च्याउको मूल्य प्रतिकेजी ४८ हजार, पाल्पामा व्यावसायिक खेती

A+ A A-

पाल्पाको भालेबासमा बहुउपयोगी रातो च्याउ (गानोडर्मा) को व्यावसायिक खेती सुरु भएको छ । पाल्पाको भालेबासमा दुई वर्षअघि स्थापना भएको पाल्पाली रमाईलो पार्क प्रालिअन्तर्गत रहेको भैरव दर्शन च्याउ फर्ममार्फत रातो च्याउको व्यावसायिक उत्पादन सुरु गरिएको हो ।

भालेबासमा भैरव च्याउ, हाम्रो च्याउ र बनाना मसरुम भेजी रेष्टुरेन्ट सञ्चालनमा छ ।

के हो रातो च्याउ ?

यसलाई गानोडर्मा, आमा च्याउ पनि भन्ने गरेको पाइन्छ । यो च्याउ मानव स्वास्थ्यका लागि आवश्यक २ सय ५० भन्दा बढी प्राकृतिक पोषणयुक्त खाद्य तत्त्वहरू र औषधीय गुण यसमा पाइन्छ ।

क्यान्सरविरुद्ध लड्ने क्षमता वृद्धि, पायल्स रोगीका लागि उपयुक्त, फोक्सो, कलेजो, मुटु र मिर्गाैलालाई मजबुत, रुघाखोकी, दम हटाउने, अनिद्राबाट मुक्त, रक्तचाप, चिनी रोग, यौन शक्ति वृद्धिलगायतमा रातो च्याउ फलदायी मानिन्छ ।

यसको मूल्य काँचो अवस्थामा प्रतिकेजी ९ सय र सुकेको च्याउ प्रतिकेजी ४८ हजार रुपैयाँसम्म पर्छ ।

यसरी सुरु गरियो रातो च्याउको खेती

पाल्पाको जरेपीपलमा भैरव दर्शन च्याउ उद्योग छ । यसका सञ्चालक केशव कार्कीले पोखराबाट यसको बिउ लिएर रातो च्याउको खेती सुरु गरेका हुन् ।

दुई वर्षअघि भालेबासमा पालपाली रमाइलो पार्क प्रालि स्थापना भयो । त्यहीअन्तर्गत हाम्रो च्याउ फर्म र भैरव दर्शन च्याउ उद्योग सञ्चालनमा छ । राजु विष्ट, केशव कार्की, सुदीर रावल र ओमप्रकाश श्रेष्ठले १ करोड ३० लाख रुपैयाँमा पर्यटन र कृषिलाई सँगै जोडेर रमाइलो पार्क प्रालि स्थापना गरेका हुन् ।

अहिले त्यही प्रालिमार्फत यो च्याउ उत्पादन भइरहेको छ । १० लाखको लगानीमा ४ महिनामा ४ हजार बल्वहरूमा त्यहाँ रातो च्याउको खेती सुरु गरिएको छ । रातो च्याउबाट कफी, पाउडर र ट्याब्लेट बनाउन सकिने भएपनि अहिले कफी र पाण्डर मात्र उत्पादन गरेको प्रालिका सीईओ राजु विष्टले जानकारी दिए ।

हाम्रो च्याउ, बनाना मसरुम भेजी रेष्टुरेन्ट पनि सँगै

प्रालिमार्फत हाम्रो च्याउ फर्म पनि अहिले सञ्चालनमा छ । त्यहाँ सिताके च्याउ, कन्या च्याउ उत्पादन तथा बिक्री हुँदै आएको छ । यो च्याउ कटुसको मुडामा बिउ खोपेर लगाउने गरिन्छ ।

यो प्रविधिले च्याउ लगाउँदा करिब ९ महिनापछि मात्र उत्पादन दिने कम्पनीका सीईओ विष्टले जानकारी दिए । गत वर्ष मात्र सिताके च्याउको २३ लाखबराबरको कारोबार भएको थियो ।

त्योबाहेक बनाना मसरुम भेजी रेष्टुरेन्ट पनि कम्पनीमार्फत सञ्चालन भएको छ । च्याउ र केराका विभिन्न परिकार मात्र यो रेष्टुरेन्टमा पाइने गर्दछ । पर्यटन र कृषिलाई सँगै जोडेर एकीकृत फर्म सञ्चालन गरिएको कम्पनीको भनाइ छ ।

प्रकाशित मिति: सोमबार, पुस ७, २०७६ १२:५८