एउटा कहालीलाग्दो घटना : मित्रता, विवाह, बलात्कार र जिउँदै जलाइएसम्मको कथा

A+ A A-

भारतको उन्नावमा सामूहिक बलात्कारको शिकार बनेकी युवतिले शुक्रबार राति अन्तिम सास लिइन् । दिल्लीको सफदरजंग अस्पतालमा उनकाे मृत्यु भएको हो ।

आगोले जलाइएकी युवतिलाई बचाउने प्रयासमा उन्नावबाट लखनउ र त्यहाँबाट दिल्लीको सफदरजंग अस्पतासम्म पुर्‍याइयो । तर, उनले दुई दिनभित्रै सास फेर्न बन्द गरिन् ।

उनको घर पहिलेदेखि नै शोकमा थियो, मृत्युपछि पूरै गाउँ शोकमग्न बनेको छ ।

अर्कोतिर, गाउँकै अभियुक्तका परिवारजनको पीडा पनि कम छैन ।

यो घटना झण्डै ‘निर्मला हत्या प्रकरण’जस्तै देखिन्छ ।

यसबारे बीबीसीका समीरात्मज मिश्रले तयार गरेकाे ग्राउण्ड रिपाेर्टलाई केलाउने हाे भने घटना निर्मला हत्या प्रकरणजस्तै रहस्यमय लाग्छ । यद्यपि, यसबारे प्रहरीले अनुसन्धान गरिरहेकाे छ ।

युवतिलाई जलाएर मारेको आरोपमा प्रहरीले पाँच जनालाई घरैबाट पक्राउ गरेको छ । तर, अभियुक्तका परिवारजनले ‘वास्तविक अपराधी’लाई उम्काउन आफ्ना सन्तानलाई मोहरा बनाइएको दाबी गरेका छन् ।

शोकमग्न गाउँभरी बाक्लो संख्या प्रहरी यताउता गरिरहेका छन् । गाउँलेहरु आश्चर्यचकित तथा सशंकित छन् ।

प्रहरीले शुक्रबार यो घटनामा आरोपित पाँचै अभियुक्तलाई सीजेएम अदालतमा पेस गरेको छ । अदालतले उनीहरुलाई १४ दिन न्यायिक हिरासमा पठाएको छ ।

पीडित युवतिले उपचारका क्रममा उन्नावमै मजिस्ट्रेटसमक्ष बयान दिएकी थिइन् । त्यही बयानको आधारमा प्रहरीले पाँच जनालाई गिरफ्तार गरेको हो ।

पीडितको घरको अवस्था

उन्नाव शहरभन्दा करिब ५० किलोमिटर टाढा छ बिहार । त्यहाँ हिन्दुपुर भन्ने गाउँ छ । गाउँभन्दा केही भित्र माटो, फूस र खयरले बनाइएको एउटा कच्चा घर छ । त्यही हो पीडित युवतिको घर ।

युवतिका वृद्ध बुवा घरको पिँढीमा चुपचाप बसेका भेटिन्छन् । उनलाई ठूलो पछुतो छ कि आफ्नी छोरीलाई आफैंले स्टेसनसम्म छोड्न गएको भए बिहीबार शायद यो घटना नै हुँदैन थियो । तर, त्यो दिन छोरी एक्लै स्टेसनतिर लागिन् ।

मृतक युवतिको भाउजु भन्छिन्, ‘अदालतको काम होस् वा आफ्नो कुनै काम लिएर बाहिर जानुपर्दा उनी दाइ वा दिदीसँग जान्थिन् ।’

पीडित युवति पाँच दिदी र दुई दाइमा सबैभन्दा कान्छी थिइन् ।

पहिले प्रेम विवाह र पछि सामूहिक बलात्कार

युवति र छिमकका एक युवकबीच चिनजान थियो । पछि यी दुईले आपसमा प्रेम विवाह गरेका थिए तर कालान्तरमा सम्बन्ध बिग्रियो ।

युवतिले यही वर्ष मार्चमा केटा र उसको एक साथीविरुद्ध सामूहिक बलात्कारको उजुरी दायर गरेकी थिइन । तीमध्ये मुख्य अभियुक्त शिवम त्रिवेदी जेल गए र केही दिनअघि मात्र उनी जमानतमा छुटेका थिए ।

युवतिको भाउजू भन्छिन्, ‘दुई जनाले कहिले बिहे गरे यो कुरा मलाई थाहा थिएन । केटा पक्षका मान्छेहरु यहाँ आएर झगडा गरेपछि मात्रै मैले विवाह गरेकोबारे थाहा पाएको हुँ । त्यतिबेला मात्रै नन्दले बताइन, उनले शिवमसँग कोर्ट म्यारिज गरेकी रहिछन् । अहिले शिवमले उनलाई स्वीकार गर्न मानिरहेको थिएन ।’

अभियुक्तहरुको घरको माहोल

युवतिको घरबाट करिब आधा किलोमिटरको दूरीमा मुख्य अभियुक्त र यो घटनामा समातिएका अन्य अभियुक्तहरुको घर छ ।

एक मन्दिरको बाहिर केही महिलाहरु भेला भएका थिए र नराम्रोसँग रोइरहेका थिए । यीमध्ये अधिकांश महिलाहरु ती थिए जो समातिएका अभियुक्तका नातेदार हुन् ।

उनीहरु भनिरहेका थिए कि यो घटनामा समातिएकाहरु षड्यन्त्रपूर्वक फसाइएका हुन् ।

मुख्य अभियुक्त शिवम त्रिवेदीकी आमा आफ्नो छोराले विवाह नै नगरेको बताउँछिन् । उनले यो घटनामा शिवम संलग्न नभएको दाबी पनि गरिन् । शिवम त्रिवेदीकी आमा पीडित परिवार र प्रहरीको दाबीलाई अस्वीकार गरिरहेकी छन् ।

यो घटनामा हिन्दूपुर गाउँकी प्रधान शान्तिदेवीका पति र उनका छोरा पनि पक्राउ परेका छन् । शान्तिदेवी भन्छिन्, ‘बिहानबिहानै प्रहरी आयो, मेरा पति र छोरालाई उठाएर लिएर गयो । अन्य केटाहरुलाई पनि लग्यो । म सोध्न चाहन्छु कि यत्रो ठूलो अपराध गरेपछि के कोही घरमा आरामले सुत्छ ? हाम्रो बच्चाको भविष्यमाथि खेलवाड गर्दै अपराधी बनाइएको छ ।’

यही वर्ष मार्चमा पीडित युवतीले आफूमाथि भएको सामूहिक बलात्कारको उजुरी दायर गरेकी थिइन्, त्यसमा शिवम त्रिवेदीसँगै ग्राम प्रधान शान्तिदेवीका छोरालाई समेत अभियुक्त बनाइएको थियो ।

त्यसपछि यो घटनामा शिवम मात्र पक्राउ परेका थिए । अभियुक्तका परिवारले घटनालाई सीबीआईमार्फत अनुसन्धान गर्न माग गरेका छन् ।

पीडित र अभियुक्तका परिवारबीचको सम्बन्ध

युवतिलाई आगोले जलाएको घटना स्थानीय समयअनुसार बिहीबार बिहान करिब ४ बजेको हो । पीडित युवति रायबरेली जाने ट्रेन चढ्न गइरहेकी थिइन् जुन ट्रेन बिहान ५ बजे स्टेसनमा आइपुग्थ्यो ।

पीडित युवतिको घरभन्दा स्टेसन करिब दुई किलोमिटर टाढा छ । घरबाट स्टेसन पुग्दा झाडीको बाटो हुँदै जानुपर्छ ।

सोही गाउँका रामकिशोर भन्छन्, ‘यही कारण जब युवतिलाई जलाइयो, टाढासम्म भाग्दा पनि उनले मद्दत पाउन सकिनन् ।’

पीडित युवती र अभियुक्तका परिवारबीच वर्षौंदेखि राम्रो सम्बन्ध रहेको गाउँलेहरु बताउँछन् । पीडित परिवारको सम्बन्ध गाउँकी प्रधानसँग पनि निकै राम्रो थियो, यो कुरा पीडित युवतिका बुवा पनि स्वीकार गर्छन् । प्रधान परिवारले पीडित युवतिका परिवारलाई बेलाबेला विभिन्न खालका सहयोग गर्ने गरेको थियो ।

तर, जब केटी र केटाबीच सम्बन्ध बिग्रियो, त्यसपछि दुई परिवारसँगै प्रधानको परिवारसँग पीडित युवतीको परिवारको ‘दुश्मीन’ सुरु भयो । यसको कारण यही हो कि मुख्य अभियुक्त शिवम त्रिवेदी प्रधानको परिवारकै सन्तान हुन् ।

पीडित युवतिका बुवा भन्छन्, ‘हामीलाई धेरैपटक धम्काइयो । मेरो घरमा आएर मलाई उनीहरुले पिटे र गाउँ छोड्नका लागि धम्की दिए । मैले कैंयौं पटक प्रहरीमा उजुरी दिएँ, तर हामीलाई प्रहरीले पनि सुनेन ।

उब्जिएका केही प्रश्न

गाउँमा मानिसहरु यो घटनालाई लिएर कैयौं प्रश्नहरु उठाइरहेका छन् । पक्राउ गरिएका अभियुक्तमाथि अहिलेसम्म कुनै पनि मुद्दा दर्ता भएको छैन । युवतिमाथि भएको सामूहिक बलात्कारको घटनाभन्दा पहिले शिवम त्रिवेदी र शुभव त्रिवेदीमाथि पनि कुनै मुद्दा चलाइएको थिएन ।

बिहार थानाका प्रहरीले यो कुरा पुष्टि गर्दै भनेका छन्, ‘यति मात्रै होइन, घटनालगत्तै जब प्रहरी अभियुक्तका घरमा पुग्यो, सबै घरमै बसिरहेका थिए ।’

गाउँका बुजुर्ग सीताराम भन्छन, ‘यी केटाहरु (अभियुक्त)लाई म बच्चैदेखि राम्रोसँग चिन्छु । गाउँमा कहिल्यै उनीहरुले यस्तो खालको अपराध गर्न खोजेको कुरा सुनिएन । म पनि अचम्ममा परेको छु कि अहिले तिनै केटाले यस्तो जघन्य अपराध कसरी गरे होला त ? हाम्रो गाउँमा यस्तो खालको अपराध अहिलेसम्म भएको थिएन र मलाई लाग्दैन कि हाम्रो गाउँका केटाहरुले कसैलाई जिउँदै जलाउँछन् ।’

उन्नावमा यो घटनालाई सुरुबाटै नियालिरहेका केही प्रहरी अधिकारी पनि सीतारामको आशंकासँग सहमत छन् । तर, यसबारे उनीहरु आधिकारिक रुपमा केही बोल्न चाहँदैनन् ।

गाउँमा केही मानिसले मिडियामाथि पनि प्रश्न उठाएका छन् । अन्य मानिसले त प्रश्न उठाए तर मिडियाले पनि पीडित पक्षप्रति बढी सहानुभूति देखाउँदा निर्दोष व्यक्तिहरु फस्ने खतरा बढेको गुनासो उनीहरुले गरेका छन् ।

हुन त यो घटनामा अहिले प्रहरीले अनुसन्धान गरिरहेको छ । तर, हिन्दुपुरवासीको आशंका बुझ्दा लाग्छ, यो घटना नेपालमा अघिल्लो वर्ष भएको ‘निर्मला पन्त बलात्कार र हत्या प्रकरण’जस्तै देखिन्छ ।

कतिपय प्रहरी अधिकारीले पनि ‘उन्नाव घटना’लाई रहस्यमय भनेका छन् ।

नेपालमा निर्मला पन्त हत्या प्रकरणमा दर्जनौंलाई समातिएको थियो । तर, समातिएका कोही पनि अपराधी प्रमाणित भएनन् । बरु कतिपय निर्दोष यो घटनाको अनुसन्धानबाट पीडित बने । अहिलेसम्म अपराधी पत्ता लागेको छैन ।

कतिपय भारतीय मिडियाले पनि ‘उन्नाव ग्याङ रेप’लाई नेपालको ‘निर्मला पन्त हत्या प्रकरण’जस्तै भनेर रिपोर्टहरु बनाएका छन् ।

प्रकाशित मिति: शनिबार, मंसिर २१, २०७६ १६:३६