पेट दुखेपछि गर्भवती महिलाको हेलिकाेप्टरबाट उद्धार

A+ A A-

सुत्केरी ब्यथा लागेकी जाजरकोट नलगाड नगरपालिका– ६ की माया बिकको हेलिकाेप्टरमार्फत उपचारका लागि सुर्खेत ल्याइएको छ । पेट दुखेर स्थानीय स्वास्थ्य चौकीमा उपचार गराइरहेकी महिलाको हेलिकाेप्टरबाट थप उपचारका लागि सुर्खेत ल्याइएको हो ।

पेट दुखेर स्थानीय नलगाड गाउँपालिका– ४ मा रहेको स्वास्थ्य संस्थामा उपचार गरिरहेको अवस्थामा नगरपालिका र स्वास्थ्य इकाइका प्रमुखको सिफारिसमा नेपाली सेनाको हेलिकाेप्टरबाट प्रदेश अस्पताल सुर्खेतमा रिफर गरिएको हो ।

सुत्केरी ब्यथा लागेर तीन दिन स्थानीय अस्पतालमा उपचार गरिरहेको र सुत्केरी हुन नसकेको भन्दै प्रदेश अस्पतालमा रिफर गरिएकी बिकले भने सुर्खेत अस्पताल आएर सुत्केरी ब्यथाले नभई सामान्य पेट मात्र दुखेको चिकित्सकलाई बताएकी छन् ।

सामान्य अवस्थामा बिरामी रहेकी बिकको थप उपचारका लागि प्रदेश अस्पतालमा पुर्‍याइएको र यहाँ उपचार गर्दा सुत्केरी ब्यथा नलागेको अवस्थामा नै रिफर गरिएको देखिएको कर्णाली प्रदेश अस्पताल सुर्खेतका मेडिकल सुपिरटेन्डेन्ट डा. डम्बर खड्काले बताए ।

‘उनलाई नेपाली सेनाको हेलिकाेप्टरबाट उद्धार गर्नु आवश्यक थिएन,’ उनले भने, ‘गाडीबाट पनि ल्याउँदा हुने अवस्थामा हेलिकाेप्टरबाट उद्धार गरिनु राज्यको सम्पत्तिकाे दुरूपयोग हो ।’

बिकको गर्भवती हुने महिना पुगेको र गर्भवती अवस्थामा विभिन्न कारणले महिलाको सामान्य पेट दुख्नेलगायतका लक्षण देखिने भए पनि बिकको अवस्था सामान्य रहेको बेला नै हेलिकाेप्टरमार्फत् उद्धार गरिरहेको मेसु डा. खड्काले बताए ।

बिकलाई स्थानीय स्वास्थ्य संस्थामा तीन दिन राखिएको र अहिले थप उपचारका लागि सुर्खेतमा नेपाली सेनाको हेलिकाेप्टरबाट उद्धार गरिएको जाजरकोट नलगाड नगरपालिका– ४ का सचिव लक्ष्मी रावलले बताए ।

सुत्केरी महिलाको अवस्था गम्भीर रहेको रिपाेर्ट नलगाड नगरपालिकाका प्रमुख, वडा कार्यालय र स्वास्थ्य चौकीले खबर गरेपछि हेलिकाेप्टरमार्फत् महिलाको उद्धार गरिएको जाजरकोटका प्रमुख जिल्ला अधिकारी जनकराज पन्तले बताए । ‘यहाँबाट नलगाड पुग्न करिब ५ घण्टा लाग्छ,’ उनले भने, ‘प्रहरी जान सक्ने अवस्थामा थिएन । जिम्मेवार व्यक्तिहरूको फोन आएका कारणले रिफर गरिएको हो ।’

प्रकाशित मिति: आइतबार, मंसिर २२, २०७६ १५:३४