गृहकार्य नगरेको भन्दै विद्यार्थीमाथि कुटपिट

शिक्षको कुटाइबाट गम्भीर घाइते बनेका विद्यार्थी तौफिक धुनिया । तस्बिरः विकाश पराजुली

A+ A A-

गृहकार्य नगरेको भन्दै रुपन्देहीमा एक शिक्षकले विद्यार्थीमाथि मरणाशन्न कुटपिट गरेका छन् । शिक्षकको कुटाइबाट विद्यार्थी गम्भीर घाइते भएका छन् ।

रुपन्देहीको सम्मरमिाई गाउँपालिका वडा नम्बर ६ स्थित ज्ञानदिप बोर्डिङ स्कुलका विद्यार्थी तौफिक धुनियालाई शिक्षकले कुटेर गम्भीर घाइते भएका हुन् । गृहकार्य नगरेको भन्दै शिक्षक शैलेन्द्र बरइले कक्षा पाँचमा अध्ययनरत विद्यार्थी धुनियालाई कुुटपिट गरेका थिए ।

शिक्षकको कुटाइबाट गम्भीर बनेका धुनियाको आँखामा ठूलो चोट लागेको छ । विद्यार्थी कुुटपिट गर्ने शिक्षक बरई भने फरार छन् । बुधबार भएको उक्त घटना शनिबारमात्र सार्वजनक भएको हो । विद्यार्थी धुनियालाई कुटपिट गरेकै दिनदेखि एक हप्ताका लागि विद्यालय बन्द गरिएको छ ।

घाइते विद्यार्थीको भैरहवास्थित युनिर्भसल मेडिकल कलेजमा उपचार भइरहेको छ । इलाका प्रहरी कार्यालय मर्चवारका प्रमुख प्रहरी निरीक्षक पोषणराज ढकालले विद्यार्थी कुट्ने शिक्षकको खोजी भइरहेको जानकारी दिए ।

अभिभावकले भने यसरी मरणाशन्न हुनेगरी विद्यार्थीमाथि कुटपिट गर्ने शिक्षकलाई तुरुन्त कारबाही गर्न माग गरेका छन् । शिक्षा नियमावली अनुसार कक्षामा शिक्षक उपस्थित हुँदा विद्यार्थी कुट्न त के छडी लिएर जान पनि पाइँदैन ।

सम्झाई बुझाई गर्नुपर्ने ठाउँमै उल्टै मरणाशन्न हुनेगरी कुटपिट गरिएको घटनाप्रति स्थानीय अभिभावकले आपत्ती जनाएका छन् । संस्थागत विद्यालयमा गुणस्तरीय शिक्षा दिने नाउँमा जबरजस्ती कुटपिट गर्ने तथा धम्क्याएर पढाउने प्रवृति अन्त्य गर्न अभिभावकले माग गरेका छन् ।

प्रकाशित मिति: आइतबार, पुस २०, २०७६ ०८:३०