युरोपा लिगमा म्यान्चेस्टर युनाइटेड र आर्सनल पराजित

A+ A A-

युरोपा लिग फुटबल अन्तर्गत बिहीबार राति भएका खेलमा इंग्लिस क्लब म्यानचेस्टर युनाइटेड र आर्सनल पराजित भएका छन् ।

म्यानचेस्टर युनाइटेड अवे खेलमा एफसी अस्तानासँग २–१ ले पराजित भएको हो । खेलको १० औं मिनेटमा नै जेसी लिंगार्डको गोलबाट युनाइटेडले अग्रता लिएको थियो । पहिलो हाफमा १–० को अग्रता बनाएको युनाइटेडले एक गोल खायो भने एक गोल आत्मघाती गर्न पुगेको थियो ।

अस्तानाका लागि ५५ औँ मिनेटमा शोम्कोले बराबरी गोल गरे । ६२ औँ मिनेटमा युनाइटेडका डी’शोन बर्नार्डले आत्मघाती गोल गरेपछि अस्ताना २–१ ले विजयी भयो ।

परातिज भए पनि पाँच खेलबाट १० अंक जोडेर युनाइटेड अन्तिम ३२ का लागि छनौट भइसकेको छ ।

बिहीबार राति नै भएको खेलमा पार्टिजान बेलग्राडेसँग २–२ को बराबरी खेलेको एजेड अल्क्मार ९ अंकसहित दोस्रो स्थानमा छ।
गएराति नै भएको अर्को खेलमा आर्सनल फ्र्यांकफर्टसँग २–१ ले पराजित भएको छ ।

घरेलु मैदानमै भएको खेलमा पहिलो हाफमा १–० को अग्रता लिएर पनि आर्सनल पराजित भएको हो । पहिलो हाफको इन्जुरी समयको पहिलो मिनेटमा पिएर एमरिकको गोलबाट आर्सनलले अग्रता लिएको थियो । तर दोस्रो हाफमा दाइची कामादाले फ्र्यांकफर्टका लागि दुई गोल गरे र जित दिलाए ।

पराजित भए पनि आर्सनल समूह एफ को शीर्ष स्थानमै छ । उसको पाँच खेलबाट १० अंक भएको छ भने दोस्रो स्थानमा पुगेको फ्र्यांकफर्टको ९ अंक छ ।

बिहीबार राति नै भएका खेलमा सेल्टिकले रेनेसलाई ३–१, एफ कै क्रास्नोडरले एफसी बासेललाई १–०, गेटाफेले ट्राब्जोन्स्पोरलाई १–०, रोमाले स्थानबुल बासाक्सेहिरलाई ३–०, बोरुसिया मोनचेङ्गग्लाड्बाचले आरजेड पेलेट्स डब्लुएसीलाई १–० तथा बेसिक्टासले स्लोभान ब्राटिस्लाभ तथा एफसी पोर्टोले योङ्ग ब्वाइजलाई समान २–१ ले पराजित गरेको छ ।