पर्यटकको बसाइ अवधि बढाउन भारतीय सवारीमाथि रोक

A+ A A-

पोखराका पर्यटकीय गन्तव्यमा भारतीय नम्बर प्लेटका गाडीलाई आवतजावतमा रोक लगाइएको छ ।

पोखरामा बढ्दो ट्राफिक जामलाई मध्यनजर गर्दै प्रशासनले पोखरा क्षेत्रभित्रका पर्यटकीय गन्तव्यहरूमा भारतीय नम्बरप्लेटका सार्वजनिक सवारीहरूलाई रोक लगाएको हो ।

भारतीय सार्वजनिक सवारीका कारण बढेकाे ट्राफिक जाम र दुर्घटनालाई दृष्टिगत गरी पोखराका पर्यटकीय स्थलहरूमा भारतीय सार्वजनिक सवारीलाई रोक लगाइएको जिल्ला प्रशासन कार्यालय कास्कीले जनाएको छ ।

भारतीय चालकलाई पोखराका पर्यटकीय स्थलको सडकको अवस्थाका बारेमा पूर्वजानकारी नहुने र स्थानीय व्यवसायमा समेत नकारात्मक प्रभाव पर्ने भएकाले ट्राफिक व्यवस्थापनलाई मध्यनजर गर्दै भारतीय गाडीलाई रोक लगाइएको कास्कीका प्रमुख जिल्ला अधिकारी रमेश केसीले बताए ।

‘पोखरा भित्रिएका भारतीय सार्वजनिक गाडीलाई निश्चित ठाउँमा व्यवस्थापन गरी स्थानीय व्यवसायीसँगको सहकार्यमा पर्यटकीय स्थलहरू घुमघाम गर्ने व्यवस्था मिलाउनेछौं,’ उनले भने, ‘निश्चित ठाउँमा भारतीय गाडी पार्किङ गराउने विषयमा ट्राफिक र यातायात व्यावसायीलाई निर्देशन दिएका छौं ।’

नेपाल भ्रमण वर्षको अवसरमा पोखरामा ठूलो संख्यामा आन्तरिक तथा बाह्य पर्यटकको आगमन हुने हुँदा हाल ट्राफिक व्यवस्थापनलाई सहज बनाउन पहिलो प्रयासस्वरुप याे अभियान सुरु गरिएको उनले बताए ।

बिगत लामो समयदेखि भारतका विभिन्न ठाउँबाट पोखरा घुम्न आउने भारतीयहरूले आफ्नो सवारी लिएर आउने गरेका छन् । भारतीय पर्यटकहरू रिजर्भ गरेर ल्याइएका सवारीसाधनहरूमार्फत पोखराका विभिन्न पर्यटकीय गन्तव्यहरूमा सिधै पुग्ने गरेका थिए ।

भारतीय गाडीलाई रोक किन ?

ठूलाठूला सार्वजनिक सवारीसाधनहरू पोखराका साँघुरा गल्ली र विभिन्न पर्यटकीय स्थलहरूमा लग्दा वरिपरिको वातावरण नै अस्तब्यस्त हुने गरेको थियो । यस्तैऽ निजी सवारी लिएर पोखरादेखि मुस्ताङसम्म पुग्ने भारतीय पर्यटकको संख्यासमेत उल्लेख्य छ ।

सार्वजनिक सवारीसहित खानपिनको व्यवस्था गरेर पोखरा आउने भारतीय पर्यटकहरूका कारण यहाँको पर्यटनमा कुनै सहयोग नगरेको स्वयम् पर्यटन व्यवसायीहरूको भनाइ छ ।

पर्यटन व्यवसायीहरूको छाता संस्था पोखरा पर्यटन परिषद्ले केही समयअघि पोखरामा ट्राफिक जाम तथा सडक दुर्घटना न्यूनीकरण गर्ने भन्दै कास्की प्रशासनलाई भारतीय गाडीहरूलाई पोखराका पर्यटकीय गन्तव्यमा जान रोक लगाउन माग गरेको थियो ।

यसअघि पोखरामा भारतीय गाडीले सडक दुर्घटना गराएको थियो । एउटा भारतीय गाडीमा आगजनीसमेत भएको थियो । पोखराको ट्राफिक व्यवस्थापनका लागि महानगरपालिका र गण्डकी प्रदेश सरकारले सबैसँग समन्वय गरेर अघि बढ्नुपर्ने प्रजिअ केसीले बताउँछन् । पोखरामा यातायातको धेरै समस्या रहेको उनले जनाए ।

पोखरा क्षेत्रमा साँघुरा सडकका बारेमा भारतीय गाडीचालकलाई जानकारी नहुँदा सडक जाम र दुर्घटना हुने गरेका कारण यसलाई न्यूनीकरण गर्न पोखराका पर्यटकीय गन्तव्यमा भारतीय गाडीहरू प्रवेशमा रोक लगाउन आफूहरूले माग गर्दै आएको पोखरा पर्यटन परिषदका अध्यक्ष चिरन्जीवी पोखरेलले बताए ।

‘भारतीय गाडी सिधै पोखराका पर्यटकीय गन्तव्यमा जाने आउने गर्दा स्थानीय व्यवसायीहरूलाई समेत प्रभाव पर्ने गरेको छ’ उनले भने, ‘साँघुरा सडक भएका कारण पनि पोखराका सबै क्षेत्रमा भारतीय सार्वजनिक सवारीलाई सहज प्रवेश गर्न दिनु हुँदैन । निश्चित ठाउँबाहेक अन्य ठाउँमा भारतीय गाडी प्रवेशमा रोक लगाउनुपर्छ ।’

जिल्ला ट्राफिक कार्यालय कास्कीका प्रहरी नायव निरीक्षक जितजंग कार्कीले प्रशासनबाट पत्र आएकाले कार्यान्वयन गर्नेतर्फ लाग्ने बताए ।

केही वर्षअघि सामुदायिक सेवा केन्द्र बैदामले पोखराको लेकसाइड क्षेत्रमा रातिको समयमा कुनै पनि यात्रुवाहक बस तथा सवारीसाधनहरू जथाभावी पार्किङ गर्न नपाउने निणर्य गरेको थियो ।

यातायात ऐनमा यस्तो छ व्यवस्था

यातायात व्यवस्थापन ऐन, २०४९ को दफा २९ ले विदेशमा दर्ता भएका सवारी अनुमति नलिई चलाउन पाइँदैन । उपदफा ३० ले विदेशमा दर्ता भएको सवारी नेपालभित्र चलाउने अनुमति मागेमा अधिकारप्राप्त अधिकारीले तोकिएको दस्तुर लिई बढीमा एक महिनासम्मका लागि त्यस्तो सवारी चलाउने अनुमति दिन सक्ने व्यवस्था गरेको छ ।

अनुमति लिए तापनि यी सवारीसाधनहरूले नेपालभित्र यातायात सेवा सञ्चालन गर्ने अनुमति पाउँदैनन् ।

भारतीय सवारीले पर्यटन व्यवसाय नै धरापमा

पोखरा क्षेत्रका पर्यटकीय क्षेत्रमा सिधै भारतीय सार्वजनिक सवारीसहितका पर्यटक पुग्न थालेपछि यस क्षेत्रको पर्यटन व्यवसायमा नै असर परेको छ ।

भारतदेखि सार्वजनिक सवारी लिएर आउने भारतीय पर्यटकहरूले पोखरा क्षेत्रका सीमित स्थानको मात्र भ्रमण गरेर फर्कने गरेको व्यवसायीको आरोप छ । गण्डकी प्रदेशमा प्रदेश र संघीय सरकारले ११०/११० वटा पर्यटकीय गन्तव्य तोकिसकेका छन् । तर, पर्यटकीय गन्तब्य तोकिएको भए पनि आफैंले ल्याएका भाडाका सवारीमार्फत ती क्षेत्र पुगेर भारतीयहरू फर्कने गरेका सम्बद्ध व्यवसायी बताउँछन् ।

व्यवसायीका अनुसार पोखरामा रहेका पर्यटकीय गन्तव्यसँग जोडिएको ऐतिहासिक, सांस्कृतिक र प्राकृतिक महत्त्वका बारेमा पर्याप्त सूचनाबिनै २/४ वटा स्थानको मात्र दृश्यावलोकन गराएर फर्काउने प्रवृत्ति बढ्न थालेपछि अन्य पर्यटकीय स्थानहरू ओझेलमा परेका छन् ।

गण्डकी प्रदेशमा दर्जनौं पर्यटकीय गन्तव्य भए पनि फेवाताल, पातले छाँगोलगायतका क्षेत्रलाई मात्र गन्तव्यका रूपमा हेर्ने प्रवृत्तिका कारण पर्यटकका आगमन बढ्न नसकेको व्यवसायीको ठम्याइ छ ।

पर्यटन यातायातमा ४ अर्ब लगानी

नेपाल पर्यटक यातायात व्यवसायी संघ गण्डकीका अनुसार पर्यटन सवारीमा मात्रै झन्डै ४ अर्ब रुपैयाँ लगानी रहेको छ ।

यस क्षेत्रमा साना र ठूला गरी करिब ८ सय पर्यटन सवारी गुड्ने गरेका छन् । गण्डकी प्रदेशको उद्योग, पर्यटन, वन तथा वातावरण मन्त्रालयका अनुसार २०७६ असारसम्म ११ महिनाको अवधिमा सरकारले संकलन गरेको तथ्यांकअनुसार गण्डकी प्रदेशको राजधानी पोखरासहित प्रदेशका पर्यटकीय स्थलहरूमा २ लाख ८८ हजार विदेशी पर्यटकले भ्रमण गरेका छन् । त्यसमध्ये हवाई मार्ग र स्थल मार्ग हुँदै आउने भारतीय पर्यटकको संख्या १ लाख १६ हजार रहेको छ ।

प्रकाशित मिति: बुधबार, पुस ९, २०७६ १०:३३