'हामी परीक्षा दिइरहेका छौँ, उत्तीर्ण हुन्छौँ'

मिलन बुढाथोकी शुक्रबार, फागुन ८, २०८२

A+ A A-

राष्ट्रिय स्वतन्त्र पार्टी (रास्वपा) ले मोरङ–३ मा गणेश कार्कीलाई उम्मेदवार बनाएको छ । शिलापत्रकर्मी मिलन बुढाथोकीले उनकै निर्वाचन क्षेत्रमा पुगेर कुराकानी गरेका छन् । उक्त कुराकानीको सम्पादित अंश तल प्रस्तुत गरिएको छः

चुनावी घरदैलोमा जाँदा कस्तो खालको प्रतिक्रिया पाउनुभएको छ ?

सबै जना उत्साहित हुनुहुन्छ । नयाँपन खोजिरहेका थियौँ, 'तपाईं आउनुभयो' भन्नुभएको छ ।

लामो समय जरा गाडेर बसेका परम्परागत बलिया संगठन भएका शक्तिका उम्मेदवारहरूसँग तपाईं प्रतिस्पर्धा गर्दै हुनुहुन्छ ? कत्तिको चुनौती महसुस गर्नुभएको छ ?

उहाँहरू परम्परागत शक्ति त हो, संगठन पनि छ, तर त्यहाँ भएका राम्रा मान्छेहरू यसरी निचोरिएका छन् कि हाम्रा लागि सहयोगीका रूपमा काम गरिरहेका छन् । किनभने परिवर्तन त उहाँहरूलाई पनि आवश्यक छ । र, उहाँहरूलाई हामीले सहयोद्धाकै रूपमा लिएका छौँ । यो प्रतिस्पर्धा स्वस्थ हुन्छ । दलभित्रको पनि र राज्यभित्रका पनि पुराना विकृति फाल्ने अभियानका रूपमा यसलाई लिएका छौँ ।

यस क्षेत्रका समस्याहरू के–के रहेछन् ? तपाईंका प्राथमिकताहरू के–के एजेन्डा छन्, जसका कारण नागरिकले भोट हाल्नुपर्छ ?

यहाँका समस्याहरू मैले पनि भोगेँ, म यहीँको बासिन्दा हुँ । यहाँ भूमिसँग सम्बन्धित सुकुम्बासीका समस्या छन् । त्योचाहिँ कानुनी गैरकानुनीभन्दा पनि पाप धर्मको भइसक्यो । कोही नागरिकले ५० वर्षदेखि चर्चेको नागरिकको जमिन उसको स्वामित्वमा छैन । त्यो नागरिकप्रतिको हेला कुनै पनि लोकतान्त्रिक राज्यले कल्पना गरेभन्दा अर्कै किसिमको कुरा हो ।

मुलुकमा यस्तो कल्पना पनि गर्न सकिँदैन । त्यो हेलाका विरुद्धमा हामी उभिएका छौँ । त्यो सबैभन्दा पहिलो मुद्दा हो ।त्यसपछि यहाँका प्राकृतिक सम्पदा प्रयोग गर्ने कुरा छन् । स्वास्थ्य शिक्षाको सवलीकरण गर्ने कुरा छन् ।

नगर अस्पताल छ, त्यहाँ औषधि उपचार पर्याप्त छैन । त्यसमा काम गर्ने इच्छा छ । स्थानीय तहमा भएका कुरा राष्ट्रिय मुद्दा हुन् । यहाँ यो समस्या छ भनेर संसदमा बलियो आवाज उठाउँछु भन्ने छ ।

नयाँमा मेरा प्रतिस्पर्धी यी हुन सक्छन् र उहाँभन्दा उत्तम म हुँ भन्ने दाबी के छ ?

खासमा म उहाँहरूको प्रतिस्पर्धी नहुनुपर्ने हो । कुलमानजीलाई पार्टीमा ल्याउनुपर्छ भनेर रातदिन खट्ने म नै हुँ । त्यसपछि हर्कजीलाई पनि यहाँ आएको अवस्थामा बलियो हुन्छौँ भनेको थिएँ । श्रमलाई राजनीतिक मुद्दाकै रूपमा स्थापित गर्नुपर्छ भन्ने लाग्छ । तर, उहाँले राजनीतिक रूपमा उठाउनुभएको मुद्दा देशका लागि चाहिने कुरा हो । उहाँहरू आउनुपर्छ भन्ने कुरामा म व्यक्तिगत रूपमा आवाज उठाइरहेको मान्छे हुँ । उहाँहरूले प्रतिस्पर्धीभन्दा पनि सहयोद्धा ठान्नुहुन्छ होला भन्ने लाग्छ । यद्यपि यो चुनाव हो, त्यसमा हाम्रो स्वस्थ प्रतिस्पर्धा हुन्छ ।

अहिले नमिले पनि कुनै बेलामा पक्कै मिल्छौँ होला । मिल्ने ठाउँ बाँकी राखिराखि स्वस्थ प्रतिस्पर्धा गर्छौं ।

कतिपयले नयाँहरू अस्पष्ट छन्, उनीहरूको विचार के हो ? दृष्टिकोण के हो ? भोलि गएर के गर्ने भन्ने अन्योल पनि छ भन्नुहुन्छ ? यस्तो बुझाइ भएकाहरूलाई तपाईंको भनाइ के छ ?

कति त भ्रमहरू फैल्याइएका छन् । तिनिहरूबाट समस्या छ कि भन्ने प्रश्न छ । मुख्य कुरा हामी परीक्षा दिइरहेका छौँ । हामी उत्तीर्ण हुनुपर्नेछ । हामीलाई सर्लक्कै विश्वास गर्नेहरू कम हुनुहुन्छ होला । तर, शंकाको सुविधा दिएर एकपटक यिनीहरूलाई हेरौँ न त भन्ने हुनुहुन्छ होला । हामीलाई विश्वास छ, हामीले योपटक कामबाट, चरित्रबाट, नीतिबाट हामी त्यो परीक्षा उत्तीर्ण हुनेछौँ ।

अन्यभन्दा तपाईंको भूमिका पृथक्/भिन्न कसरी हुन्छ ?

नीतिमा टेकेर हामी काम गर्छौं । कुनै काम गर्दा नीतिले दिँदैन भने हामी त्यो नीति परिवर्तन गर्छौं । त्यही भएर हामीले एकदमै नहुने कुरा गरेर समय खेर फालेका छैनौँ । पहिले चक्लेट बाँडेजस्तो ललिपप देखाएर, सांसद हुने परिपाटी थियो । त्यो परिपाटी योपटकदेखि बन्द हुन्छ ।

अन्त्यमा आफ्ना क्षेत्रका मतदातालाई के भन्न चाहनुहुन्छ ?

राम्रो उम्मेदवार पाउनुभएको छ । म पनि यही ठाउँको हुँ । यही समस्या भोगेर बसेको हुँ । त्यसैले सबै मिलेर परिवर्तनमा एकै ठाउँमा उभिनुपर्छ । पार्टीभित्रका खराब पक्षलाई मिलेर परास्त गरौँ भन्न चाहन्छु ।