३४ करोड लागतमा फेवातालमा ‘सिल्ट्रेसन ड्याम’

फेवाताल संरक्षणका लागि निर्माण हुने सिल्ट्रेसन ड्यामको शिलान्यास गरिँदै । तस्बिरः नरहरि पौड्याल

A+ A A-

पर्यटकीय नगरी पोखराको फेवातालको संरक्षणका लागि सिल्ट्रेसन ड्यामको निर्माण सुरु गरिएको छ । गण्डकी प्रदेश सरकार र पोखरा महानगरपालिका तर्फबाट १७÷१७ करोड गरी कूल ३४ करोडको लागतमा ड्याम निर्माण थालिएको हो ।

ड्यामको बुधबार गण्डकी प्रदेशका मुख्यमन्त्री पृथ्वीसुब्बा गुरुङ र पोखरा महानगरपालिकाका मेयर मान बहादुर जिसीले संयुक्त रुपमा बेतयानी खोलामा शिलान्यास गरे । शिलान्यासपछि मुख्यमन्त्री गुरुङले ड्याम निर्माण भएपछि फेवातालको संरक्षणमा टेवा पुग्ने बताए ।

उनले पोखरा र फेवाताल एकअर्काका परिपुरक रहेको बताउँदै यस प्रदेशमा पर्यटकीय गतिविधि मौलाउनमा फेवातालको शौन्दर्यता जोगाइराख्नु आवश्यक रहेको उल्लेख गरे ।

‘गण्डकी प्रदेशको गहनाका रूपमा रहेको फेवातालको संरक्षण महत्वपूर्ण छ । फेवाताल बिनाको गण्डकी प्रदेश कल्पनासम्म पनि गर्न सकिदैन,’ उनले भने, ‘फेवातालको अतिक्रमणलाई रोकेर यसको संरक्षण गर्न प्रदेश सरकार प्रतिवद्ध छ ।’

मुख्यमन्त्री गुरुङले फेवातालसँगै पोखरामा रहेका अन्य सातवटै तालको संरक्षण र सम्बद्र्धनका लागि पहल गरिने बताए । उनले निर्माणाधीन फेवातालको ड्यामले ताल संरक्षण र आन्तरिक आम्दानीसमेत हुने बताए ।

पोखरा महानगरपालिकाका प्रमुख मानबहादुर जिसीले गण्डकी प्रदेश सरकारको उद्योग, पर्यटन, वन तथा वातावरण मन्त्रालय र पोखरा महानगरपालिकाको साझेदारीमा करिब ३४ करोड ४९ लाख लागतमा ५ वटा सिल्ट्रेसन ड्याम निर्माण हुने बताए ।

उनका अनुसार पोखरा महानगरपालिका वडा २३ र २४ स्थित बेतयानी खोलामा दुई वटा ड्याम ५ करोड ४६ लाख ५८ हजार ९ सय ७५ रुपैयाँ लागतमा निर्माण हुने छ । यस्तै घाँटीछिनामा एक ड्याम ७ करोड ८८ लाख ६२ हजार ५ सय ४१ रुपैयाँ लागतमा निर्माण हुने छ ।

लौरुकमा निर्माण हुने ड्यामको लागत ५ करोड ७४ लाख ८४ हजार ९ सय ९८ रुपैयाँ र अँधेरी कुनामा निर्माण हुने एक ड्यामका लागि ९ करोड ६ लाख ४ हजार ५ सय ५८ रुपैयाँे लागतमा पाँच वटा ड्याम १५ महिना भित्र तयार गरिनेछ ।

मेयर जिसीले उक्त ड्याम निर्माण आगामी १५ महिनाभित्र निर्माण गरिसक्ने गरी निर्माण कम्पनीसँग सम्झौता गरिएको छ । ड्याम निर्माणका लागि श्री गीता÷जय नेपाल ईश्वर जेभी र खड्का कृष्ण पिके जेभीसँग सम्झौता भएको छ ।

प्रकाशित मिति: बिहीबार, पुस १०, २०७६ ०८:५२