नेकपाका ठूला नेताले क्षेत्र गुमाए, भक्तपुरमा ‘घरवेटी असर’

A+ A A-

प्रतिनिधिसभा, प्रदेशसभा र स्थानीय तहका ५२ जनप्रतिनिधि निर्वाचित गर्न शनिबार सम्पन्न उपनिर्वाचनको मत परिणामले सत्तारुढ दलका प्रभावशाली नेताले पकड गुमाउन थालेको संकेत दिएको छ ।

स्थानीय तहको निर्वाचनको मत परिणामबाट सत्तारुढ नेकपाका अध्यक्ष पुष्पकमल दाहाललाई पनि धक्का महसुस गराएको छ । भक्तपुर १ को ‘क’ बाट प्रदेशसभा सदस्य निर्वाचनमा नेकपाले उम्मेदवार बनाएका पूर्वमाओवादी नेता डीपी ढकाल पराजित भएपछि दाहाललाई धक्का पुगेको हो ।

ढकाल तत्कालीन अर्थमन्त्री तथा हालका उर्जा मन्त्री वर्षमान पुनका स्वकीय सचिव पनि थिए । सो क्षेत्रबाट २०७४ को निर्वाचनमा तत्कालीन एमालेका उम्मेदवार हरिशरण लामिछाने विजयी भएका थिए । उनको निधन भएपछि सो क्षेत्रमा उपनिर्वाचन भएको हो ।

उपनिर्वाचनको मुखमा भक्तपुरको खरिपाटीदेखि पर्यटकीय नगरी नगरकोट जाने बाटो पाँच वर्षदेखि नबनाई धुलाम्मे बनाएको भन्दै स्थानीयवासीले विरोध जनाएका थिए । उनीहरुले सो वाटो छेउका वासिन्दा हिलो र धुलो खाएर आजित भएको भन्दै सडक निर्माणको ठेक्का पाएका ठेकेदारबिरुद्ध सडकमै उत्रनु परेको थियो ।

संयोग वा नियत सो सडक निर्माणको ठेक्का पाएर सडक निर्माणमा ढिलाई गर्ने शैलुङ कन्ष्ट्रक्सनका प्रोपाइटर शारदाप्रसाद अधिकारी नेकपाका अध्यक्ष पुष्पकमल दाहालका घरवेटी हुन् ।

पूर्वमाओवादी नेता तथा नेकपा अध्यक्ष दाहालकै जोडवलमा प्रदेशसभा सदस्यको टिकट पाएका ढकाललाई उम्मेदवार बनाउनु नै घातक भएको पूर्वएमाले नेताहरुको दाबी छ ।

खरिवोटदेखि नगरकोटसम्मको बाटो निर्माण नगरी स्थानीयलाई सास्ती दिने ठेकेदार प्रचण्डको घरवेटी हुनु र अहिले प्रदेशसभा सदस्यमा उपनिर्वाचन लड्ने व्यक्ति पनि प्रचण्डकै लाईनका हुनु नेकपा निर्वाचनमा पराजित हुनुको मूल कारण भएको स्थानीयबासीको दाबी छ ।

पर्यटन वर्ष २०२० को घोषणा गरेर पर्यटकीय नगरी नगरकोटको बाटो नबनाएको रिस स्थानीयले मतदान मार्फत पोखेका छन् । सो सडक क्षेत्र भक्तपुर १ को ‘क’ मा पर्छ ।

कांग्रेसबाट उम्मेदवार बनेका कृष्णलाल भँडेल लोकप्रिय भएर चुनाव जितेका भने होइनन् । भँडेलको तुलनामा ढकाल लोकप्रिय हुन नसक्नु, सांगठानिक बर्चश्व भएको पूर्वएमालेकालाई टिकट नदिनु नै सत्तारुढ दलका उम्मेदवार पराजित हुनुको मूल कारण बनेको स्थानीय नेकपा नेताहरु बताउँछन् ।

पराम्परागत राजनीतिक बर्चश्व कायम राखेको नेपाल मजदुर किसान पार्टीले आफू एक्लैले चुनाव जित्न नसकेपछि नेकपाको साईज घटाउन पनि कांग्रेसलाई सहयोग गरेको देखिन्छ । तथापि चुनाव भने राप्रपाको सहयोगमा भँडेलले जिते । तर २०७४ सालमा राप्रपाले पाएको मत तुलना गर्ने हो भने राप्रपाले सहयोग गरेको देखिँदैन ।

भरतपुरमा पनि नेकपालाई धक्का

दाहालको गृह जिल्ला चितवनस्थित भरतपुर महानगरपालिका–१६ मा नेकपाका वडाध्यक्षका उम्मेदवार पराजित भएका छन् । कांग्रेसका अमृतराज हमाल सत्तारुढ नेकपाको गढलाई भत्काउन सफल भएका छन् ।

चितवनको खैरहनी नगरपालिका ४ र ५ वडामा समेत कांग्रेसले सिट सुरक्षित गरेको छ ।

लालवावुको क्षेत्रमा पनि गुम्यो

मोरङको धनपालथान गाउँपालिका–२ को वडाध्यक्ष समेत कांग्रेसले नेकपाबाट खोस्न सफल भएको छ । यो क्षेत्र नेकपाका नेता तथा पूर्वमन्त्री लालबाबु पण्डितको जिल्ला हो ।

मुख्यमन्त्रीलाई पनि धक्का

उपनिर्वाचनको परिणामले नेकपा नेता तथा प्रदेश ५ का मुख्यमन्त्री शंकर पोखरेललाई पनि धक्का दिएको छ ।

पोखरेलको निर्वाचन क्षेत्र घोराही उपमहानगरपालिका–१६ को वडाअध्यक्षमा कांग्रेसका तारावहादुर डिसी निर्वाचित भएका छन् । यसअघि सो क्षेत्रमा तत्कालीन एमालेका लक्ष्मी वुढामगरले जितेका थिए ।

सो वडामा नेकपाका जगलाल चौधरी वागी उठेर सात सय मत ल्याए । यो मत जोड्दा चुनाव नेकपाले जित्थ्यो । तर पोखरेलले वागीलाई मिलाउन नसकेपछि नेकपाका उम्मेदवार पराजित भए ।

प्रकाशित मिति: आइतबार, मंसिर १५, २०७६ १६:०६