आस गरिएका खेलाडी हारे पनि तेक्वान्दोलाई इतिहास रच्ने अवसर

A+ A A-

१३औं दक्षिण एसियाली खेलकुद (साग) अन्तर्गत तेस्रो दिनसम्म तेक्वान्दोमा मात्रै नेपालले ११ स्वर्ण, ३ रजत र ९ कास्य पदक जितेको छ । योसँगै नेपाल तेक्वान्दोमा स्वर्ण जित्ने शीर्ष टोलीमा परेको छ ।

नेपालको तेक्वान्दो इतिहासमा आठौं सागपछिको दोस्रो ठूलो सफलता हो, यो । आठौं सागमा नेपालले तेक्वान्दोमा १४ स्वर्ण आफ्नो नाममा पारेको थियो । जबकि, आठौं सागमा नेपालले कुल ३१ स्वर्ण जितेको थियो । त्यसयता भने नेपालको तेक्वान्दोको साख गिर्दो थियो ।

पाकिस्तानमा सम्पन्न नवौं सागमा ६ स्वर्ण पदक हात पारेको तेक्वान्दोले श्रीलंकाको १०औं र बंगालादेशमा भएको ११औं सागमा २—२ स्वर्ण पदक मात्र जितेको थियो ।

भारतमा सम्पन्न १२औं सागमा त नेपाल तेक्वान्दोमा स्वर्ण पदकविहीन नै हुन पुग्यो । तर, १३औं सागमा आईपुग्दा नेपालले आठौं सागको लय फेरि समातेको छ । तेक्वान्दोमा अझै ६ वटा स्वर्ण पदकको खेल बाँकी छ ।

तेक्वान्दो टिमका मुख्य प्रशिक्षक नवीनकुमार श्रेष्ठ १३औं सागमा तेक्वान्दोका खेलाडीले अहिलेसम्मकै सबैभन्दा राम्रो प्रर्दशन गरेको बताउँछन् । उनी भन्छन्, ‘अझै ६ वटा स्वर्णको लागि खेल बाँकी छ । अहिलेसम्मको नतिजा सन्तोषजनक छ, यो भन्दा अझै राम्रो हुन्छ ।’

बाँकी ६ स्वर्ण पदकमध्ये नेपालले चार स्वर्ण पदक हात पारे तेक्वान्दोले नयाँ इतिहास रच्नेछ ।

आस गरिएका खेलाडी पराजित

बुधबार ६ स्वर्ण पदकको लागि भएको खेलमा नेपालबाट स्वर्ण पदकको दाबेदार मानिएका खेलाडी भने पराजित हुन पुगे ।

सन् २०१६ को ओलोम्पिकसमेत खेलेकी अनुभवी खेलाडी निशा रावल र ज्ञानेन्द्र हमालले यसपटक निराश बनाए ।

७३ किलोमाथिको महिला खेलमा निशा फाइनलमा भारतकी रोधाली बरुवासँग ३२—९ अंकले पराजित भइन् । सेमिफाइनलमा श्रीलंकाका खेलाडीलाई ३६—१० ले हराउँदै फाइनलको यात्रा तय गरेकी निशा भारतकी बरुवासँग भने पहिलो राउण्डमा बराबरी खेल्नुबाहेक दोस्रो राउण्डदेखि खेल्न सकिनन् ।

दोस्रो राउण्डमा भारतकी बरुवाले १९ अंक ल्याउँदा निशा ७ अंकमै सीमित थिइन् । तेस्रो राउण्डमा केही आक्रामक देखिएकी निशाले अंक जोड्नुको साटो झन् गुमाइन् र भारतकी बरुवासँग ३२—९ अंकको अन्तरले पराजय बेहोरिन् ।

पहिलोपटक सागमा सहभागी भएका ६३ किलो तौल समूहका २३ वर्षीय ज्ञानेन्द्र हमालसमेत भारतकै सौरभसँग सेमिफाइनमा हारे । अग्ला कदका खेलाडी हमालबाट तेक्वान्दोले स्वर्ण पदककै आस गरेको थियो । त्यसो त, उनले पहिलो खेलमा भुटानका मेग्मा वाग्गुक तामाङलाई २०—५० अंकको फराकिलो अन्तरले पराजित गरेका थिए । तर, भारतका सौरभसँग भने अन्तिम समयमा दुई अंक जोड्न नसक्दा २६—२४ को अन्तरमा खेल गुमाए ।

मंगलबार १२औं सागकी कास्य पदक विजेता नीमा गुरुङलेवसमेत स्वर्ण जित्न सकिनन् । ५७ किलो तौल समूहकी नीमा भारतकी कसिस मल्लिकसँग एक अंकले हारेकी हुन् ।

पहिलो राउण्डमा अग्रता लिएकी नीमा दोस्रो राउण्डमा सम्हालिन नसक्दा पराजित हुन पुगिन् । उनीबाट तेक्वान्दोले स्वर्ण पदकको आशा गरेको थियो । १२औं सागमा पनि उनी फाइनलमा भारतसँगै पराजित भएकी थिइन् ।

यी हुन् तेक्वान्दोमा स्वर्ण जित्ने खेलाडी
१. वीरबहादुर महरा, ग्यारोगी, (पुरुष ६८ किलो)
२. सक्षम कार्की, ग्यारोगी (पुरुष ८७ किलो माथि)
३. काजल श्रेष्ठ, ग्यारोगी (महिला ४६ किलो)
४. संगीता बस्याल महिला ६७ किलो —
५. सिना मादेन, पुम्से (महिला १८ —२३ वर्ष)
६. निशा दर्नाल, स्वस्तिका तामाङ, सन्जिला तिम्सिना, (समूह पुम्से)
७. पार्वती गुरुङ, पुम्से (महिला २४—२९ वर्ष)
८ तीना गुरुङ, प्रशंसा क्षेत्री, सुशीला राई, (समूह पुम्से)
९ आयषा शाक्य, पुम्से (महिला ३० वर्ष माथि)
१० आयषा शाक्य र सन्जीत ओझा, (युगल पुम्से)
११ कमल श्रेष्ठ, पुम्से, (२४ —२९ वर्ष)

प्रकाशित मिति: बुधबार, मंसिर १८, २०७६ १९:४०