सडक खाना महोत्सवमा ६ करोड बढीको कारोबार

A+ A A-

बुटवलमा आयोजित दोस्रोे सडक खाना महोत्सवमा ६ करोडभन्दा बढीको कारोबार भएको छ । तीन दिन चलेको महोत्सव २ लाख ५० हजारभन्दा बढी दर्शकले अवलोकन गरेका छन् ।

होटल तथा रेस्टुरेन्ट व्यावसायी संघ रुपन्देहीले आयोजना गरेको महोत्सवको पहिलो दिन ५० हजार दर्शकले अवलोकन गर्दा ८० लाखको कारोबार भएको संघका कोषाध्यक्ष टंकप्रसाद पराजुलीले जानकारी दिए ।

यस्तै, दोस्रो दिन उपस्थित १ लाख खानाका पारखीले २ करोड पचास लाखभन्दा बढीको कारोबार गरेको संघका महासचिव माधवकुमार खनालले बताए । तेस्रो तथा अन्तिम दिन बुधबार पनि १ लाखको हाराहारीमा महोत्सव हेर्न आएका अवलोकनकर्ताले ३ करोडको कारोबार गर्ने अपेक्षा रहेको महोत्सव प्रचारप्रसार समितिका संयोजक बावुराम गौतमले बताए ।

नेपाल सरकारको भिजिट नेपाल २०२० तथा प्रदेश ५ सरकारद्वारा सञ्चालित लुम्बिनी भ्रमण वर्ष २०७६ को प्रवद्र्धन गर्ने उद्देश्यले सडक खाना महोत्सव आयोजना गरिएको संघका अध्यक्ष तथा कार्यक्रम संयोजक समुन्द्र जीसीले बताए ।

अपेक्षाभन्दा धेरै अवलोकनकर्ताको उपस्थितिले महोत्सव सोचेभन्दा सफल भएको उल्लेख गर्दै अध्यक्ष जीसीले महोत्सव सफल बनाउन सहयोग गर्ने सबैलाई धन्यवाद व्यक्त गरेका छन् ।

महोत्सवमा जातीगत रुपमा थारु, मगर, थकाली, गुरुङ, क्षेत्री, नेवार समुदायका खानाका परिकाहरु सडकमै पकाएर खुवाइएको थियो । सडकमै विभिन्न जातजाती तथा समुदायका मौलिक पकवान पकाउँदा बुटवलको रौनक नै पृथक बनेको थियो ।

सडक खाना महोत्सवमा नेपाली जातीगत खाना बाहेक इन्डियन चाइनिज, जापानिज, इटालियन, थाई खानालगायत विभिन्न प्रकारका ६० भन्दा बढी परिकार राखिएको थियोे ।

महोत्सवका लागी सडकलाई दुलहीझैं सिँगारिएकाले बुटवलको माहोल निकै मनमोहक भएको अवलोकनकर्ताहरुले बताएका छन् ।

अतिथि देवो भवः, पर्यटकको स्वागत–सत्कार हाम्रो सान, पर्यटन प्रवद्र्धन र विकास हाम्रो अभियान, सडकमै खाऔं, सडकमै नाचौं, सडकमै रमाऔं भन्ने नाराका साथ सञ्चालित महोत्सवमा १ सय २५ वटा स्टल रहेका थिए ।

वडा नं. ९ कालिकापथको तीनकुनेदेखि शिवालय चोकसम्मको सडकको दायाँबायाँ सडक खानाका आकर्षक स्टलले सजाइएको थियो । महोत्सवमा खानाका साथै राष्ट्रिय तथा स्थानीय कलाकारको सांस्कृतिक प्रस्तुती पनि रहेको थियो ।

प्रकाशित मिति: बुधबार, पुस १६, २०७६ १७:४३