कांग्रेस केन्द्रीय समिति: बैठक बोलाउँदै स्थगित गर्दै

A+ A A-

नेपाली कांग्रेस केन्द्रीय कार्यसमितिको शुक्रबार दिउँसो १ बजे बोलाइएको बैठक एक सातासम्मका लागि स्थगित भएको छ । पार्टी प्रवक्ता विश्वप्रकाश शर्माले सहमतिबाटै अघि बढ्ने उद्देश्यले १० पुससम्म बैठक स्थगित गरिएको बताए ।

पार्टीको चौधौं महाधिवेशनको कार्यतालिका बैठकमा पेश नगरेसम्म सहभागी नहुने पार्टी नेता रामचन्द्र पौडेल र संस्थापनइतर पक्षका नेताहरूको अडानका कारण केन्द्रीय कार्यसमितिको बैठक बोलाउँदै स्थगित हुँदै आएको छ ।

पार्टी संस्थापन पक्षले २६ मंसिरमा बोलाएको बैठकमा महाधिवेशनको कार्यतालिका पेश नगरेको भन्दै नेता पौडेलसहित उनी पक्षधर नेताहरूले बैठक बहिष्कार गर्दै आएका छन् । बहिष्कारका बाबजुद पार्टी केन्द्रीय कार्यसमिति बैठक २६ र २७ मंसिरमा भएको थियो ।

पहिलो बैठकमा महामन्त्रीद्वय डा.शशांक कोइराला र पूर्णबहादुर खड्का दुवै अनुपस्थित भएपछि सहमहामन्त्री डा. प्रकाशशरण महतले नौबुँदे एजेण्डा पेश गरेका थिए । ती एजेण्डाहरूमा आफूहरूको सहमति नरहेको भन्दै असन्तुष्ट पक्षले संशोधनको माग गरेको छ ।

असन्तुष्ट पक्षले नेता प्रकाशमान सिंहको संयोजकत्वमा दिलेन्द्रप्रसाद बडू र हृदयराम थानी सदस्य रहेको तीन सदस्यीय वार्ता टोली गठन गरेको थियो । सो वार्ता टोलीसँग उपसभापति विमलेन्द्र निधिले वार्ता गरे पनि सहमति हुन सकेको छैन ।

असन्तुष्ट पक्षका केन्द्रीय सदस्यहरू आफूहरूको माग पूरा नभएसम्म बैठकमा सहभागी नहुने अडान राखेपछि पार्टीको २९ मंसिर, २ पुस र शुक्रबार बोलाइएको केन्द्रीय कार्यसमिति बैठक लगातार स्थगित हुँदै आएका छन् ।

असन्तुष्ट पक्षले बैठकमा पेश भएको पार्टीको विधानविपरीत २८ विभागको संख्यालाई बढाएर ४२ पुर्‍याउने प्रस्तावप्रति असन्तुष्टि जनाएको छ ।

त्यस्तै, नेपाल तरुण दलको म्याद ६ महिना थप गर्ने र नेपाल विद्यार्थी संघको महाधिवशेन तदर्थ समिति गठनको विषयमा सहमति हुन सकेको छैन ।

नेविसंघमा अध्यक्ष वा अध्यक्षसहति एक/एक जना उपाध्यक्ष, महामन्त्री र कोषाध्यक्षसहित केन्द्रीय सदस्यहरू बनाउने भन्ने विषयमा विवाद भएको छ । सभापति देउवाले नेता विजयकुमार गच्छदार, कृष्णप्रसाद सिटौला पक्षलाई पनि महामन्त्रीको भाग दिनुपर्ने भन्ने प्रस्ताव गरेका छन् ।

यता पौडेल पक्षले भने आफूहरूलाई सिधै ४० प्रतिशत भाग चाहिने भनिरहेको छ । पार्टीको विभाग गठनमा ४० प्रतिशत भाग तथा अन्तर्राष्ट्रिय सम्बन्ध, जनसम्पर्क, संगठन र प्रचार विभागमध्ये दुई विभाग पाउनुपर्ने दाबी गर्दै आएको छ ।

यता संस्थापन पक्षले भने संघीय संरचनाबमोजिम पार्टी निर्वाचन समितिले स्थानीय तहका पालिका र वडाको समायोजनको प्रतिवेदन नबुझाएका कारण कार्यतालिका ल्याउन समस्या भएको दाबी गर्दै आएका छन् ।

राधेश्याम अधिकारी संयोजक भएको समितिले भने नगर र गाउँपालिका तथा वडा कार्यसमिति समायोजनको प्रतिवेदन जिल्ला कार्यसमितिले नै उपलब्ध नगराएको जनाएको छ ।

संस्थापन पक्षले वडा तहमा पार्टीको संगठन निर्माण भएपछि मात्र सदस्यता वितरण र नवीकरणमार्फत महाधिवेशनको कार्यतालिका ल्याउने बताउँदै आएका छन् ।

सभापति देउवालाई महाधिवेशनको कार्यतालिका नल्याएर कार्यकाल बढाउने रणनीति बनाएको आरोप लाग्दै आएको छ । सप्तरी, सिरहा, धनुषा, महोत्तरी र वारा जिल्लाका क्रियाशील सदस्य र स्थानीय तहका संगठनको विवरणसमेत पार्टीमा आइसकेको छैन ।

प्रकाशित मिति: शुक्रबार, पुस ४, २०७६ १३:४८