कसले फाल्याे सन्त नेता किसुनजीको सम्मान शौचालयमा ?

A+ A A-

नेपालको राजनीतिमा निष्ठा, आस्था र शालीन छबि बनाएका सन्त नेताको नाम लिँदा पूर्वप्रधानमन्त्री कृष्णप्रसाद भट्टराईको नाम सबैले सम्झने गरेका छन् ।

राज्यको समेत सहयोगमा भट्टराईको योगदानलाई चीरस्मरण गराउन ललितपुरको गोदावरी नगरपालिकास्थित बाँडेगाउँमा ‘भट्टराई आश्रम’ रहेको छ । उक्त आश्रम भट्टराईको जीवनको उत्तराद्र्धमा भट्टराईकी सेविका बनेकी अमिता कपालीले रेखदेख गर्छिन् । सन्त नेता कृष्णप्रसाद भट्टराई प्रतिष्ठानको अध्यक्ष भने काठमाडौं महानगरपालिकाका पूर्वमेयर पीएल सिंह छन् ।

करिव पाँच रोपनी क्षेत्रफलमा फैलिएको आश्रममा साना–ठूला टहरा र हल गरी आधा दर्जन भवन पनि छन् । तर, त्यही आश्रमको गेट छेउमै रहेको दुई तल्ले सानो घरको तल्लो तलामा रहेको शौचालय छेउमा भने भट्टराईलाई सम्मान स्वरूप प्रदान गरिएको एउटा सम्मानपत्र देख्न सकिन्छ ।

आश्रममा किसुनजीलाई सम्झिएर भक्तिभाव प्रकट र श्रद्धा गर्न जाने जो कोही अनुयायी र शुभेच्छुकको मन त्यहीँ कुँडिन्छ, जतिखेर शौचालयको छेउमै भट्टराईलाई अर्पित गरिएको एउटा सम्मानपत्र बेबारिसे भएको देखिन्छ ।

नेपालको इतिहासमा प्रधानमन्त्री भएर छाता, सुराही र टिनको बाकस बोक्दै प्रधानमन्त्री निवासबाट बाहिरिने भट्टराईको स्वच्छ छबिप्रति कसैले औँलासमेत उठाएका पाइँदैन । भट्टराई नेपालको इतिहासमा पहिलो जननिर्वाचित संस्था संसदको पहिलो सभामुखको पहिचान बनाएका व्यक्ति पनि हुन् । उनी २०१५ सालको आमनिर्वाचनपछि बनेको संस्दमा सभामुख थिए ।

प्रतिनिधिसभाका पूर्वसभामुख दमननाथ ढुंगाना अध्यक्ष रहेको संसदीय अध्ययन तथा विकास संस्थापनाले भट्टराईलाई अर्पण गरेको यो सम्मानपत्रको दुर्दशा थाहा पाउने भए स्वर्गमा पुगेका किसुनजीले पनि धिक्कार भन्थे सायद ।

१६ असार २०५८ मा संस्थाले प्रदान गरेको यो सम्मानपत्रमा भनिएको छ, ‘संसदीय अध्ययन तथा विकास संस्थापना नेपालको प्रजातान्त्रिक आन्दोलनको नेतृत्व पंक्ति आधा शताब्दीभन्दा बढी समयदेखि अविचलित रही अनवरत गतिमा नैतिक मूल्य र मान्यताको प्रजातन्त्रको लागी आजीवन निष्ठापूर्वक सङ्घर्ष गर्दै आउनुभएका प्रत्युत्पन्नमतिका विद्वान् तथा सादा जीवन उच्च विचारको आदर्शका मूर्तिमान प्रतीक जननिर्वाचित संसद्को प्रतिनिधिसभाका प्रथम सभामुख तपाईं कृष्णप्रसाद भट्टराईलाई प्रथम संसद दिवसको पुनीत उपलक्ष्यमा संसदीय अध्ययन तथा विकास संस्थापनाको तर्फबाट सश्रद्धा अभिनन्दन गर्न पाउँदा गौरवको अनुभूति गरेका छौँ ।’

प्रकाशित मिति: बिहीबार, पुस १०, २०७६ १७:१५