१५ करोड ठग्न १७ बैंक दुरुपयोग

A+ A A-

प्रहरीले बैंक तथा वित्तीय संस्था ह्याक गर्ने र सामाजिक सञ्जाल प्रयोग गरेर ठगी गर्ने गिरोहका ३ जनालाई पक्राउ गरी सार्वजनिक गरेको छ । महानगरीय अपराध महाशाखाको टोलीले उनीहरूलाई सार्वजनिक गरेको हो ।

पक्राउ पर्नेमा दोलखाका रमेश खड्का, नवलपरासी रामग्रामका विश्वेश्वर तिवारी र सोही ठाउँका सन्दीप कलवार छन् । उनीहरुलाई महाशाखाको टोलीले छुट्टाछुट्टै ठाउँबाट पक्राउ गरेको हो ।

पक्राउ परेकाहरूलाई नाइजेरियन र बेलायती ह्याकरले प्रयोग गरेर नेपालमा ठगी तथा वित्तीय संस्था ह्याक गर्ने गिरोहका रूपमा प्रयोग गर्ने गरेको खुलेको महानगरीय अपराध महाशाका प्रमुख एसएसपी सहकुल थापाले जानकारी दिए ।

ठगी र बैंक ह्याकिङका प्रमुख नाइके नाइजेरिन नागरिक पिटर हेराम एसान्ज र बेलायती नागरिक स्मिथ मोरिस रहेको खुलेको प्रहरीको भनाइ छ । उनीहरूले भारत, पाकिस्तान, इथियोपिया, चीन, तान्जानियाजस्ता देशमा बसेर नेपालीलाई प्रयोग गर्ने गरेको प्रहरीको दाबी छ ।

प्रहरीका अनुसार उनीहरूले फेसबुक, भाइबर, ह्वाट्सएप, इमोजस्ता सामाजिक सञ्जाल प्रयोग गरी अनलाइनको माध्यमबाट ‘चिट्ठा परेको छ, पार्सल आएको छ’ भन्नेजस्ता सन्देश प्रवाह गरी प्रलोभनमा पारेर ठगीसमेत गर्ने गरेको एसएसपी थापाले जानकारी दिए ।

यसरी ठगी गरेको रकम उनीहरूले विभिन्न बैंकमार्फत पिटर र स्मिथ तथा उनीहरूले तोकेका व्यक्तिहरूलाई पठाउने गरेको खुलेको प्रहरीको भनाइ छ । ठगी र ह्याक गरिएको रकमकोे १५ देखि २० प्रतिशत गिरोहका सदस्यहरूले कमिसनको रूपमा पाउने गरेको प्रहरीले जानकारी दियो ।

प्रहरीका अनुसार हालसम्म उनीहरूले १४ करोड ६७ लाख ९१ हजार रुपैयाँको कारोबार गरेको खुलेको छ । सो रकम कुनै बैंक ह्याक गरी विभिन्न व्यक्तिको खातामा गएको अनुमान प्रहरीको छ ।

१७ बैंकको प्रयोग

प्रहरीका अनुसार उनीहरूले ठगी र ह्याक गरिएको रकम विभिन्न १७ वटा बैंकका खातामार्फत कारोबार गरेको खुलेको छ । कारोबार गरिएका बैंकहरूमा यसअघि ह्याक गरिएका कृषि विकास बैंक र पानस रेमिट पनि छन् ।

त्यस्तै, हिमालयन बैंक, सनराइज बैंक, सिटिजन्स बैंक इन्टरनेसनल, नबिल बैंक, लुम्बिनी विकास बैंक, बैंक अफ काठमाण्डू, प्रभु बैंक, मेगा बैंक, ग्लोबल आईएमई बैंक, माछापुच्छ्रे बैंक, एसबीआई बैंक, नेपाल बंगलादेश बैंक, सिद्धार्थ बैंक, लक्ष्मी बैंक, स्ट्याण्डर्ड चार्टर्ड बैंक नेपाल र एनआईसी एसिया बैंक प्रयोग भएको प्रहरीले जनाएको छ ।

पिटरसँग सिधा सम्पर्कमा थिए रमेश

प्रहरीले बुधबार पक्राउपछि सर्वजनिक गरेकामध्ये मुख्य नाइके हुन् दोलखाका रमेश खड्का । खड्काको हाल काठमाडौंको ठमेलमा ‘ठमेल भान्सा रेष्टुरेन्ट’ छ । त्यही रेस्टुरेन्टका ग्राहक थिए नाइजेरियन नागरिक पिटर ।

पिटर नेपालमा सन् २०१० देखि नै आउनेजाने गरेको खुलेको प्रहरीको भनाइ छ । त्यही रेस्टुरेन्टमा भएको चिनजानका आधारमा पिटरले रमेश खड्कालाई विश्वासपात्र बनाएका थिए । पिटरले ह्याकिङ गरेको रकम रमेश खड्काको बैंकको खातामा आउने गरेको थियो ।

त्यही रकम खड्काले अन्य व्यक्तिहरूको खातामा पठाउने गरेका थिए । प्रहरीका अनुसार नेपालमा रहेका पिटरका एजेन्टहरू एकै जनाले ६ भन्दा बढी बैंकहरूमा खाता खोलेर कारोबार गरेको खुलेको छ ।

यसरी खाता सञ्चालन गरेर कारोबार गर्नेमध्येमा खड्कासमेत एक रहेको प्रहरीको भनाइ छ । प्रहरीका अनुसार बैंक ह्याकिङ र ठगी गरी जम्मा पारिएको १४ करोड ६८ लाख रुपैयाँ नेपालका यी १७ बैंकबाट झिकेको देखिन्छ ।

तर, यस्तो रकम वैधानिक माध्यमबाट विदेश गएको हाे वा नेपालका कुनै पनि बैंक वित्तीय संस्थामा राखिएको भन्ने फेला नपरेको प्रहरीको भनाइ छ । यस्तो रकम कुन माध्यमबाट विदेश गयो भन्नेमा प्रहरीले अझै यकिनसाथ भन्न सकेको छैन ।

प्रहरीले बैंकहरूको भूमिकामाथि पनि शंका गरेको छ । यति ठूलो रकम बैंकबाट झिकिएको तथ्य प्राप्त भए पनि कुन व्यक्तिको खाताबाट झिकियो, कुन बैंकको कुन खातामा जम्मा पारियो वा कसरी रकम जम्मा भयो भन्ने सन्दर्भमा बैंक वित्तीय संस्थाले कुनै खोजी नगरेको प्रति प्रहरीले शंका गरेको हो ।

नेपाल राष्ट्र बैंकले कुनै व्यक्तिको खातामा १० लाख रुपैयाँभन्दा बढीको रकम जम्मा गर्दा त्यस्तो रकमको स्रोत खोजी गर्ने र राष्ट्र बैंकमा रहेको वित्तीय जानकारी इकाइलाई जानकारी गराउनुपर्ने कानुनी व्यवस्था छ । तर, यति ठूलो परिमाणको रकमको कारोबार बैंकको जानकारीबिना नै भयो वा भएन भन्नेमा प्रहरीले शंका गरेको हो ।

रमक ट्रान्सफर गर्न पिटर र स्मिथले नेपालमा मात्र ४० जनाभन्दा बढी एजेण्ट खटाएको प्रहरीको भनाइ छ । एक महिनाअघि कृषि विकास बैंक ह्याक प्रकरणका मुख्य नाइकेका रूपमा पिटर नै संलग्न रहेको प्रहरीको दाबी छ ।

उनको समूहले कृषि विकास बैंकको करिब ५ करोड रुपैयाँ ह्याक गरेर विभिन्न व्याक्तिको खातामा रकम ट्रान्सफर गरेका थिए । सोही प्रकरणमा अपराध महाशाखाको टोलीले १२ जनालाई पक्राउ गरेको थियो । यसरी पक्राउ गरेका व्यक्तिहरूमाथि अनुसन्धान जारी छ ।

प्रकाशित मिति: बुधबार, मंसिर २५, २०७६ १८:२४