कास्की–१ का अधिकांश साना र खुद्रे योजनामा बजेट

A+ A A-

कास्की–१ को कार्ययोजना सार्वजनिक गरिएको छ । कास्की क्षेत्र नम्बर–१ बाट निर्वाचित संघीय र प्रदेश सांसदहरुले स्थानीय पूर्वाधार साझेदारी विकास कार्यक्रम अन्तर्गत रकम विनियोजन गरेका छन् ।

कास्की–१ को प्रतिनिधित्व गर्ने सांसदहरुले बाटोघाटो र साना प्रकृतिका खुद्रे कार्यक्रमका लागि रकम विनियोजन गरेका छन् । यस क्षेत्रबाट प्रतिनिधिसभामा खगराज अधिकारी र प्रदेश १ ‘क’ मा दीपक कोइराला तथा प्रदेश २ ‘ख’ मा मानबहादुर गुरुङ रहेका छन् । १ ‘ख’ बाटै समानुपातिकतर्फ गायत्री गुरुङ प्रदेशसभा सदस्य छन् ।

निर्वाचन क्षेत्र पूर्वाधार कार्यक्रमअन्तर्गत संघीय सांसदले ६ करोड र प्रदेशसभामा प्रत्यक्ष निर्वाचित सांसदले २ करोड पाउने व्यवस्था छ ।

जसमध्ये पोखरा महानगरपालिका अन्तर्गत संचालन हुने स्थानीय पूर्वाधार विकास कार्यक्रम, मादी गाउँपालिका अन्तर्गत संचालन हुने स्थानीय पूर्वाधार विकास कार्यक्रम र रुपा गाउँपालिका अन्तर्गत संचालन हुने स्थानीय पूर्वाधार विकास कार्यक्रम रहेको छ ।

पोखरा महानगरपालिकाअन्तर्गत संचालन हुने स्थानीय पूर्वाधार विकास कार्यक्रम अन्तर्गत करिब २ करोड ६० लाख रकम विनियोजन गरिएको छ । जसमध्ये बुद्धदेव मार्ग (बाटो ढलान) पोखरा—१२ लाई १५ लाख रुपैयाँ, कसेरी अमलाचौर सडक पोखरा—१३ का लाई ५० लाख रकम, लक्ष्मी मावि घैटेखोर मार्ग (पिच) पोखरा २६ लाई २५ लाख विनियोज गरिएको छ ।

उनीहरुले सार्वजनिक गरेका योजनाहरुमा बाटो, मन्दिर, आमा समूहहरु र क्रियापुत्री भवन, पार्क निर्माणको लागि छुट्याइएको छ । संघीय सांसद खगराज अधिकारीले जनताले छानेका योजनाहरुमै आफूहरुले रकम विनियोजन गरेको बताए ।

उनले रामकोट–रामादी सडकलाई एक करोड ५० लाख तथा रुपैयाँ छुट्याएका छन् भने तप्राङमा वन्यजन्तु पार्क बनाउन १ करोड दिएका छन् । वन्यजन्तु पार्क पर्यटन प्रवद्र्धनका लागि सहायक भएकाले ठूलो रकम छुट्याइएको उनले बताए । प्रतिनिधिसभा सदस्यले १० लाखभन्दा कमको योजनालाई रकम दिन नपाउने प्रावधान रहेको छ ।

उनले अन्य २० वटा खुद्रे योजनाको लागि १० देखि १५ लाख रुपैयाँ छुट्याएका छन् । रकम विनियोजन गरेका योजनाहरु जनताका आवश्यकता भएको उनले दावी गरे । ‘यी साना योजनाको समुदायमा छुट्टै महत्व छ’, उनले भने, ‘साना योजना भएपनि समुदायमा दीर्घकाल सम्म सकारात्मक प्रभाब पार्छ ।’ बाँकी रकम उनले अन्य १० वटा योजनालाई छुट्याएका छन् ।

अधिकारीले सार्वजनिक गरेका कुनैपनि योजनाहरु आफुले नछानेको बताउँदै कामको प्रकृति हेरेर बजेट विनियोजन गरिएको दाबी गरे । उनले योजनाहरु प्रतिनिधिसभाबाटै छानिएको बताए ।

अनुदानका नाममा पहुँचवालाले ठग्ने काम गरेको उनले आरोप लगाए । अधिकारीले अहिले पनि टाठाबाठाले विकास निर्माणका काममा अवरोध पु¥याइरहेको बताए । पोखरालाई पर्यटकीय राजधानीको रुपमा विकास गर्न आफुले कुनै कसर बाँकी नराख्ने उनले बताए ।

प्रदेश १ ‘क’ का सांसद दीपक कोइरालाले लेखनाथको भण्डारढिक रंगशालाको कभर्डहलको लागि २५ लाख रुपैयाँ र रुपा गाउँपालिकाको शिवचण्डी मोटरबाटोलाई २७ लाख रुपैयाँ विनियोजन गरेका छन् ।

प्रदेशसभा सदस्यले २ वटा २५ लाखभन्दा बढीका योजना छान्ने पर्ने प्रावधान छ । बाँकी रकम भने उनले भवन निर्माण, सहिदपार्क, दलित भवन निर्माण, विश्वकर्मा भवन, महिला समूह, धम्पुसको टोल विश्वकर्मा भवन, पैदलमार्ग निर्माण जस्ता योजनालाई दिएका छन् ।

प्रदेश १ ‘ख’ का सांसदद्वय मानबहादुर गुरुङ र गायत्री गुरुङले ठूलाकोट पार्क निर्माण तथा मझेरी खानेपानी योजनालाई २५÷२५ लाख रुपैयाँ विनियोजन गरेका छन् । उनीहरुले बाँकी पैसा समाजघर मर्मत, ढुंगा मन्दिर, बहुउदेश्यीय भवन, तमु समाज भवन, बाटो ढलान, अशक्तमैत्री फुटपाथ निर्माणजस्ता योजनाको लागि छुट्याएका छन् ।

गण्डकी प्रदेशले गत आर्थिक वर्षमा प्रदेशसभा सदस्यहरुलाई पूर्वाधार विकास कार्यक्रमको लागि रकम नदिइए पनि यसवर्ष प्रति निर्वाचन क्षेत्र २ करोडका दरले ७२ करोड रुपैयाँ दिइएको छ । गण्डकीमा प्रदेशसभाका ३६ निर्वाचन क्षेत्र छन् ।

प्रकाशित मिति: बिहीबार, पुस १०, २०७६ ११:४८