पूर्वराष्ट्रपति मुसर्रफलाई सुनाइयो फासीकाे सजाय

A+ A A-

पाकिस्तानका पूर्वराष्ट्रपति परवेज मुसर्रफलाई फासीको सजाय सुनाइएको छ । लाहौर उच्च अदालतले उनलाई देशद्रोहको आरोपमा फासीको सजाय सुनाएको हो ।

मुसर्रफ हाल पाकिस्तानमा छैनन् । उनी दुबईमा उपचार गराइरहेका छन् । केही दिनअघि मुसर्रफले एक भिडियो जारी गर्दै आफ्नो खराब स्वास्थ्यको हवाला दिँदै जाँच आयोगलाई आफ्नो अवस्था कस्तो छ भनेर आएर हेर्न आग्रह गरेका थिए ।

मुसर्रफलाई संविधानको अवहेलना तथा गम्भीर देशद्रोहको मुद्दामा दोषी ठहर गर्दै मृत्युदण्ड सुनाएको हो ।

संविधानको अवहेलना र गम्भीर देशद्रोहको मुद्दाबारे उनले भनेका थिए, ‘यो विषय मेरो विचारमा पूरै निराधार हो । देशद्रोहको कुरा छोडौं, मैले त देशको धेरै सेवा गरें, युद्ध लडें, १० वर्षसम्म देशको सेवा गरें ।’

लाहौर उच्च अदालतको तीन सदस्य इजलासको बेन्चले यो फैसला सुनाएको हो । उनलाई ३ नोभेम्बर, सन् २००७ मा संकटकाल घोषणा गरेकोमा देशद्रोहको मुद्दा लगाइएको डनले उल्लेख गरेको छ । यो मुद्दा सन् २०१३ देखि विचाराधीन थियो ।

पाकिस्तानी सञ्चारमाध्यमले यो आदेशलाई पाकिस्तानको इतिहासमै पहिलो भएको उल्लेख गरेका छन् । सन् १९९९ मा रक्तहीन सत्तापलट गर्दै तत्कालीन प्रधानमन्त्री नवाज शरिफलाई हटाएर सेनाप्रमुख मुसर्रफले सत्ता हातमा लिएका थिए ।

मुद्दाको सुनुवाइ हुँदाहुँदै मुसर्रफ सन् २०१६ मार्च महिनामा यूएईको दुबई गएका थिए। मुसर्रफ सन् २००१ देखि २००८ सम्म पाकिस्तानका राष्ट्रपति थिए । उनलाई पाकिस्तानको संविधानको धारा ६ अनुसार दोषी ठहर गरिएको हो ।

द एक्सप्रेस ट्रिब्यूनका अनुसार तीनमध्ये दुई न्यायाधीश मृत्युदण्डको पक्षमा थिए । सो इजलासमा सेथ, सिन्ध उच्च अदालतका न्यायाधीश नजर अकबर र लाहाैर उच्च अदालतका न्यायाधीश शाहिद करिम थिए ।