भएकी थिइन् ।

प्रदेश–२ को महिला कोटामा नेकपाकै तुलसा दाहालको पक्षमा पल्लाभारी हुने देखिएको छ । यहाँ यसअघि कांग्रेसबाट मुक्ता कुमारी यादव विजयी भएकी थिइन् ।

प्रदेश–३ को महिला कोटामा पूर्वशिक्षामन्त्री स्वर्गीय धनीराम पौडेलकी धर्मपत्नी गंगा बेलवासेको पल्लाभारी हुने देखिन्छ । जुन स्थानमा यसअघि कांग्रेसकी धनकुमारी खतिवडा विजयी भएकी थिइन् ।

गण्डकी प्रदेशबाट अन्य कोटाबाट उम्मेदवार बनेका नेकपा सचिवावलय सदस्य तथा प्रवक्ता नारायणकाजी श्रेष्ठ सांसद हुने सम्भावना छ । जुन कोटामा यसअघि कांग्रेसका सुरेन्द्रप्रसाद पाण्डे विजयी भएका थिए । पाण्डे राष्ट्रिय सभामा प्रतिपक्षी दल कांग्रेस संसदीय दलको नेता हुन् ।

यस्तै, नेकपाकी भगवती न्यौपाने महिला कोटाबाट नेकपाको तर्फबाट उम्मेदवारी दिएकी छन् । सो कोटाबाट यसअघि कांग्रेसकी विन्दादेवी आले राना सांसद भएकी थिइन् ।

प्रदेश–५ बाट अन्य कोटाबाट नेकपाले गोपाल भट्टराईलाई उम्मेदवार बनाएको छ । साे काेटामा उनी विजयी हुने निश्चित छ । जहाँ कांग्रेसका दुर्गाप्रसाद उपाध्याय यसअघि विजयी भएका थिए ।

सुदूरपश्चिम प्रदेशबाट यसअघिको निर्वाचनमा कांग्रेका केन्द्रीय सदस्य बद्रिप्रसाद पाण्डे अन्य पुरुष कोटामा विजयी भएका थिए । तर, यसपटक नेकपाले सोही कोटामा तारामान स्वाँरलाई उम्मेदवार बनाएको छ । यसमा पनि स्वाँर विजयी हुने सम्भावना छ ।

राष्ट्रिय सभामा कांग्रेसका हाल १३ सांसद रहेका छन् । संसदीय दलका नेता सुरेन्द्रप्रसाद पाण्डे, प्रमुख सचेतक सरिता प्रसाईंसहित सात जना सांसदको कार्यकाल यही फागुनमा समाप्त भएसँगै ५९ सदस्यीय राष्ट्रिय सभामा कांग्रेका ६ जना मात्र सदस्य रहने छन् ।

कांग्रेसका बाँकी ६ जना सांसदमध्ये राधेश्याम अधिकारी र तारादेवी भट्टको कार्यकाल पनि ४ वर्षे मात्र छ । दुई वर्षपछि कांग्रेसको माथिल्लो सदनमा ४ जनामा सीमित हुने सम्भावना रहेको छ ।

प्रदेश–२ मा उपेन्द्र यादव नेतृत्वको तत्कालीन संघीय समाजवादी फोरम (हाल समाजवादी) र राजपासँग गठबन्धन गरेर कांग्रेस, समाजवादी र राजपाका सबै आठ जना सर्वसम्मतले विजयी भएका थिए ।

दुई वर्षअघि भएको निर्वाचनमा प्रदेश २ मा गठबन्धन गरेका तीन दल कांग्रेस, राजापा र समाजवादीबीच फरक मोर्चाबन्दी भएपछि प्रदेश २ मा सत्तारुढ नेकपाले यो निर्वाचनमा खाता खोल्ने बलियाे सम्भावना देखिएकाे छ ।

प्रकाशित मिति: आइतबार, पुस २०, २०७६ १३:३७