कांग्रेस केन्द्रमा ‘धम्की’ राजनीति

A+ A A-

नेपाली कांग्रेसको संस्थापन पक्ष नेविसंघ तदर्थ समिति गठनका विषयमा अनुदार हुँदा कांग्रेस नेताबीचको असहमति झन् चर्किएर गएको छ ।

असन्तुष्ट नेताहरूको मागबमोजिम पार्टी महाधिवेशनको कार्यतालिका प्रस्तुत गर्न तयार भएको कांग्रेस भ्रातृ संस्थामा उदार बन्न नसकेपछि नेताहरूबीच कित्ताकाट भएको हो ।

२६ मंसिरमा बसेको कांग्रेस केन्द्रीय कार्यसमिति बैठकमा पेस भएको नौबुँदे एजेण्डामा पार्टीको १४औं महाधिवेशनको कार्यतालिकालाई एजेण्डाको रूपमा प्रस्तुत नगरिएको भन्दै पार्टी नेता रामचन्द्र पौडेल र असन्तुष्ट नेताहरूले बैठक बहिष्कार गर्दै आएका छन् ।

असन्तुष्ट पक्षको बहिष्कारबीच केन्द्रीय कार्यसमिति बैठक २६ र २७ मंसिरमा बसेको थियो । त्यसपछि पार्टी सभापति शेरबहादुर देउवाले बोलाएको बैठकमा नेता पौडेलसहित महामन्त्री डा. शशांक कोइराला, कोषाध्यक्ष सीतादेवी यादव पनि अनुपस्थित भएपछि त्यसयताका तीनवटा बैठक लगातार स्थगित हुँदै आएका छन् ।

पार्टीको केन्द्रीय निर्वाचन समितिले निर्धारित समयमा पार्टीको स्थानीय तहको समायोजनको प्रतिवेदन पेश गर्न नसक्दा संक्रमणकालीन संगठन निर्माण नहुँदा नयाँ सदस्यता वितरण र नवीकरण गर्न नसक्ने भन्दै संस्थापन पक्षले कार्यतालिका प्रस्तुत गर्न नसकिने तर्क गर्दै आएको थियो ।

संस्थापनइत्तर पक्षका नेताहरूले तल्लो तहका संगठनको समायोजन प्रक्रियाले केही समय लिए पनि कार्यतालिका प्रस्तुत गर्न कुनै बाधा नपर्ने जनाएका थिए । पार्टी सभापति शेरबहादुर देउवाले उपसभापति विमलेन्द्र निधिलाई असन्तुष्ट पक्षसँग वार्ता गर्न जिम्मेवारी दिएको छ ।

निधि संयोजक रहेको टोली कार्यतालिका चालू बैठकमै पेश गर्न तयार भए पनि भ्रातृ संस्था गठनको विषयमा अनुदार भएपछि सहमतिको प्रयास असफल हुँदै आएको छ ।

असन्तुष्ट पक्षको तर्फबाट वार्ता गर्न प्रकाशमान सिंहको संयोजकत्वमा दिलेन्द्रप्रसाद बडू र हृदयराम थानीसहितको टोलीले वार्ता गरिरहेको छ । संस्थापन पक्षले जितजंग बस्नेत नेतृत्वको नेपाल तरुण दलको म्याद ६ महिनाका लागि थप गर्ने र महामन्त्री भूपेन्द्रजंग शाहीमाथि गरेको कारबाही फुकुवा गर्न भने सहमत भएको छ ।

वार्ता टोलीका एक सदस्यका अनुसार नेपाल विद्यार्थी संघको तदर्थ समिति वा महाधिवेशन आयोजक समिति गठन गर्ने विषयमा संस्थापन पक्षले ६० प्रतिशत वढी भाग खोजेपछि समस्या भएको छ ।

संस्थापन पक्षको प्रस्तावअनुसार अध्यक्ष संस्थापन पक्षलाई, महामन्त्री चार जनामध्ये एक जना संस्थापन पक्षबाट, दोस्राे, पौडेल समूहबाट, तेस्राे कृष्णप्रसाद सिटौला समूहबाट र चौथो पार्टी समायोजन गरेका विजयकुमार गच्छदारलाई दिनुपर्नेछ ।

तरऽ पौडेल समूह यस्तो प्रस्तावप्रति सहमति छैन । उनीहरूले पार्टीमा जस्तै ४० देखि ४५ प्रतिशत भाग आफूहरूलाई दिनुपर्नेछ । असन्तुष्ट पक्षले नेविसंघ अध्यक्ष संस्थापन पक्षले लिए पनि महासचिव भने आफूहरूले मात्र पाउनुपर्ने दाबी गर्दै आएका छन् ।

‘संस्थापन पक्षले नेविसंघका कृष्णप्रसाद सिटौला समूहलाई पनि भाग दिनुपर्ने भन्दै पौडेल समूहलाई पेल्ने गरेको छ ’, वार्ता टोलीका एक सदस्यले भने, ‘सिटौला समूहले आफूहरूलाई सम्मानजनक स्थान खोजेको छ । उनीहरूलाई पनि १० प्रतिशत दिए हुन्छ ।’

पौडेल समूहले गच्छदार समूहलाई पार्टीको जिल्ला र अन्य स्थानीय तहमा दिएको अभ्यासलाई नजिरको रूपमा हेर्दै समायोजनको मोडालिटीमा अन्य जिल्ला र तहमा भएको समायोजनबमोजिम नै उपसभापति, सहमहामन्त्री वा सहसचिव दिनुपर्ने तर्क गर्दै अएको छ ।

नेविसंघको गठनको विषयमा सिटौला समूहले भने विगतमा आफ्नो समूहले पाएकै मतका आधारमा केन्द्रीय कार्यसमितिमा भागवण्डा खोजेका छन् । आगामी १० पुसमा बस्ने भनिएको पार्टी केन्द्रीय कार्यसमिति बैठकमा सहमति गरेर अघि बढ्ने प्रयास नेविसंघकै एजेन्डाले समस्यामा पर्ने भएको छ ।

पौडेल समूहकै केन्द्रीय सदस्य तथा नेता डा.शेखर कोइरालाले नेविसंघ तदर्थ समिति वा महाधिवेशन आयोजक समिति बनाए पनि पारित विधानबमोजिम गठन गर्नुपर्ने मत राखेका छन् । कोइराला भने विधानबमोजिम केन्द्रीय विभागको संख्या २८ बाट बढाउन नहुने पक्षमा उभिएका छन् ।

यता सिटौला समूहले भने विधानबमोजिम नेविसंघको गठन गर्दा ३२ वर्षमुनिबाटै छनोट गर्न चेतावनी दिएको छ । सो समूहले विधानविपरीत ३२ वार्षमाथि बाट नेतृत्व चयन गरेमा समानान्तर समिति गठन गर्ने चेतावनी दिएको छ ।

भागवण्डामा सहमति भयो भन्दै विधानविपरीत जतिसुकै पदाधिकारी प्रस्ताव गर्न नपाइने सिटौला समूहको तर्क छ । उनीहरूले विभागको संख्या ४१ नपुर्‍याउनसमेत आग्रह गरेको छ ।

नेविसंघको अघिल्लो महाधिवेशनमा सिटौला समूहले नेविसंघमा महामन्त्रीसहित ३२ प्रतिशतभन्दा बढी सदस्य जिताएको थियो । त्यसैले सिटौला समूहले पार्टीमा संस्थापन पक्षले पौडेल पक्षलाई दिएजस्तै ४० प्रतिशत दिएमा आफूहरूलाई पनि त्यति नै भाग चाहिने दाबी गरेका छन् ।

संस्थापन पक्षले पनि नेविसंघमा आफूनिकटका र ४५ वर्षमाथिका विद्यार्थीलाई पनि नेविसंघको अध्यक्ष बनाउने प्रस्ताव गरेको छ । जुन प्रस्तावप्रति सिटौला समूहको आपत्ति छ ।

नेविसंघमा देखिएको असहमतिलाई हटाएर सहमतिमा पुग्न आज दिउँदो २ बजे कांग्रेस नेता प्रकाशमान सिंहको निवास चाक्सीबारीमा कार्यदलका सदस्यहरूबीच छलफल हुने कार्यदलका सदस्य हृदयराम थानीले शिलापत्रलाई बताए । छलफलमा उपसभापति निधिसहितका नेताहरू सहभागी हुँदै छन् ।

प्रकाशित मिति: आइतबार, पुस ६, २०७६ १३:५०