३५ प्रतिशत विद्यालय भवन अधुरै

A+ A A-

२०७२ वैशाख १२ गतेको भूकम्पले धादिङ जिल्लामा पाँच सय ८१ विद्यालयका चार हजार चार सय ३८ कक्षाकोठामा क्षति पुगेको छ। क्षति पुगेकामध्ये ६५ प्रतिशत भवन निर्माण भएका छन्।

भूकम्प प्रभावित जिल्लाहरूमा निजी आवाससँगै विद्यालयको पुनःनिर्माण पनि भइरहेको छ। त्यही क्रममा धादिङमा दुई सय ४६ विद्यालयका दुई हजार चार सय ५० कक्षाकोठा निर्माण भइसकेका छन्। निर्माण सम्पन्न विद्यालयमा पठनपाठनसमेत सुरु भइसकेको छ। तर जिल्लामा अझै ३५ प्रतिशत विद्यालयको पुनःनिर्माण बाँकी छ।

भत्किएका विद्यालय निर्माण कार्य तीन वर्षभित्रमा सक्ने शिक्षा मन्त्रालयको योजना थियो। तर निर्माण सम्पन्न गरिने समय सीमाभन्दा थप डेढ वर्ष बितिसक्दा पनि विद्यालय भवन पुनःनिर्माण पूर्ण रूपमा सम्पन्न हुन सकेको छैन। अहिले दुई सय ७२ विद्यालयका एक हजार दुई सय ५० वटा कक्षाकोठा निर्माणाधीन अवस्थामा छन्।

निर्माण सामग्रीको अभाव, ढुवानीको समस्या, कामदारको कमी जस्ता कारणले विद्यालय भवन पुनःनिर्माणमा ढिलाइ भएको जिल्ला आयोजना कार्यान्वयन इकाई धादिङका इन्जिनियर निर्मल बोगटीले बताए।

२०७२ वैशाख १२ गतेको भूकम्पले धादिङ जिल्लामा पाँच सय ८१ विद्यालयका चार हजार चार सय ३८ कक्षाकोठामा क्षति पुगेको छ। क्षति पुगेकामध्ये ६५ प्रतिशत भवन निर्माण भएका छन्। निर्माण गरिएको विद्यालय भूकम्प प्रतिरोधी छ भने छात्र, छात्रा र अपांगमैत्री शौचालयको पनि निर्माण गरिएको छ।

जिल्ला कार्यान्वयन इकाई धादिङका अनुसार संघसंस्था, विद्यालय व्यवस्थापन समिति र ठेक्का गरी तीन किसिमले विद्यालय निर्माण भइरहेको छ। संघसंस्थामार्फत ६३ वटा विद्यालयका नौ सय आठ कक्षाकोठा निर्माण सम्पन्न भइसकेको छ भने दुई सय २८ कक्षाकोठा निर्माणाधीन छन्।

त्यस्तै विद्यालय व्यवस्थापन समितिमार्फत एक सय ७६ विद्यालयका एक हजार दुई सय ६१ कक्षाकोठ निर्माण सम्पन्न भइसकेको छ भने एक सय ९४ विद्यालयमा चार सय ६४ कक्षाकोठा निर्माणाधीन छन्। त्यस्तै ठेक्कामार्फत सातवटा विद्यालयमा ६१ वटा कक्षाकोठा निर्माण सम्पन्न भइसकेको छ भने ५५ विद्यालयमा चार सय ५८ कक्षाकोठा निर्माणाधीन छन्।

प्रकाशित मिति: बिहीबार, मंसिर २६, २०७६ ०६:५४