पोखरामा हवाई मार्गबाट ७ लाख ३३ हजार पर्यटक भित्रिए

A+ A A-

पर्यटकीय नगरी पोखरामा हवाई मार्गबाट आउने आन्तरिक तथा बाह्य पर्यटकको संख्यामा वृद्धि भएको छ । पोखरा विमानस्थलको तथ्यांकअनुसार विगतका वर्षमा भन्दा आर्थिक वर्ष २०७५/०७६ मा हवाई मार्ग हुँदै पोखरा भित्रिने आन्तरिक तथा बाह्य पर्यटको संख्यामा २० प्रतिशतले वृद्धि भएको हो ।

शान्ति प्रक्रियापछि सुरु भएको पर्यटन विकासमा हवाई मार्गबाट आउने पर्यटकको संख्यामा उल्लेख्य वृद्धि भएको नागरिक उड्डयन प्राधिकरण पोखराका प्रमुख भोलाप्रसाद गुरागाईंले बताए । ‘पहिले हवाई मार्गबाट बाह्य पर्यटक मात्रै आउँथे, तर अहिले आन्तरिक पर्यटकले पनि हवाई मार्ग प्रयोग गर्न थालेका छन् । पर्यटकीय क्षेत्रमा भएको पूर्वाधार विकासले पर्यकलाई आकर्षण गरेको हो’, उनले भने ।

हवाई मार्गबाट चालू आर्थिक वर्षको हालसम्म १ लाख २३ हजार पर्यटक भित्रिएका छन् । उनका अनुसार सन् २०१९ मा हवाई उडानमार्फत ७ लाख ३३ हजार १ सय २९ पर्यटक पोखरा आउजाउ गरेका थिए ।

सन् २०१९ मा काठमाडौं, भरतपुर, भैरहवा, मुस्ताङ र माउण्टेन फ्लाइट गरी ३ लाख ६५ हजार ९ सय ३५ जना पर्यटक पोखरा भित्रिएका थिए । त्यसैगरी पोखराबाट ३ लाख ६७ हजार १ सय ९४ पर्यटक बाहिरिएका छन् ।

अघिल्लो वर्ष सन् २०१८ मा हवाई उडानमार्फत पोखरा आउने र पोखराबाट बाहिर जानेको संख्या ६ लाख ९ हजार ९ सय ७५ रहेको थियो । हवाई उडानको संख्या भने गत वर्षको तुलनामा करिब ५ प्रतिशतले घटेको छ । अघिल्लो वर्ष पोखराबाट ४२ हजार ३ सय ५८ हवाई उडान भएको थियो । तर सन् २०१९ मा ४० हजार २ सय ५२ वटा हवाई उडान भएको छ ।

यती र बुद्धले धेरै सिट क्षमताका जहाज राखेसँगै हवाई उडान कम भए पनि पर्यटकको संख्यामा भने वृद्धि भएको हो । पोखराबाट काठमाडौं जाने पर्यटकहरूले करिब ४ देखि ५ हजार शुल्क तिर्नुपर्छ । सन् २०१८ को तुलनामा २०१९ मा हवाई उडानबाट पोखरा भित्रिने विदेशी पर्यटकको संख्यामा पनि वृद्धि भएको छ ।

पोखरा–विराटनगर सिधा उडान हुने

पोखरादेखि काठमाडौं, भैरहवा र भरतपुर सिधा हवाई उडान गर्दै आएको बुद्ध एयरले पोखरादेखि विराटनगरको उडान थप गर्ने भएको छ । बुद्ध एयरले आगामी २० माघ (फेब्रुअरी ३ तारिक) देखि पोखरा–विराटनगर र विराटनगर–पोखरा हवाई उडान सञ्चालन गर्ने तयारी थालिएको बुद्ध एयर पोखराका स्टेसन म्यानेजर गौतम बरालले बताए ।

‘पहिलो चरणमा सानो जहाजबाट पोखरा–विराटनगर सिधा हवाई उडान थाल्छौं,’ उनले भने, ‘यात्रुको मागअनुसार हवाई उडान संख्या र ठूलो सिट क्षमताका जहाज थप गर्छौं ।’ नेपाल भ्रमण वर्षलाई लक्षित गरी बुद्ध एयरले पर्यटन प्रवर्द्धन गर्नसमेत पोखरादेखि विराटनगरलाई सिधा हवाई सेवामा जोड्न लागिएको स्टेसन म्यानेजर बराल बताउँछन् । पोखरा–विराटनगरको हवाई शुल्क करिब ७ हजार लाग्ने उनले बताए ।

प्रकाशित मिति: आइतबार, पुस २०, २०७६ १०:४०