डा. देवकोटाकी छोरीका अपहरणकारी, पूर्वसभामुख, सांसद र पूर्वआईजीका नाइके

A+ A A-

काठमाडौंको डिल्लीबजार कारागारभित्र हाल छ जना भीआईपी कैदी छन् ।

पूर्वसभामुख कृष्णबहादुर महरा, सांसद रेशमलाल चौधरी, पूर्वप्रहरी प्रमुख प्रहरी महानिरीक्षक (आईजीपी) रमेशचन्द ठकुरी, सशस्त्र प्रहरी बलका पूर्वप्रहरी नायव महानिरीक्षक (डीआईजी) रञ्जन कोइराला, पूर्वसांसद डीबी कार्की कारागारका भीआईपी कैदी हुन् ।

यीबाहेक डिल्लीबजार कारागारभित्र ९ सय जना कैदी–बन्दी छन् ।

यस्ता भीआईपी कैदीका मुख्य नाइके र सहनाइके कस्ता होलान् भन्ने जिज्ञासा सबैमा छ । भीआईपी कैदीको उठबस र खानपानमा हैकम जमाउनेका नाइके भने डा. उपेन्द्र देवकोटाकी छोरी मेघाको अपहरणकारी छन् ।

अपहरणकारी ती हुन् जसले सोही जेलमा रहेका प्रहरी महानिरीक्षक (आईजीपी) रमेशचन्द ठकुरीकै पालामा डा. उपेन्द्र देवकोटाकी छोरी मेघाको अपहरण गरेका थिए ।

कारागारभित्र निराश महराः क्यारिमबाेर्ड खेल्दैनन्, लुडाे पनि छुँदैनन्

मुख्य नाइके गोकुल गिरी काभ्रेका हुन् भने रूपन्देहीका राजु थापा सहनाइके हुन् । कारागाभित्रका कैदीहरूलाई अनुशासनमा राख्नेदेखि आफन्त आउँदा भेटघाटको सयम तालिका मिलाइदिनेसम्मका काम गर्छन् नाइके र सहनाइकेले ।

कारागारका एक कैदीका अनुसार कारागारभित्रका सबै कैदीहरूका आफन्तहरूले भेट्न आउँदा कारागारका मुख्य नाइके गिरी र सहनाइके थापाले समय तालिका मिलाएर भेटाउने गर्दै आएका छन् ।

कारागारभित्र सबै कैदीको हैसियत नाइकेभन्दा मुनि हुनेहुँदा बाहिर जस्तै भीआईपी भए पनि कारागारभित्र कैदीहरूको अनुशासनदेखि उनीहरूका आफन्तलाई भेटाउने जिम्मा कारागार प्रशासनले मुख्य नाइके र नाइकेलाई दिएको हुन्छ ।

महरालगायतका भीआईपी कैदीका समय तालिकासमेत गिरी र थापाले नै मिलाउने गरेको कारागार प्रशासनको भनाइ छ ।

डा. देवकोटाकी छोरी मेघाको अपहरणको अभियोगमा गोकुल गिरी, राजु थापासहित छ जना पक्राउ परेका थिए । अपहरणको पाँच वर्षपछि गिरी र थापा ३ वर्षपछि पक्राउ परेका थिए ।

थापालाई उच्च अदालत पाटनले १२ वैशाख, २०७५ मा १७ वर्ष कैद र २६ लाख २३ हजार ५ सय १९ रुपैयाँ जरिमाना गर्नेे फैसला गरेको छ ।

जिल्ला अदालत काठमाडौंले ३१ असार, २०७१ मा थापालाई ११ वर्ष कैद र १ लाख ७५ हजार जरिमानाको फैसला गरेको थियो ।

सो फैसला उल्ट्याउँदै उच्च अदालत पाटनले १७ वर्ष कैद र २६ लाख २३ हजार ५ सय १९ रुपैयाँ जरिमाना गरेको हो ।

अदालतले अपहरण अभियोगमा ११ वर्ष र डाकातर्फको अभियोगमा थप ६ वर्ष कैद गरेर १७ वर्ष तोकेको हो ।

गोकुल गिरी, सिद्धार्थ लामा, राजु लामा, हेमन्त भन्ने हेमबहादुर थापामगर र कृष्ण राईलाई भने ११–११ वर्ष कैद र जनही २४ लाख ४८ हजार जरिमाना फैसला भएको थियो ।