सभामुख को ? ओली भन्छन्– नेम्वाङ, दाहाल मौन

A+ A A-

प्रतिनिधिसभाको रिक्त सभामुख पद चयन हुन नसक्दा ४ पुसदेखि संघीय संसदको पाँचौं अधिवेशन सुरु भए पनि प्रतिनिधिसभाको बैठक दुई साताका लागि स्थगित हुन पुगेको छ ।

संविधानअनुसार सभामुख पद रिक्त भएमा प्रतिनिधिसभाको बैठकको पहिलो एजेण्डा नै सभामुख निर्वाचन हुनुपर्छ । सभामुख चयनका लागि बहुमत सदस्य रहेको सत्तारुढ दल नेकपाभित्र सभामुख चयनका लागि उम्मेदवार कसलाई बनाउने भन्ने विषयमा आमसहमति हुन नसक्दा प्रतिनिधिसभाको बैठक बस्न सकेको छैन ।

प्रतिनिधिसभाको पहिलो बैठक ४ पुसमा बसेर राष्ट्रपति कार्यालयबाट आएको पत्र पढेर सुनाउने र ३ असोजपछि निधन भएका संघीय संसद, संविधानसभा, प्रतिनिधिसभा र राष्ट्रिय सभाका पूर्वसांसदको निधनमा समवेदना प्रकट गर्ने प्रस्ताव पारित गरेर स्थगित भएको छ ।

सत्तारुढ दल नेकपाले सभामुखको उम्मेदवार चयन गर्न नसकेपछि ११ पुसका लागि बोलाइएको प्रतिनिधिसभाको बैठकसमेत उपसभामुख डा. शिवमाया तुम्बाहाम्फेले स्थगित गरेकी थिइन् । प्रतिनिभिसभाको अर्को बैठक १६ पुसमा बस्दै छ ।

सभामुख बन्न संविधानसभाका पूर्वसभामुख सुभासचन्द्र नेम्वाङ, हालकी उपसभामुख डा. तुम्वाहाम्फे र पूर्वमन्त्री तथा नेकपा सांसद अग्निप्रसाद सापकोटाले आकांक्षा देखाएका थिए । उपसभामुख तुम्बाहाम्फेलाई सभामुख बनाउन राष्ट्रपति विद्यादेवी भण्डारीले लविङ गरिरहेकी छन् ।

नेम्वाङलाई सभामुख बनाउन प्रधानमन्त्री केपी शर्मा ओली र नेकपाका अर्का अध्यक्ष पुष्पकमल दाहाल (प्रचण्ड) सहमत भइसकेका छन् । तर, तत्कालीन नेकपा माओवादी केन्द्रका नेताहरूले अग्नि सापकोटा या सो खेमाकै अर्का कोही नेतालाई सभामुखमा अघि सार्न दबाब दिएपछि दाहालसमेत अलमलमा परेको नेताहरूको दाबी छ ।

प्रधानमन्त्री तथा पार्टी अध्यक्ष ओलीको नेम्वाङलाई नै सभामुख बनाउनुपर्ने अडान, राष्ट्रपति विद्यादेवी भण्डारी र को तुम्बाहाम्फेलाई नै अघि सार्नुपर्ने दबाब र केही महिला सांसदहरूकाे महिला नै सभामुख बन्नुपर्ने तीव्र लविङका कारण सभामुखमा कसलाई अघि सार्ने भन्ने निर्णय हुन नसकेको हो ।

राष्ट्रपति भण्डारीले संविधानको भावना र मर्मअनुसार संघीय र प्रदेशसभाका कुनै पनि सदनमा महिला सभामुख नभएको भन्दै हालकी उपसभामुख तुम्बाहाम्फेलाई सभामुख बनाउन नेकपा अध्यक्षद्वय ओली र दाहाललाई दबाब दिइरहेको नेकपाकै नेताहरू बताउँछन् ।

दुई अध्यक्षबीच पूर्वसभामुख नेम्वाङलाई सभामुख बनाउने सहमति गत सोमबारकै छलफलमा जुटेको छ । तर, राष्ट्रपति भण्डारीकै जस्ताे माग राख्दै पूर्वमाओवादी नेतृ तथा सांसद पम्फा भुसाल, मजदुर नेतृ तथा सांसद बिन्दा पाण्डेलगायतले महिलालाई नै सभामुख बनाउन दबाब दिँदै आएका छन् ।

उता अध्यक्ष दाहाललाई पनि नेकपाकाभित्रका पूर्वमाओवादी सांसदले आफूहरूको कोटामा पर्ने सभामुख पद नछाड्न दबाब दिइरहेका छन् । आफ्ना पूर्वसहकर्मीको दबाबका कारण मुख खोल्न नसकेका दाहाल सभामुखका लागि नाम प्रस्ताव गर्न सकिरहेका छैनन् ।

सभामुखका आकांक्षीद्वय सापकोटा र तुम्बाहाम्फेलाई आगामी दिनमा पुनर्गठन हुने मन्त्रिपरिषदमा समायोजन वा अवसर दिने गरी नेम्वाङलाई सभामुख बनाउने सहमति अध्यक्षद्वय ओली र दाहालबीच भइसकेको बालुवाटार स्राेतले जनाएको छ ।

तीन दिनसम्म कुनै पनि हालतमा उपसभामुखबाट राजीनामा नदिने अडान राख्दै आएकी उपसभामुख तुम्वाहाम्फे सभामुखको उम्मेदवारको विषयमा सत्तारुढ दलभित्र सहमति हुनासाथ राजीनामा दिने पक्षमा छिन् ।

राष्ट्रपति भण्डारीलाई नचिढ्याउन र अर्का अध्यक्ष दाहाललाई समेत चित्त बुझाउने उपयुक्त उपायको खोजी गरिरहेका प्रधानमन्त्री तथा अध्यक्ष ओलीले सोमबारसम्म पनि सभामुखको उम्मेदवार को हुने भनेर घोषणा गरेका छैनन् ।

प्रकाशित मिति: सोमबार, पुस १४, २०७६ १४:५१