बुटवलमा बन्दै छ मिनी फेवाताल

A+ A A-

बुटवल उपमहानगरपालिकाले नगर गौरवको आयोजनाको रूपमा बुटवल–१६ मा रहेको नरेश्वर बोलबम धाम नरेनापुरसँग जोडेर बैठौली कपरकट्टी सिमसार क्षेत्रलाई पर्यटकीय गन्तव्यको रूपमा विकास गर्दैछ ।

प्रारम्भिक चरणमा उपमहानगरले सिमसार क्षेत्रलाई मिनी फेवातालको रूपमा विकास गर्ने गरी काम गरिरहेकोे छ । झण्डै ३५ विगाहा क्षेत्रफलमा फैलिएको ताल क्षेत्रलार्ई ३ वर्षभित्र सम्पन्न गर्ने लक्ष्य उपमहानगरको छ ।

गत आर्थिक वर्षदेखि उपमहानगरले ताल संरक्षणका लागि ४० लाख बजेट छुट्याएसँगै सिमसार क्षेत्रको संरक्षण गरी तालको रूपमा विकास गरिएको हो । यस आर्थिक वर्षमा प्रदेश सरकारको ५० लाख र उपमहानगरपालिकाको ५५ लाख गरी १ करोड ५ लाख रुपैयाँको बजेट विनियोजन भएको छ ।

१६ नम्बर वडामा नरेश्वर बोलबम धाम, नरेनापुर छ । धामसँगै जोडेर तालको गुरुयोजनासमेत निर्माण भएको छ । नील दहका नामले चिनिने झण्डै सय वर्ष पुरानो भए पनि राज्यका सम्बन्धित निकायको उचित ध्यान नपुगेको यो ताललाई उपमहानगरपालिकाले अमूल्य सम्पदा मानेर प्राथमिकताका साथ संरक्षण एवं पर्यटकीय विकासका लागि गुरुयोजना बनाएर कामको प्रारम्भ गरिएको बुटवल उपमहानगरपालिकाका नगरप्रमुख शिवराज सुवेदीले बताए ।

बहुवर्षीय आयोजनाको रूपमा रूपमा रहेको मिनी फेवा ताल नगर गोरवको आयोजनाअन्तर्गत काम भइरहेको उनको भनाइ छ । तालसँगै यसै आर्थिक वर्षभित्र सम्पन्न गर्ने गरी ६ विगाह क्षेत्रफलमा पिकनिक स्पट निर्माणको कामसमेत अगाडि बढेको छ ।

ताल आसपासका थारु वस्तीहरूमा होमस्टेको विकाससमेत गरिने गरी उपमहानगरपालिकाले योजना बनाएको छ । लुम्बिनी क्षेत्र र अशोक स्तम्भसम्म देख्न सक्ने गरी १ सय ८ फिटको भ्यू टावर निर्माण पनि सोही क्षेत्रमा गरिँदैछ । टावरको छुट्टै डीपीआर बनेको छ । १७ करोडको भ्यू टावर निर्माणका लागि उपमहानगरले केन्द्र र प्रदेश सरकार सहयोग मागिरहेको छ ।

ताल विकासले गति लिँदै गर्दा स्थानीयवासी उत्साहित बनेका छन् । ‘अब यस क्षेत्रले मुहार फेर्ने आशा हामीले गरेका छौं,’ स्थानीय कविर शर्माले भने ।

१.५ किलोमिटर लम्बाइको तालमा पूर्ण रूपमा परिक्रमा गर्दा ३ किलोमिटरको बोटिङ गर्न पाइनेछ । ताल थप विस्तार गर्नसँगै जोडिएको सरकारी जग्गालाई प्रयोग गरेर फराकिलो बनाइनेछ ।

हाल स्थानीय जातका माछा पाइने तालमा विभिन्न जातका चराचुरुङ्गी त्यहाँ देख्न पाइन्छ । तालको एक भागलाई फिसिङ पोइन्टको रूपमा विकास गरिनेछ ।

ताल क्षेत्रमा फूलबारी निर्माण

उपमहानगरको मुख्य बजार क्षेत्रमा बढी कोलाहाल र भीडाभाड छ । नगरवासीहरूलाई निरन्तरको काम, थकाइ र तनावमुक्त गराउने गन्तव्यको रूपमा यस ताल क्षेत्रलाई अत्याधुनिक तालजन्य फूलबारी निर्माण गरिनेछ ।

तालवरिपरि मर्निङ वाक गर्ने र साइकल यात्रीका लागि ६ फुटको फुटपाथ निर्माण हुनेछ । तालको वरिपरि थप सौन्दर्य बनाउनका लागि सोलार पम्पमार्फत पानीका फोहोरा बन्नेछन् ।

केन्द्र सरकारले ३२ विगाह क्षेत्रफलमा अत्याधुनिक कृषि मार्केट निर्माण गर्दैछ । तालको पानी सिँचाइमा समेत प्रयोग गरिएको छ । नरेश्वर बोलबम धामदेखि तालसम्म मोनोरेलको निर्माण गर्ने योजना छ ।

उपमहानगरपालिकाले धार्मिक, कृषि तथा जल पर्यटनको विकास गर्ने बताएको छ । यो ताललाई भविष्यमा आन्तरिक र बाह्य पर्यटकको आकर्षणको थलो बनाउँदै बुटवलको जितगढी किल्ला, नुवाकोट, सिद्धबाबा र हिलपार्कसँग जोडेर पर्यटकको बसाइ लम्बाउन सकिने उपमहानगरपालिकाको योजना छ । ताल परिसरमा वन हाँस, वन कुखुरा, सिम कुखुरा र जलेवाजस्ता चराचुरुङ्गीसमेत पाइन्छन् ।

प्रकाशित मिति: सोमबार, पुस १४, २०७६ १२:१६