आईसीयूमा प्रधानमन्त्रीको दैनिकीः राधिका पढ्छिन्, उनी सुन्छन्

A+ A A-

प्रधानमन्त्री केपी शर्मा ओली एपेण्डिसाइटिसको शल्यक्रियापछि महाराजगञ्जस्थित मनमोहन कार्डियोथोरासिक भास्कुलर तथा ट्रान्सप्लान्ट सेन्टरको आईसीयूमा उपचाररत छन् ।

दुवै मिर्गौलाले शतप्रतिशत काम नगरेपछि उनको अस्पतालमा नियमित डायलासिस भइरहेको थियो । डायलासिस चलिरहेका बेला चार दिनअघि उनलाई अचानक पेट दुख्यो । चिकित्सकहरूले एपेण्डिसाइटिस भएको भन्दै अपरेशन गरिदिए ।

अपरेशनको तेस्रो दिनसम्म उनी हलचल गर्न सक्दैनथे । तर, चौथो दिनपछि प्रधानमन्त्री ओली आईसीयू कक्षबाटै सक्रिय हुन थालेका छन् ।

जतिसुकै बिरामी भए पनि आत्मविश्वासले रोग जित्ने क्षमता बनाएका ओलीले शल्यक्रियाबाट होस खुल्नेबित्तिकै चिकित्सकहरूलाई सोधे, ‘यहाँ टीभी हेर्न मिल्दैन ?’

उपचारमा संलग्न चिकित्सकहरूका अनुसार उनलाई आईसीयूमा टीभी हेर्न नहुने र आरामको जरुरत भएको बताइयो । ओलीकी निजी चिकित्सक दिव्या सिंहका अनुसार ओली आगामी सोमबारसम्म आईसीयूमै रहनुपर्नेछ । अन्य बिराम पनि भएका कारण जनरल बेडमा सार्दा संक्रमणको खतरा हुने भएपछि आईसीयूमै उनको उपचार हुनेछ ।

सोमबारसम्म पनि आईसीयूमै बस्नुपर्ने भएपछि यति बेला प्रधानमन्त्री ओली अस्पतालमै पत्याउनै नसक्ने गरी सक्रिय भएका छन् ।उपचारमा संलग्न चिकित्सकका अनुसार ओलीलाई चिकित्सकबाहेक पत्नी राधिका शाक्यलाई मात्र भेट गर्न दिइएको छ ।

हिजो राष्ट्रपति विद्यादेवी भण्डारीले भेटेर फर्किएपछि ओलीले चिकित्सकसँग आफुलाई अध्ययन गर्न मन लागेको बताए ।चिकित्सकहरूका अनुसार ओलीको स्वास्थ्य अवस्था पढ्न सक्ने अवस्थामा छैन । त्यसैले चिकित्सककै सल्लाहअनुसार अहिले प्रधानमन्त्री ओलीलाई पत्नी राधिकाले पुस्तक पढेर सुनाउन थालेकी छन् ।

चिकित्सकका अनुसार ओलीलाई राधिकाले आईसीयू कक्षमै उनले चाहेको पुस्तक अंश पढेर सुनाइरहेकी छन् । चिकित्सकका अनुसार ओली संगीतका साैखिन रहेछन् । सञ्चो अवस्थामा हुँदा बेलाबेला गिटार बजाउन रुचाउने ओली यतिबेला अस्पतालमा मोबाइलबाटै गीत पनि सुनिरहेका छन् ।

उपचारमा संलग्न एक चिकित्सकका अनुसार ओलीले राष्ट्रपतिसँग भेटेपछि गीत सुन्ने र पत्नी राधिकालाई पुस्तक र पत्रिका पढ्न लगाएर सुन्न थालेका हुन् ।

प्रधानमन्त्री ओलीको उपचारमा संलग्न चिकित्सकहरूले आज पत्रकार सम्मेलन गर्दै आगामी सोमबारसम्म आईसीयूमै राखेर उपचार गरिनेछ । चिकित्सकहरूले ओलीलाई हल्का ठोस खानेकुरा पनि दिन थालिएको छ ।

उनले आज (शुक्रबार) उसिनेको अण्डाको सेतो भाग सेवन गरेको उपचारमा संलग्न चिकित्सक तथा सेन्टरका वरिष्ठ मुटुराेग विशेषज्ञ डा. अरुण सायमीले बताए ।

प्रकाशित मिति: शुक्रबार, मंसिर १३, २०७६ १४:०४