बक्सिङमा स्वर्ण पदक आश गरिएका यी तीन खेलाडी

A+ A A-

१५ मंसिर आइतबार (आज) देखि दक्षिण एसियाली खेलकुदको १३औं संस्करण औपचारिक रूपमा उद्घाटन हुँदै छ । ५ बजे राष्ट्रपति विद्यादेवी भण्डारीले दशरथ रंगशालाबाट औपचारिक उद्घाटन गर्नेछिन् ।

१३औं सागमा कुल ३१ वटा विधाका खेलकुद समावेश गरिएका छन् । नेपालको तर्फबाट सबै विधाका खेलाडीले प्रतिस्पर्धा गर्नेछन् । यसमध्ये साग खेलकुदमा नेपालको तर्फबाट स्वर्ण पदकको धेरै आशा गरिएका खेलभने मार्सलआर्ट विधाका रहेको राष्ट्रिय खेलकुद परिषद (राखेप) ले जनाएको छ ।

मार्सल आर्टमध्ये तेक्वान्दो, कराते, बक्सिङ, उसु, जुडोबाट अझ धेरै स्वर्णकाे आश गरिएको छ । सागमा बक्सिङबाट १६ खेलाडीले प्रतिस्पर्धा गर्नेछन् । जसमा १० पुरुष र ६ महिला सहभागी रहेको बक्सिङ खेलमा मुख्य प्रशिक्षक प्रकाश थापा मगरले जानकारी दिए । उसो त प्रकाश थापा मागर आफैं आठौं साग खेलकुदका स्वर्ण पदक विजेता खेलाडी हुन् ।

त्यस्तै, आठौं सागमा रामचन्द्र थापा मगरले समेत स्वर्ण पदक हात पारेका थिए । उनीहरू दुवै दाजुभाइ हुन् । त्यस कारण पनि बक्सिङबाट १३औं सागमा स्वर्ण पदकको आश गरिएको छ ।

त्यसो त आठौं सागयता भने बक्सिङ खेलको इतिहास सम्झनालायकको छैन् । आठौं सागयता बक्सिङ खेलले चाहेअनुरुपको पदक हात पार्न सकेको छैन् । तर, यसपालि आफ्नै भूमिमा हुने खेल भने सम्झनलायक हुनेमा प्रशिक्षक थापा आशावादी छन् ।

उनी भन्छन्, ‘बक्सिङ खेलाडी १३औं सागको तयारीका लागि यसअघि दुई महिना बन्द प्रशिक्षणका लागि थाइल्याण्ड ट्रेनिङ गरेर नेपाल फर्किएका छन् । त्यसयता पनि खेलाडी नियमित अभ्यासमै छन् । आशा छ, यो सागमा खेलाडीले राम्रो खेल्नेछन् ।’

सहभागी खेलाडी सबैको खेल राम्रो भए पनि अझ दुई जना पुरुष र एक जना महिलाको खेल उकृष्ट रहेको प्रशिक्षक थापाको भनाइ छ । पुरुषमा भूपेन्द्र थापा, दीपक श्रेष्ठ र महिलामा संगीता सुनारको खेल उत्कृष्ट रहेको उनको भनाइ छ । उनीहरू तीनै जना विभागीय खेलाडी हुन् । बक्सिङ मंसिर २० गतेदेखि चार दिन चल्नेछ ।

यस्तो छ यी तीन खेलाडीको पृष्ठभूमि

भूपेन्द्र थापाः ६४ किलो तौल समूहका भूपेन्द्र थापा नेपाल पुलिस क्लबका व्यावसायिक बक्सिङ खेलाडी हुन् । उनीसँग राष्ट्रिय र विभिन्न अन्तर्राष्ट्रिय बक्सिङ खेलको अनुभव छ ।

दुई पटक एसियन गेममा सहभागी भूपेन्द्रको साग गेम भने पहिलो हो । भारतमा सम्पन्न १२औं सागमा उनी चोटका कारण खेल्न सकेनन् । १३औं सागको बक्सिङमा भने उनलाई स्वर्ण पदककाे दाबेदार खेलाडीकाे रूपमा लिइएकाे छ ।

दीपक श्रेष्ठः नेपाल आर्मी क्बलका व्यावसायिक खेलाडी हुन् दीपक श्रेष्ठ । ७५ किलो तौल समूहका उनको यो दोस्रो साग गेम हो । यसअघि भारतमा सम्पन्न १२औं सागमा उनले कास्य पदक हात पारेका थिए ।

श्रेष्ठसँग थुप्रै अन्तर्राष्ट्रिय खेल खेलेको अनुभव छ । तीन पटक उनले एसियन गेम र वर्ल्ड च्याम्पियनसिप खेलिसकेका छन् । १३औं सागको स्वर्ण पदकका लागि उनी दाबेदार खेलाडीमध्येका एक हुन् ।

संगीता सुनारः महिला ६० किलो तौल समूहकी संगीता सुनार १३औं सागमा स्वर्ण पदक जित्ने आशा गरिएकी महिला खेलाडी हुन् । सशस्त्र प्रहरी बल (एपीएफ) क्बलकी व्यावसायिक बक्सिङ खेलाडी संगीतासँग १२औं सागको अनुभवसमेत छ ।

त्यस्तै, राष्ट्रिय अन्तर्राष्ट्रिय खेलको अनुभव हासिल गरेकी संगीता १३औं सागकी बक्सिङबाट स्वर्ण पदको आश गरिएको पहिलो रोजाइकी महिला खेलाडीसमेत हुन् ।

बक्सिङका अन्य खेलाडी

पुरुष तौल
सुशील थापामगर ४९ किलो
राजबहाजुर देउवा ५२ किलो
पूर्ण राई ५६ किलो
सुनील शाही ६० किलो
भूपेन्द्र थापामगर ६४ किलो
विकास लामा ६९ किलो
दीपक श्रेष्ठ ७५ किलो
गणेश प्रधान ८१ किलो
अर्जुन सिघु ९१ किलो
आशिष दुवाडी ९१ किलोमाथि

महिला तौल
ललिता महर्जन ४८ किलो
माला राई ५१ किलो
मिनु गुरुङ ५४ किलो
चन्द्रकला थापा ५७ किलो
संगीता सुनार ६० किलो
पुनम रावल ६४ किलो

प्रकाशित मिति: आइतबार, मंसिर १५, २०७६ ११:५०