झापा–२ का उम्मेदवारलाई गाउँ प्रवेशमा रोक

अर्जुन राजवंशी सोमबार, माघ १२, २०८२

A+ A A-

झापा–२ नम्बर क्षेत्रका उम्मेदवारलाई बिर्तामोड बसपार्कका स्थानीयबासिन्दाले गाउँ प्रवेशमा रोक लगाएका छन् । आफूहरूको समस्या समाधानमा ठोस पहल नगरेको आरोप लगाउँदै स्थानीयले झापा–२ बाट उम्मेदवार बनेका सबै पार्टीका उम्मेदवारलाई गाउँ प्रवेशमा रोक लगाएका हुन् ।

उनीहरूले अर्जुनधारा नगरपालिका–११ र बिर्तामोड नगरपालिका–५ स्थित ५१ बिघा क्षेत्रफलमा रहेको बिर्तामोड बसपार्क क्षेत्रमा आगामी चुनाव केन्द्रित सबैखाले गतिविधि गर्न रोक लगाएको सार्वजनिक कार्यक्रम गरेरै उद्घोष गरेका हुन् । ‘आजैदेखि बिर्तामोड बसपार्कको ५१ बिघा क्षेत्रफलभित्र सबै राजनीतिक दलका सबैखाले चुनावी गतिविधि गर्न रोक लगाएका हौँ’, बसपार्क समन्वय समिति संयोजक सुजन सिवाकोटीले भने, ‘हाम्रो समस्या जबसम्म समाधान हुँदैन, तबसम्म हामी हाम्रो गाउँमा कुनै राजनीतिक गतिविधि गर्न दिँदैनौँ ।’

उनीहरूले ‘निर्वाचन गतिविधि निषेधित क्षेत्र’ लेखिएको ब्यानरसमेत लगाएका छन् । ‘हामी चुनाव विरोध होइनौँ । तर, हाम्रो समस्या समाधान नभएसम्मका लागि उम्मेदवार वा राजनीतिक दललाई यहाँ कुनै कार्यक्रम गर्न दिँदैनौँ’ समन्वय समितिका सचिव हरि भण्डारीले भने । बिर्तामोड बसपार्क रहेको ५१ बिघा क्षेत्रफलमा एक हजार एक सय ५३ वटा कित्ता छन् । ती घडेरीमा ६ सयभन्दा बढी पक्की घरहरू बनेको समन्वय समितिका कार्यालय सचिव सुदीप दंगालले जानकारी दिए । आम भेलामार्फत गाउँमा चुनावी गतिविधि निषेध गरेको उनले बताए ।

बिर्तामोड बसपार्कको ५१ बिघा जग्गामा तीन दशकअघि गिरीबन्धु टी इस्टेटअन्तर्गत चिया बगान थियो । पूर्वपश्चिम राजमार्गसँग जोडिएको तथा पूर्वकै व्यापारिक केन्द्रको रुपमा बिर्तामोड बजार विकास भएपछि चिया बगान अन्यत्र स्थानान्तर गरेर उक्त ५१ बिघा क्षेत्रफललाई व्यवसायिक प्लटिङ गरिएको थियो ।

२०६२ सालदेखि घडेरीका रूपमा बिक्री थालिएको उक्त क्षेत्रफल अहिले पूर्ण रूपमा व्यावसायिक तथा आवासीय क्षेत्रको रूपमा परिणत भएको छ । बिर्तामोड र अर्जुनधारा नगरपालिकामा हाल चिया बगान रहेको गिरीबन्धु टी इस्टेटको ३ सय ४३ बिघा क्षेत्रफल तीन दशकअघि स्थानान्तर गरेको ५१ बिघाजस्तै स्थानान्तर गर्न पाउनुपर्ने सञ्चालकहरूको माग र उक्त माग कार्यान्वयन गर्न नहुने भन्दै परेको रिटमा सर्वोच्च अदालतले दुई वर्षअघि फैसला सुनाएको थियो ।

सर्वोच्च अदालतको संवैधानिक इजलासको फैसलापछि जिल्ला मालपोत कार्यालय झापाले बसपार्क क्षेत्रको एक हजार एक सय ५३ कित्ताको कारोबार रोक्का राखेको छ । व्यावसायिक तथा आवासीय घडेरी नै रोक्का भएपछि बसपार्क क्षेत्रका बासिन्दा समस्यामा परेका हुन् ।

उनीहरूले उक्त समस्या समाधानका लागि दुई वर्षयता तत्कालीन प्रधानमन्त्री केपी शर्मा ओली, सभामुख देवराज घिमिरे, उपसभामुख इन्दिरा रानामगर, भूमि सुधार मन्त्री बलराम अधिकारी, राप्रपा अध्यक्ष राजेन्द्र लिङदेन, कांग्रेसका गगन थापा, विश्वप्रकाश शर्मालगायतलाई भेटर लिखित ध्यानाकर्षण गराएका थिए ।

जिल्ला मालपोत कार्यालय, बिर्तामोड र अर्जुनधारा नगरपालिकाका मेयरलगायतका जनप्रतिनिधिसँग पनि पटकपटक छलफल गरेका थिए । तर, कतैबाट सुनुवाई नभएपछि चुनावको मुखमा निर्णायक आन्दोलनमा उत्रिनुपरेको दंगालले बताए । उनीहरूले बसपार्क क्षेत्रको चारै दिशामा ठूल्ठूला ब्यानर राखेर उम्मेदवार तथा राजनीतिक दललाई बसपार्क क्षेत्रमा निषेध गरेका हुन् ।

प्रकाशित मिति: सोमबार, माघ १२, २०८२ २१:४१

अर्जुन राजवंशी

प्रतिक्रिया दिनुहोस्