लेखनाथ महोत्सवमा ठूलो दुर्घटनाबाट जाेगिए १६ बालबालिका

A+ A A-

धेरै दिनको अन्तरालपछि पोखरामा बिहानै घाम लाग्यो । अरु बेलाभन्दा दिन अलि न्यानो थियाे । लेखनाथ महोत्सव पनि चलिरहेको छ, त्यसमाथि शनिबार ।

यही मौकामा छाेराछाेरी लिएर धेरै मान्छे महोत्सवमा पुगेका थिए, घुम्ने, किनमेल गर्ने, छाेराछाेरीलाई रमाइलाे गराउने उद्देश्यले । मेलामा कोही किनमेलमा व्यस्त थिए त कोही लोकदोहाेरीमा झुम्मिएका थिए ।

बालबालिका र किशोरकिशोरीहरू चाहिँ पिङमा मच्चिएर झड्का मारिरहेका थिए ।

झड्का मारिरहेको बेला अचानक पिङ रोकियो । पिङ रोकिएपछि बच्चाहरू माथि नै अड्किए । महोत्सवमा भागदौड मच्चियो, रुवाबासी चल्यो ।

पिङमा अड्किएका बच्चाको तलतिर ठूलो भीड जम्मा भयो । पिङमा चढेका १६ बालबालिका २० मिनेटसम्म अड्किए ।

लेखनाथको तालचोक डाँडाको नाकमा चलिरहेको १६औं संस्करणको लेखनाथ महोत्सवमा शनिबार बाल उद्यानतर्फ १६ जना चढेको पिङ झण्डै २० मिनेटसम्म अड्किएको हो । पछि पिङलाई डोरीको सहायताबाट तल झारेर बालबालिकाको उद्धार गरियो ।

उद्धारपछि स्वास्थ्यमा समस्या देखिएका १० जनालाई उपचारका लागि लेखनाथको बूढी बजारस्थित लेखनाथ सिटी अस्पताल र सामुदायिक लायन्स अस्पतालमा उपचार गरिएको छ ।

तीमध्ये अस्मिता क्षेत्री र शिक्षा अधिकारीको उपचार भइरहेको छ भने अन्य उपचारपछि घर फर्किएका छन् ।

कविता आले, अनिता तिमल्सिना, सन्तोषी तिमल्सिना, प्रकाश पौडेल, सञ्जीव मरासिनी, सुस्मिता श्रेष्ठ, सञ्जीव श्रेष्ठ र गोविन्द श्रेष्ठ सामान्य उपचारपछि घर फर्किएका हुन् ।

झण्डै ३० फिटको उचाइमा १६ जना चढेको पिङ अड्किँदा केही समय तनाव भएको थियो ।

पिङ हाइड्रोलिकको समस्याले माथि अड्किएको हुन सक्ने र यस बिषयमा बाल उद्यान संचालकसँग बुझ्ने काम भइहेको उद्योग वाणिज्य संघका अध्यक्ष बलराम ढकालले जानकारी दिए । बिग्रिएको पिङ अहिले बन्द गरिएको छ ।

महोत्सव स्थलमा जोखिम व्यवस्थापनको तयारी नपुगेको भन्दै केहीबेर दर्शकहरूले बाल उद्यान क्षेत्रमा आक्रोश समेत पोखेका थिए ।

पिङमा रहेका पोखरा २९ का प्रकाश पौडेलले ठूलो दुर्घटना टरेको बताए ।

बाल उद्यान, स्टेज तथा स्टलसहितका स्थानमा थप सावधानी अपनाउन र तुरुन्त रेस्क्यू हुने गरी टिम तयारी अवस्थामा राख्न दर्शकहरूले आयोजकलाई सुझाव दिएका छन् ।

प्रकाशित मिति: शनिबार, पुस १२, २०७६ १८:०९