विदेशी रेफ्रीलाई र्‍याडिसनको भात, नेपालका रेफ्रीको छाप्रोमा बास

A+ A A-

१३औं सागअन्तर्गत आज ललितपुरस्थित एन्फा कम्प्लेक्समा तेक्वान्दोका खेलहरू भइरहेका छन् । बिहानदेखि जारी खेलमा यतिबेला खाना खाने समय भएको छ । तपाईंलाई लाग्ला खेलाडी र रेफ्रीहरू नै पाँचतारे होटलमा खाना खाइरहेका छन् । तर, वास्तविकता भने लाजमर्दो नै छ ।

तेक्वान्दो खेलाइरहेका स्वदेशी १२ र विदेशी १४ जना अन्तर्राष्ट्रिय रेफ्रीको खाना र बासमा समेत राष्ट्रिय खेलकुद परिषदले विभेद गरेको पाइएको छ । राखेपले १४ विदेशी रेफ्रीलाई होटल र्‍याडिसनबाट खाना ल्याएर खेलस्थलमै खुवाएको छ । उनीहरूलाई बासस्थानको व्यवस्थासमेत सोही होटलमा गरिएको छ । तर, नेपालका १२ जना अन्तर्राष्ट्रिय रेफ्री भने खाना समय भएपछि भात खोज्दै सातदोबाटो चोकसम्म भौंतारिरहेका छन् ।

उनीहरूका लागि राखेपले न भातको व्यवस्था गरेको छ, न बासस्थानको नै । खाना खाने समयमा सातदोबाटो चोकनजिकै भातहोटल खोज्दै हिँडेका एक नेपाली अन्तर्राष्ट्रिय रेफ्रीले भने, ‘राखेपले हामीलाई भात खाने व्यवस्था मिलाएन, त्यही भएर भात कहाँ पाइन्छ भन्दै खोजिरहेका छौं ।’

खेल रोकेर खेलाडी तथा रेफ्रीका लागि अहिले राखेपले ५० मिनेटको खाना खाने समय दिएको छ । सो समयमा विदेशी अन्तर्राष्ट्रिय रेफ्रीहरू भने तेक्वान्दो संघको कार्यालय परिसरमा खाना खाइरहेका छन् । नेपालका रेफ्रीहरू भने खाना खाने होटल खोज्दै हिँडिरहेका छन् ।

खाना मात्र होइन, उनीहरूलाई बस्ने व्यवस्था नगर्दा सामान्य छाप्रे होटलमासमेत आफूहरू बस्नुपर्ने अवस्था आएको नेपाली रेफ्रीहरूले गुनासो गरे ।

राखेपले नेपाली रेफ्रीलाई दैनिक २ हजार रूपैयाँ उपलब्ध गराएको छ । सो रकमबाटै उनीहरूलाई खाने र बस्ने व्यवस्था मिलाउन भनिएको छ ।

तेक्वान्दोतर्फका पुम्से र ग्यारोजी विधामा आठ देशका खेलाडीले प्रतिस्पर्धा गरिरहेका छन् । हालसम्म चार खेल सकिँदा नेपालले २ श्रीलंकाले १ र बंगलादेशले १ स्वर्ण जितेका छन् ।

खानासमेत नदिएपछि नेपाली अन्तर्राष्ट्रिय रेफ्रीहरूले भने विभेद गरेको भन्दै गुनासो गरेका छन् । नेपाल तेक्वान्दो संघका महासचिव दीपराज गुरूङका अनुसार नेपाली र विदेशी दुवै रेफ्रीको हैसियत भने समान हो ।

‘राखेपले विभेद गरेको थाहा पाएँ, किन यसो गरेको हो, त्याे भने थाहा भएन, तर यो आपत्तिजनक कार्य हो । राखेपले राम्रो काम गरेन,’ गुरूङले शिलापत्रसँग भने ।

प्रकाशित मिति: सोमबार, मंसिर १६, २०७६ १४:५६