व्यवसायमा नयाँ सोचः पढ्दै खानुहोस्, खाँदै पढनुहोस्

A+ A A-

चिया नपिउने मानिस सायदै होलान् । चिया पिउने संस्कृतिको विकास यसरी भइरह्यो कि चियामा पनि विभिन्न ब्राण्ड बन्न थाले । परम्परागत चिया हुँदै अहिले विभिन्न ब्राण्डका चिया बजारमा पाइन थाले ।

त्यही नयाँ ब्राण्डका चियालाई चिनाउने र फरक स्वाद दिने नयाँ सोचको परिकल्पना गरे बुटवलका मनिकर कार्कीले । उनले आफ्नो सोचलाई चियामा सीमित राखेनन् । चियाको चुस्कीमा पुस्तकका अक्षरमा आँखाको दृष्टि पुर्‍याउनुपर्छ भनेर सुरु गरे– चिया चौतारी बुक क्याफे ।

चिया घर, विभिन्न चियाको व्यापार अन्यत्र गरेको देखेका कार्कीले चियालाई पुस्तकमा ल्याएर जोडे । सफलता राम्रो मिल्दै छ । फरक सोचका साथ सुरु गरेको यस व्यवसायबाट कार्कीले ‘हाईहाई’ पाइरहेका छन् ।

सफल बन्न केही नयाँ सोचको आवश्यकता पर्छ । जानकारहरू यसो पनि भन्छन्, ‘काम उही होस्, तरिका फरक हुनुपर्छ ।’ यही नयाँ सोच र फरक तरिकालाई आत्मसात् गरेका कार्कीले वित्तीय संस्थाको जागिर गरे । लघुवित्तको सीईओ भए । कलेजका लेक्चरर बने । मिडियाका व्यवस्थापक बने ।

त्यति मात्र होइन उनी ‘वैकल्पिक अर्थतन्त्र’ पुस्तकका लेखक कार्की राष्ट्रिय एवम् स्थानीय पत्रपत्रिकाका नियमित लेखक तथा स्तम्भकार पनि हुन् । त्यति मात्र होइन, कार्की वैकल्पिक राजनीतिक यात्रामा पनि होमिएका छन् । बैकल्पिक राजनीतिक यात्रा सँगसँगै ३३ वर्षे यी युवा अहिले बुटवलमा नयाँ शैलीको क्याफे सञ्चालनमा व्यस्त छन् ।

‘चिया चौतारी बुक क्याफे’ पश्चिम क्षेत्रमै नौलो प्रयोगका रूपमा उनले सञ्चालनमा ल्याएका हुन् ।

चिया, कफी, नास्ता खाँदै एउटै थलोमा विभिन्न पुस्तक अध्ययन गराउन सक्ने नयाँ सोचका साथ मनिकरले यो क्याफे सञ्चालनमा ल्याएका हुन् । क्याफेमा पुस्तक पढ्न मात्र होइन, त्यहाँबाट खरिदसमेत गर्न पाइन्छ ।

फरक फरक चियाका स्वाद र विभिन्न विधाका पुस्तकले ढाकिएको छ यो क्याफे । नास्ता र खाना एवम् अन्तरसंवादको थलो बनेको यस क्याफेमा पछिल्लो समय युवा पुस्ताको भीड बढ्दो छ । चिया पिउँदै पुस्तक पढ्ने अवधारणासहित खुलेको यो क्याफे मोफसलमा पहिलो हो ।

‘यो पठन परम्परा, संस्कृतिको प्रबद्र्धन गर्ने, चिया संस्कृतिको प्रबद्र्धन गर्ने हिसाबले सुरु गरेका हौँ । बुटवल पछिल्लो समय ठूलो शहरको रूपमा विकसित भइरहँदा विमर्श, पठन, सिर्जनात्मक काम गर्ने संस्कृतिको प्रबद्र्धनका लागि हामीले त्यस्तो स्थानको अभाव महसुस गरेर प्राज्ञिक, बौद्धिक कर्म गर्नेहरूलाई सहज होस् भनेर बुक क्याफेको परिकल्पना गरेका हौँ’, उनले भने ।

इतिहास, साहित्य, उपन्यास, जीवनी एवम् प्रेरणाका कथाहरूसहितका पुस्तक क्याफेमा छन् । नेपाली, अंग्रेजी, हिन्दी पुस्तकहरू छन् । यहाँ विशेषगरी कला, साहित्य, संस्कृति, समाज, राजनीति, व्यवसाय, अर्थशास्त्र, व्यवस्थापन, विचार, दर्शनसहित उत्प्रेरणात्मक पुस्तकहरू रहेका छन् ।

आधुनिक र प्रविधिकै कारण पठन संस्कृतिमा युवाहरूको आकर्षण घटिरहेका बेला मनिकरले सञ्चालनमा ल्याएको यस क्याफेमा युवाहरूकै आकर्षण बढी छ ।

‘पठन संस्कृतिको विकास गर्दै केही नयाँपनका साथ व्यवसाय सुुरु गरौँ भनेर क्याफे सुुरु गरेको हो’, कार्की भन्छन्, ‘फरक तरिकाले केही गर्न सकेमा राम्रो चलाउन सकिन्ने भन्ने सन्देश पनि यस क्याफेले दिएको छ ।’

क्याफेमा १६ जनाको लगानी छ । १० महिनाअघि सञ्चालनमा आएको यस क्याफेमा १ सय ५० जनाको क्षमता र ३० जना अट्ने दुई हलसमेत छन् ।

२५ थरीका चिया

यहाँ २५ थरीका चिया पाइन्छन् । नेपाली बगानको सीटीसी चियादेखि अर्गानिक ग्रीन टी, यार्सागुम्बा चियादेखि योगी चियासम्मका चिया र नेपाली शैलीका कोदोको रोटी, फापरको रोटी, नेपाली खाना, नयाँनयाँ स्वादका खाजा सेटको स्वाद पनि लिन सकिन्छ ।

२० रुपैयाँदेखि १ सय ५० रुपैयाँ कपसम्मका चिया छन् यहाँ । पुस्तक पढ्दै चिया पिउनका लागि छुट्टै क्याविनको व्यवस्था गरिएको छ । यही स्थानमा छिट्टै इन्टरनेटसहितको कम्प्युटर राखिँदै छ ।

क्याफेमा नेपाली संस्कृतिलाई आधुनिक शैलीमा मौलिकता दिने प्रयास गरिएको छ । नेपालका हिमाल, पहाड, तराई, धार्मिक सहिष्णुता, सद्भावलाई एकबद्ध बनाउने सन्देश क्याफेको भित्तामा गरिएका आर्टले दिएका छन् ।

पुस्तक पढ्ने बानीको विकास गर्दै क्याफे

ईमेल, इन्टरनेटको प्रयोगकै कारण अहिले किताबहरूसमेत इन्टरनेटमा प्राप्त हुन थालेका छन् । किताबका अक्षरलाई आवाज राखेर अडियो सुन्ने प्रचलन पनि पछिल्लो समय बढी रहेको छ ।

तर, क्याफेले पुस्तक पढ्ने बानीको विकास गराउँदै छ । आफूले चाहेको पुस्तक पढ्न त्यहाँ पुगेकाहरू घण्टौँ त्यहीँ रोकिन्छन् । यसले पठन संस्कृतिको विकासमा टेवा पुगेको धारणा कार्कीको छ ।

‘पढ्ने बानीको विकास पनि यस क्याफेले गराएको छ, आवश्यक सन्दर्भ सामग्री पनि हामीले राख्न सके यो उत्कृष्ट पुस्तकालय बन्न सक्छ । हामी त्यो प्रयत्नमा छौँ’, उनले भने ।

पाठकको पुस्तक अध्ययन गर्ने बानी नघटेको अनुभव उनको छ । ‘बरु पाठकका रुचिअनुसारका पुस्तक अभाव छ, त्यहीअनुसार पुस्तक लेखकले बजारमा ल्याउनुपर्छ’, उनले भने । उनले प्रविधिलाई आत्मसात् गर्दै ई–बुक राख्ने योजना रहेको समेत बताए ।

‘प्रविधिले परिर्वतन ल्यायो भन्छौँ, प्रविधिले सहजीकरण मात्र गरेको हो । त्यहाँ खोज्न जान्नुपर्छ । प्रविधिले समयको लागत कटौती मात्र गरेको हो । हामीले पनि यसलाई आत्मसात् गर्दै अनलाइन किताब, ई–बुक उपलब्ध गराउने प्रयास गर्नुपर्छ’, उनको भनाइ छ । उनले उक्त योजना रहेको पनि बताए ।

देशव्यापी सञ्जाल विस्तार गर्ने तयारी

बुटवलमा मात्र रहेको यस क्याफेलाई देशव्यापी बनाउने योजना कार्कीको छ । यसको सुरुवात काठमाडौंबाट हुनेछ । काठमाडौंपछि सात प्रदेशका प्रमुख शहरमा शाखा विस्तार गर्ने बताए कार्कीले ।

प्रकाशित मिति: शनिबार, पुस १२, २०७६ ०८:००