पोखरामा साग तयारीः ब्याडमिन्टन पूर्वाधार तयार, १ सय ५२ पदकमा प्रतिस्पर्धा

A+ A A-

१३औं दक्षिण एसियाली खेलकुद प्रतियोगिता (साग) का लागि निर्माण गरिएको ब्याडमिन्टन हलको काम अन्तिम चरणमा पुगेको छ । पोखरामा हुने ब्याडमिन्टन खेलका लागि निर्माण सुरू गरिएको पूर्वाधारको काम अन्तिम चरणमा पुगेको हो ।

‘ब्याडमिन्टनका लागि हल बनाउने काम सकिएको छ, अब म्याट बिछ्याउने र सरसफाइ गर्ने काम मात्र बाँकी छ,’ कास्की जिल्ला ब्याडमिन्टन संघका अध्यक्ष डम्बरसिहं गुरुङले भने ।

खेलाडीका लागि चाहिने सम्पूर्ण पूर्वाधार निर्माण भएको उनले जानकारी दिए । ब्याडमिन्टन हलमा अफिस, सूचना कक्ष, प्राविधिक कक्ष, स्टोर रुम, वार्म–अपलगायत ४ ओटा कोर्ट रहेको छ ।

प्रतियोगिताका लागि भने तीनवटा कोर्ट मात्र प्रयोग गरिनेछ । ब्याडमिन्टनका लागि म्याट भन्सारबाट पोखरा तर्फ हिँडिसकेको गुरुङले बताए । ब्याडमिन्टन हल निर्माणका लागि करिब साढे ४ करोड रुपैयाँ खर्च लागेको उनले जानकारी दिए ।

ब्याडमिन्टनका लागि आयोजक राष्ट्र नेपालको तर्फबाट २५ जना खेलाडी तथा प्रशिक्षक सहभागी हुनेछन्, जसमा पुरुष १० र महिला १० खेलाडी रहेका छन् । विदेशीसहित पाँच जना प्रशिक्षक रहनेछन् ।

भारतबाट भने ब्याडमिन्टनमा खेलाडीको मात्र सहभागिता रहनेछ । ब्याडमिन्टनका लागि भारतबाट १० पुरुष तथा १० महिला खेलाडीले सहभागिता जनाउनेछन् ।

त्यस्तै, पाकिस्तानबाट खेलाडी तथा प्रशिक्षक गरी १३ जनाको सहभागिता रहनेछ । जसमा ५ पुरुष, ५ महिला खेलाडी र ३ प्रशिक्षक रहनेछन् । बंगलादेशबाट भने १६ सदस्यीय टोली पोखरा आउनेछ । जसमा ६ पुरुष, ६ महिला खेलाडी तथा ४ प्रशिक्षकको सहभागिता रहनेछ ।

श्रीलंकाबाट भने १७ सदस्यीय ब्याडमिन्टन टोली पोखरा आउँदैछ । जसमा ७ पुरुष, ७ महिला खेलाडी तथा ३ जना प्रशिक्षक रहनेछन् । भुटानको तर्फबाट भने ७ सदस्यीय ब्याडमिन्टन टोली प्रतियोगितामा सहभागी हुँदैछ । जसमा ४ पुरुष, २ महिला खेलाडी तथा एक प्रशिक्षकले सहभागिता जनाउने भएका छन् ।

माल्दिभसबाट भने १७ सदस्यीय ब्याडमिन्टन टोलीले खेलमा सहभागिता जनाउनेछन् । जसमा ६ पुरुष, ६ महिला खेलाडी तथा ५ प्रशिक्षक सहभागी हुनेछन् ।

यस्तो छ खेल तालिका

पोखरामा हुने ब्याडमिन्टन १५ मंसिदेखि २० मंसिरसम्म संचालन हुनेछ । टिम इभेन्टतर्फ १५ मंसिरमा महिला तथा पुरुष क्वाटरफाइनलका खेल हुनेछन् । १६ मंसिरमा सेमिफाइनल तथा फाइनल खेल हुनेछन् ।

इन्भिभिजूअल इभेन्टतर्फ १७ मंसिरमा महिला एकल तथा डबल, पुरुष एकल तथा डब्बल र मिक्स डब्बलतर्फका प्रारम्भिक खेल हुनेछन् । १८ मंसिरमा महिला तथा पुरुष सिंगल र डब्बल्सको क्वार्टरफाइनल खेल हुनेछ । १९ गते सबै इभेन्टका सेमिफाइनल खेल हुनेछन् । २० गते सबै इभेन्टका फाइनल खेल हुने प्राविधिक समितिका संयोजक विद्याप्रसाद शर्माले जानकारी दिएका छन् ।

पोखरामा १ सय ५२ पदक

१५ मंसिरदेखि हुन लागेको १३औं दक्षिण एसियाली खेलकुद प्रतियोगिता (साग) मा प्रतिस्पर्धा हुने ८ खेलमा कुल १ सय ५२ वटा पदकका लागि खेलाडीहरू प्रतिस्पर्धा गर्दैछन् ।

पोखराबाहेक काठमाडौं र जनकपुर गरी संचालन हुने २८ खेलका लागि कुल १ हजार १ सय ११ पदकका लागि खेलाडीहरूले प्रतिस्पर्धा गर्नेछन् ।

१३औं सागको ८ खेलमध्ये आर्चरीमा ३०, ब्याडमिन्टनमा २८, महिला क्रिकेटमा ४, महिला फुटबलमा ३, ह्याण्डबलमा ६, ट्रायथलनमा १५, विच भलिबलमा ६, भारोत्तोलनमा ६० गरी कूल १ सय ५२ वटा पदकका लागि प्रतिस्पर्धा हुनेछ ।

त्यसैगरी, आर्चरीमा १० स्वर्ण, १० रजत र १० कास्य गरी ३० पदकका लागि प्रतिस्पर्धा हुनेछ । ब्याटमिन्टनमा ७ स्वर्ण, ७ रजत र १४ कास्य, महिला क्रिकेटमा १ स्वर्ण, १ रजत र २ कास्य, ह्याण्डबलमा २ स्वर्ण २ रजत र २ कास्य, ट्रायथलनमा ५ स्वर्ण ५ रजत र ५ कास्य, महिला विच भलिबलमा २ स्वर्ण २ रजत र २ कास्य पदकका लागि प्रतिस्पर्धा हुनेछ । भारत्तोलनमा समान २० स्वर्ण २० रजत र २० कास्य पदकमा प्रतिस्पर्धा हुनेछ ।

बहुप्रतीक्षित साग सुरू हुन पाँच दिन बाँकी रहँदा विभिन्न खेलका ८ सय २४ जना खेलाडी तथा अफिसियलहरू पोखरा आउँदैछन् । त्यसैगरी, करिब ४ सय ९१ जना प्राविधिक र अफिसियल पोखरा आउनेछन् ।

विभिन्न देशबाट आउने पाहुना स्वागत सत्कार तथा बसोबासका लागि सम्पूर्ण तयारी अन्तिम चरणमा पुगेको होटल व्यवस्थापन समितिका संयोजक सूर्य भुजेलले बताए ।

पोखरा रंगशालामा आयोजना हुने छवटा खेलको विभिन्न खेल पूर्वाधारहरूको निर्माण कार्य ९५ प्रतिशत सकिएको र बाँकी काम यसै साताभित्र पूरा गरिने राखेप सदस्य राजेशकुमार गुरुङले जानकारी दिए ।

प्रकाशित मिति: बिहीबार, मंसिर १२, २०७६ १८:१७