पटक–पटक बलात्कृत १२ वर्षीया छोरी भन्छिन्ः सरी अम्मा !

A+ A A-

नेपालमा बलात्कारका घटना हरेक दिन बढिरहेका छन् । बालिकादेखि अधबैंसे महिलासम्म कहालीलाग्दो बलात्कारको शिकार भइरहेका छन् । बलात्कारको सन्दर्भमा नेपालभन्दा भारतमा भयावह स्थिति छ ।

केही समयअघि भारतमा डाक्टर प्रियंका रेड्डीको बलात्कारपछि वीभत्स हत्या भएको थियो । सो घटनाले पूरै भारत हल्लाएको थियो । बलात्कार अभियोगमा प्रहरीले चार जना आरोपीलाई पक्राउ पनि गर्‍यो । त्यसको केही दिनमा प्रहरीले ती चारै जना आरोपीको इन्काउन्टर गर्‍यो ।

अधिकांश भारतीय प्रहरीको सो कदमको सराहना गर्दै सबै बलात्कारीलाई मृत्यु दण्ड दिइनुपर्ने पक्षमा थिए । केही व्यक्ति भने आरोप पुष्टि नभई इन्काउन्टर गरेर असली बलात्कारीलाई बचाउन खोजिएको हुन सक्छ भनेर सशंकित पनि भए ।

जे होस्, प्रियंका रेड्डी बलात्कार प्रकरणमा भारत उर्लियो । सामाजिक सञ्जालमा सो घटना ट्रेन्डिङ भयो । राष्ट्रिय तथा अन्तर्राष्ट्रिय मिडियाले प्रमुखताका साथ समाचार लेखे ।

तर, भारतमै यस्ता धेरै घटना छन्, जसले आवश्यकताअनुरुप मिडियामा कभरेज पाउँदैनन् । तर, चर्चा नहुँदैमा ती कम वीभत्स हुन्छन् भन्ने होइन । भारतमा यस्ता बाबु धेरै छन्, जो आफ्नी छोरीलाई न्याय दिलाउन गेट अफ इन्डियाअगाडि महिनौं धर्ना बस्छन् । र, यस्ता बाबु पनि छन्, जो पैसा लिएर आफ्नी अवाेध छोरीको साथीद्वारा बलात्कार गराउँछन् ।

उनी अहिले १२ वर्षकी भइन् । दुई वर्षसम्म हरेक सप्ताहान्तमा उनको बलात्कार गरियो । बलात्कार गर्ने प्रायः उनका बाबुका साथी हुन्थे भने कोही पैसा दिएर बालिकालाई बलात्कार गर्न पाइन्छ भन्ने थाहा पाएर आएका ग्राहक ।

सुरुमा उनका बाबुले आफ्ना साथीलाई रक्सी पिउन घरमा बोलउँथे । रक्सीले मातेपछि उनीहरू बाबु र आमाकै अगाडि उनका गुप्तांगमा जथाभावी हातपात गर्थे । कहिलेकाहीँ तिनीहरू पालैपालो उनकी आमालाई लिएर सुत्ने कोठामा जान्थे र त्यतै हराउँथे । उनका बाबु बाहिर रक्सी पिएर बसिरहन्थे ।

एक दिन उनका बाबुले उनलाई जबर्जस्ती सुत्ने कोठामा लगे । सँगसँगै बाबुका साथी पनि थिए । त्यसपछि उनका बाबुले बाहिरबाट चुकुल लगाइदिए । त्यो व्यक्तिले उनको निर्मम बलात्कार गर्‍यो । त्यतिबेला उनी केवल १० वर्षकी मात्र थिइन् ।

त्यसपछि उनको बाल्यकाल नारकीय बन्यो । उनका बाबुले उनको स्कुलको बेलासँग नजुध्ने गरी विभिन्न मानिससँग पैसा लिएर समय मिलाउँथे । ती बालिकाले परामर्शदातालाई बताएअनुसार दुई वर्षमा कम्तिमा ३० जना व्यक्तिले सयौंपटक उनको बलात्कार गरे ।

गत २० सेप्टेम्बरमा उनको विद्यालयका शिक्षकले दिएको अस्पष्ट जानकारीका आधारमा बालबालिका कल्याणकारी संस्थाका अधिकारीहरूले उनलाई स्कुलबाटै उद्धार गरेर उद्धारगृहमा लगे । त्यहाँ उनको स्वास्थ्य परीक्षण पनि गरियो । स्वास्थ्य परिक्षणबाट उनलाई पटकपटक बलात्कार गरिएको पुष्टि भएको अधिकारीहरूले बताएका छन् ।

अहिले प्रहरीले उनका बाबुसहित चार जना व्यक्तिलाई पक्राउ गरेको छ । उनीहरूलाई बलात्कार तथा बालबालिकामाथि यौन हिंसाको मुद्दा चलाइएको छ । अनुसन्धानरत प्रहरीहरूसँग उनको घरमा आइरहने २५ जना व्यक्तिको फोटो छ ।

‘मलाई कसैको अनुहार याद छैन । त्यसबेला मेरा आँखा तिर्मिराउँथे । सबै धमिलो देख्थें,’ उनले प्रहरीलाई बताएकी थिइन् ।

ती बालिकाको परिवार दक्षिण भारतको विकसितमध्येमा पर्ने शहरमा बसोबास गर्छन् । तर, शहरमा बसोबास गरे पनि उनको परिवार निकै विपन्न थियो । घटनाको संंवेदनशिलतालाई दृष्टिगत गर्दै बीबीसीले बालिकासहित घटनामा संलग्न कसैको पनि नाम र ठेगाना उल्लेख गरेको छैन ।

ती बालिकाको घरनजिकै उनका केही शिक्षक पनि बसोबास गर्थे । लामो समयदेखि फरकफरक पुरुष उनको घरमा निरन्तर आवतजावत गरेको देख्दा शिक्षकहरूलाई अचम्म लागिरहेको थियो । त्यो अचम्म विस्तारै शंकामा बदलियो । गत सेप्टेम्बरमा ती शिक्षकहरूले स्कुल प्रशासनलाई आफ्नो शंकाका बारेमा जानकारी दिएपछि यो घटना बाहिरिएको थियो ।

‘उनको घरमा केही न केही गोलमाल पक्कै छ । उनको परिवारको हर्कत पनि मलाई निको लागिरहेको छैन । एकपटक उनलाई बोलाएर यस विषयमा सोधौं !,’ शिक्षकहरूले विद्यालयलाई बताएका थिए ।

विद्यालयले तत्काल महिला सहायता केन्द्रबाट परामर्शदातालाई बोलायो । भोलिपल्ट बिहानै परामर्शदाता विद्यालयमा आइपुगे । विद्यालयले बालिकालाई आमालाई लिएर आउन भनेको थियो । त्यसपछि बालिकालाई सिधै परामर्शदातासँग लगियो भने आमालाई त्यसको भेउ नदिन सामान्य शिक्षक–अभिभावक बैठक जसरी माथिल्लो तलामा लगेर राखियो ।

‘मलाई तिम्रो परिवार र तिम्रो जीवनका बारेमा भन न,’ परामर्शदाताले बालिकालाई पहिलो प्रश्न सोधिन् । उनीहरूबीच चार घन्टा वार्तालाप भयो ।

बालिकाले सुरुमा खुलेर बोलिनन् । आफ्ना बाबु बेरोजगार भएका कारण घरमा केही समस्या रहेको भने बताइन् । बाबु बेरोजगार भएकै कारण घरको भाडा तिर्न पनि गाह्रो पर्ने र समयमै भाडा नदिए घरबाट निकाल्दिने बताइन् । त्यसपछि उनी रुन थालिन् ।

‘घरमा मात्र होइन, मेरो परिवारमा पनि केही समस्या छ । मेरा बाबुले आमालाई दुर्व्यवहार गर्नुहुन्छ,’ लामो सन्नाटापछि उनी एक्कासि बोलिन् । परामर्शदाताले उनलाई थप बताउन भनिन् ।

उनका बाबुले मात्र होइन, साथीहरूले पनि आमालाई हातपात गर्ने गरेको उनले सुनाइन् । केही दिनअघि मात्र एक जना पुरुष र आमाबीच हातपात भएको उनले सुनाइन् । पछि ती व्यक्तिले आमालाई बलपूर्वक कोठाभित्र लगेर ढोका बन्द गरेको सुनाउँदा उनी फेरि सुँक्क–सुँक्क रुँदै थिइन् । दिउँसोको समय उनी स्कुलमा हुँदा पनि थुप्रै मान्छे आफ्नो घरमा गएर आमासँग जथाभावी गर्ने गरेको उनले बताइन् ।

विस्तारै उनी खुल्दै गइन् । आफू र आफ्नी आमामाथि उनका बाबु र तिनका साथीहरूले गरेको दुर्व्यवहारका बारेमा बोल्दै गइन् । तर, उनले यौनसम्पर्क भएको वा नभएको बताएकी थिइनन् ।

दिउँसो वा राति जुनसुकै बेला पनि नचिनेका मान्छेहरू उनको घरमा रक्सी खान आउँथे । रक्सीको नसामा लिप्त भएर उनकी आमालाई बलपूर्वक जहीँतहीँ छुन्थे ।

‘तिमीलाई यौनरोग र गर्भाधानबाट जोगिने केही उपाय वा औषधिका बारेमा थाहा छ ?,’ परामर्शदाताले नजानिँदो पाराले सोधिन् ।

‘ए, हाेइन, हामी त कण्डम प्रयोग गर्छौं,’ १२ वर्षीया ती बालिकाले पहिलोपटक यौनसम्पर्क भएको स्वीकारेकी थिइन् ।

त्यसपछि बल्ल उनले आफ्ना बारेमा पनि भन्न थालिन् । खेल्नेकुद्ने बालापनमा कसरी उनलाई आफ्नै बाबुले पैसाका लागि कसैको यौनतृष्णा पूरा गर्ने खेलौना बनाएर राखेका थिए, सबै बेलिविस्तार लगाइन् ।

उनका बाबुले आफ्ना साथीलाई देखाउन जबर्जस्ती उनको नाङ्गा फोटा खिच्थे । ह्वाट्सएपमा विभिन्न व्यक्तिलाई ती फोटो पठाएर घरमा बोलाउँथे । अनि पैसा लिएर आफ्नै छोरीको बलात्कार गराउँथे ।

उनलाई एक पटक तीन महिनासम्म महिनावारीसमेत भएन । त्यसपछि अत्तालिएर उनका बाबुआमाले उनलाई डाक्टरकोमा लगे । अल्ट्रासाउन्ड गराएर गर्भपतन हुने औषधि खुवाए ।

घर त्यस्तो ठाउँ हो, जहाँ मान्छे सबैभन्दा सुरक्षित महसुस गर्छ । तर, ती बालिका आफ्नै घरमा सबैभन्दा असुरक्षित थिइन् । स्कुलबाट घर फर्किएपछि होमवर्क गर्नुपर्ने उमेरमा उनी बलात्कृत हुन्थिन् । हरेक दिन । आफ्नै बाबुको योजनाबमोजिम ।

भारतमा हरेक वर्ष बालहिंसा बढ्दो छ । यौनहिंसाको बढ्दो क्रम सबैभन्दा बढी छ । भारतको राष्ट्रिय अपराध तथ्यांक ब्यूरोका अनुसार सन् २०१७ मा मात्रै १० हजार ७ सय २१ बालबालिकाको बलात्कार भएको थियो ।

अर्थात्, हरेक दिन २८ जनाभन्दा बढी बालिका बलात्कृत हुन्छन् । हरेक घण्टा कोही न कोही बालिकाको बलात्कार भइरहेको हुन्छ । र, यो संख्या वर्षेनि बढ्दो छ ।

ती बालिकालाई त्यसयता घर जान दिइएको छैन । उनी एक उद्धार गृहमा बस्छिन् । त्यहाँ उनीजस्ता पीडित बालबालिकाहरू धेरै छन् । त्यहाँ बस्ने १२, १५ र १६ वर्षका तीन जना बालिका आफ्नै बाबुबाट बलात्कृत भएका थिए ।

उद्धार गृहमा एक्लै हुँदा उनी भित्तामा कलर पेन्सिलले केके कोर्दै बस्छिन् । सबैभन्दा बढी आफ्नी आमालाई सम्झेर कोर्छिन् । उनी आमाकाे धेरै याद गर्छिन् । आमालाई एकदम माया पनि गर्छिन् । आफ्नाे काेठाकाे भित्तामा कहिले आई लभ यू अम्मा लेख्छिन् त कहिले माया झल्किने चित्र काेर्छिन् ।

शायद आफू यता भएपछि अब आफ्ना बाबुले दिने सबै पीडा आफ्नी आमाले सहनुपरेको सोच्छिन् होला । आमाका दुःखमा सँगै हुन नपाएकोमा नराम्रो मान्छिन् होला ।

‘सरी अम्मा,’ उनले केही दिनपहिले भित्तामा कोरेर सँगै हुन नपाएकोमा आफ्नी आमासँग माफी मागेकी थिइन् ।

(बीबीसीलगायत विभिन्न सञ्चारमाध्यमा प्रकाशित रिपाेर्टबाट तयार पारिएकाे)

प्रकाशित मिति: बिहीबार, पुस ३, २०७६ १८:५३