कांग्रेस विवादः संस्थापनइतरले डाक्याे समानान्तर केन्द्रीय समिति बैठक

A+ A A-

नेपाली कांग्रेसका शीर्ष नेताबीच चर्किदै गरेको बिबाद समानान्तर गतिविधिमा परिणत हुन थालेका छन् ।

पार्टी सभापति शेरबहादुर देउवाले ११ पुसमा केन्द्रीय कार्यसमिति बैठकमार्फत पार्टी विधान संशोधन गर्ने एकलौटी निर्णय गरेको भन्दै असन्तुष्ट नेताहरुले सो निर्णय उल्ट्याउन माग गर्दै आएका छन् ।

असन्तुष्ट नेताहरु रामचन्द्र पौडेल, कृष्णप्रसाद सिटौला, प्रकाशमान सिंह, महामन्त्री डा.शशांक कोइराला लगायतले आफूहरु सहभागी नभएको बैठकमा एकलौटी ढंगले निर्णय गरेको भन्दै सभापति देउवाले बोलाएको भेला र छलफलमा समेत नजाने अडान लिएका छन् ।

पार्टी सभापति शेरबहादुर देउवाले बुधबार आफ्नै निवास बुढानीलकण्ठमा बोलाएको पदाधिकारी छलफलमा समेत असन्तुष्ट नेताहरु सहभागी भएनन् ।

असन्तुष्ट नेताहरु आफूले बोलाएको अनौपचारिक छलफलमा सहभागी नभएपछि सभापति देउवाले आज दिउँसो १ बजे आफू निकटका केन्द्रीय सदस्यहरुको भेला बोलाएका छन् ।

सभापति देउवाले दिउँसो एक बजे पार्टी केन्द्रीय कार्यालय सानेपामा केन्द्रीय सदस्यहरुको बैठक बोलाइरहँदा पार्टी महामन्त्री डा.शशांक कोइरालाले भने आफूसहित पौडेल पक्षधर असन्तुष्ट केन्द्रीय सदस्यहरुको भेला बोलाएका छन् ।

असन्तुष्ट समूहले आफूहरुलाई पेलेर जाने सभापति देउवाका कदमलाई कसरी रोक्ने भन्ने विषयमा छलफल गर्न र सुझाव लिन २१ पुसमा जिल्ला सभापतिहरुको भेला बोलाएको छ ।

करिब ५० जिल्ला सभापतिहरु असन्तुष्ट पक्षधर रहेका छन् । २१ पुसमा आयोजना गरिएको जिल्ला सभापति भेला पार्टी केन्द्रीय कार्यालय सानेपापमा बोलाइएको पौडेल पक्षधर नेता हृदयराम थानीले बताए ।

असन्तुष्ट पक्षधर नेताहरुले पार्टीको विधानका विभिन्न धारा निलम्बन गरी क्रियाशिल सदस्यता वितरण र नविकरणको व्यवस्था संशोधन गरेको, महाधिवेशन भएको दुई महिना भित्र गठन गर्नु पर्ने विभाग गठन गरी केन्द्रीय विभागको संख्या २८ बाट बढाएर ४७ बनाएको भन्दै बिरोध जनाएका छन् ।

असन्तुष्ट नेताहरुले महाधिवेशनको कार्यतालिका एकलौटी ढंगले बनाएको, भ्रातृ संगठनको म्याद थप्ने र अन्य विषयमा एकलौटी निर्णय गरी विधान र पार्टीको परम्परालाई तोडेको भन्दै ११ पुसमा भएका निर्णय खारेज नभएसम्म देउवाले बोलाएका सबै बैठकहरु बहिस्कार गर्ने जनाएका छन् ।

सभापति देउवाले केन्द्रीय कार्यसमितिको ११ पुसको निर्णय फिर्ता नलिएमा असन्तुष्ट पक्षले संघीय संसदका सांसद केन्द्रीय सदस्य, जिल्ला सभापति र महाधिवेशन प्रतिनिधिहरुको समेत भेला बोलाएर देउवाबिरुद्ध मोर्चाबन्दी गर्ने निष्कर्ष निकालेका छन् ।

प्रकाशित मिति: बिहीबार, पुस १७, २०७६ १२:२७