नेतृत्व बहस : ‘विकास र समृद्धिको चाहना पूरा गर्नतर्फ राजनीतिज्ञ लाग्नुपर्छ’

नेतृत्व बहस : ‘विकास र समृद्धिको चाहना पूरा गर्नतर्फ राजनीतिज्ञ लाग्नुपर्छ’

A+ A A-

नेपालमा पटक पटक आमूल परिवर्तनको आसमा ठूलाठूला आन्दोलन भए । तर, नेपाली जनताले आफूले आस गरेअनुसारको नेतृत्व र विकास पाएनन् । नेपाल र नेपालीले अब चाहेको नेतृत्व कस्तो हो ? भनेर पत्रकार उमेश चौहानले पर्यटन, संस्कृति तथा नागरिक उड्डयनमन्त्री योगेश भट्टराई, युवा नेता गगन थापा र ‘वैकल्पिक शक्ति’को दाबी गर्ने रवीन्द्र मिश्रलाई राजनीतिक प्रश्न गरेपछि उनीहरूले आफू र आफ्नो पार्टीको बचाउ गर्दै ‘जनताले गरेका सामान्य आलोचनाले आत्तिनुपर्ने अवस्था नरहेको’ औँल्याए ।

‘जनताको परिवर्तनप्रतिको तीब्र चाहले उत्पन्न सामान्य आलोचनासँग आत्तिनुपर्ने अवस्था छैन’, उनीहरूले भने, ‘तर, जनअपेक्षालाई अटेर गरेर यही रफ्तारमा रहिरहनुपर्छ भन्ने होइन । जनताको विकास र समृद्धिको चाहना पूरा गर्नतर्फ राजनीतिज्ञ लाग्नुपर्छ ।’

पोखराको लेकसाइडस्थित बाराही घाटमा शुक्रबारदेखि सुरु भएको ८औँ संस्करणको नेपाल लिटरेचर फेस्टिभलको तेस्रो दिन ‘अबको नेतृत्व कस्तो हुनुपर्छ ?’ भन्ने बहसमा नयाँ पत्रिका दैनिकका सम्पादकसमेत रहेका उमेश चौहानले नेता त्रयसँग सवाल–जवाफ गरेका थिए ।

सवाल–जवाफ कार्यक्रममा बोल्दै पर्यटनमन्त्री योगेश भट्टराईले भने, ‘जनताले गरेका सामान्य आलोचनाले आत्तिनुपर्ने अवस्थामा नेपाली नेताहरू छैनन् । तर, बाहिर हल्ला भएजस्तो राजाको गतिविधिबाट कोही पनि आत्तिएको छैन ।’

‘तपाईं र अन्य मन्त्रीहरूमा के फरक ?’ भन्ने प्रश्नमा उनले रवीन्द्र मिश्रप्रति व्यङ्ग्य गर्दै भने, ‘रवीन्द्र मिश्रजीले भनेजस्तो सबै गलत भएको भए यतिबेला हामी रत्नपार्कमा मशाल बाल्दै गरेका हुन्थ्यौँ, मिश्रजीहरू बीबीसीमा कार्यक्रम चलाउँदै हुनुहुन्थ्यो ।’

‘त्यसैको जगमा रवीन्द्रजीहरू आज राजनीतिमा हुनुहुन्छ । केही लिमिटेसनका कारणले गर्दा जति रिजल्ट आउनुपर्ने हो, त्यो आएको छैन’, उनले भने, ‘तर केही भएन भन्ने कुरामा पनि सत्य छैन । हामीले अलिक फरक किसिमले काम गर्ने अभ्यास गरिरहेका छौँ, जुन कुराको अनुभूति तपाईंहरूले पनि गर्न पाउनुहुनेछ । यसका लागि सरकार तीब्र रूपमा लागेको छ ।’

युवा नेता गगन थापाले भने, ‘हामी प्रश्न नै गर्दैनौँ भन्ने त होइन, तर प्रश्न गर्नेहरूको संख्या बढाउन आवस्यक छ । जनताको विकास र समृद्धिको चाहनालाई सरकारले पूरा गर्ने दिशामा लाग्नुपर्छ । प्रतिपक्ष र जनताले अलोचनासहित खबरदारी गर्नुपर्छ ।’

एउटा फरक प्रश्नको उत्तरमा थापाले भने, ‘पुराना नेता सबै खराब र हामी सबै राम्रै राम्रो होइन । पुराना नेताहरूको योगदानको सम्मान गर्ने हो । राम्रा चिजहरू लिने हो, गलत चिजको विरोध गर्ने हो । आजको विषयको बहस नियतमा केन्द्रित गर्न जरुरी छैन ।’

नेता थापाले बोल्न जति सजिलो छ, गरेर पुर्‍याउन त्यति नै गाह्रो भएको बताए । ‘नेपालमा बोल्न जति सजिलो छ, काम गर्न त्यति सजिलो छैन’, उनले भने, ‘हामीले संस्था किन बनेनन् भन्दा पनि को सही र को खराब ? भन्ने विषयमा खुम्चिएका छौँ । वैकल्पिक दल भन्नेहरू पनि त्यही खुम्चिँदा के नयाँ भयो ? यहाँ व्यक्तिको कुरा भन्दा पनि संस्थाको कुरा गर्दा ठीक ठाउँमा पुगिन्छ ।’

नेता थापाले समाजमा जोडले भन्दा पनि आवश्यकताले नेतृत्वको जन्म हुने दाबी गरे । ‘परिस्थितिले नेतृत्व निर्माण गर्छ । अहिलेको समयमा नेतृत्वको खडेरी छैन’, उनले भने, ‘नेतृत्व स्वतन्त्र अभियानहरूबाट पनि निस्कन सक्छ । पार्टीभित्र छिर्ने ढोकाहरू फराकिलो बनाउँदा नयाँ नेतृत्वको आगमन हुन्छ ।’

साझा पार्टीका संयोजक रवीन्द्र मिश्रले अहिलेको गणतान्त्रिक व्यवस्थाप्रति आफ्नो पार्टीको कुनै बिमति नभएको बताए ।

‘अहिलेको राजनीतिक प्राणालीमा हाम्रो आपत्ति छैन तर यसको शैलीमा हाम्रो आपत्ति छ’, उनले भने, ‘यहाँ क्याम्पस प्रमुखदेखि प्राज्ञसम्म राजनीतिक नियुक्ति भएको छ । त्यस कारण हामीलाई राजनीतिक नेतृत्वको आचरणमा समस्या छ । हामी यस्तो चाहन्छौँ कि अबको नेताले प्रधानमन्त्री निवासको जग्गा नबेचोस्, कमिसनको आडमा राष्ट्रिय सम्पति नहडपोस्, प्रश्न गरेको आरोपमा कसैलाई इँट्टाभट्टामा नपोलोस् ।’

प्रकाशित मिति: आइतबार, मंसिर २९, २०७६ १८:२८