नेपालका छिमेकी विद्युत् खरिद र उत्पादनमा सहकार्य गर्न तयार

A+ A A-

नेपालमा उत्पादित विद्युत् खरिदका लागि छिमेकी मुलुकहरू इच्छुक देखिएका छन् । बिहीबार र शुक्रबार भएको पावर समिट २०१९ का विभिन्न शत्र तथा समापन समारोहमा छिमेकी मुलुकका मन्त्रीलगायतका विशिष्ट प्रतिनिधिले विद्युत् खरिदका लागि तयार रहेको तर नेपालले वातावरण बनाउनुपर्ने धारणा राखे ।

नेपालमा जलविदुत् आयोजनाहरूको निर्माण बढ्दै जाँदा विद्युत् खेर जाने भन्ने चिन्ता बढिरहेका बेला समारोहमा सहभागी भारत र बंगलादेशका प्रतिनिधिले आफूहरू विद्युत् किन्नका लागि तयार रहेको बताउँदै यसका व्यापारका साथै लगानीका लागि सहकार्य गर्ने प्रतिबद्धता जनाए ।

बंगलादेशका विद्युत्, ऊर्जा तथा खनिज राज्यमन्त्री नसरुल हमिदले नेपालमा निर्माण भइरहेको ९ सय मेगावाटको माथिल्लो कर्णाली जलविद्युत् आयोजनाको बिजुली किन्न बंगलादेश सहमत भएको बताए । उनले अरु विद्युत् लैजानका लागि पनि द्विपक्षीय रूपमा छलफल अघि बढाएको जानकारी दिए ।

भारतको ऊर्जा मन्त्रालयका प्रतिनिधिले पनि विद्युत् व्यापारका लागि तयार रहेको प्रतिबद्धता जनाए । स्वतन्त्र ऊर्जा उत्पादकहरूको संस्था (इप्पान)को आयोजनामा भएको सम्मेलनमा उनीहरूले यसका लागि नेपालले वातवरण बनाउनुपर्ने धारणा राखे ।

तर, विद्यमान विद्युत् ऐनमा हालसम्म विद्युत् व्यापारबारे उल्लेख छैन । नयाँ विद्युत् ऐन विगत ११ वर्षदेखि मस्यौदाकै रूपमा छ । सम्मेलन पनि विद्युत् व्यापारका लागि क्षेत्रीय सहकार्य तथा प्रसारण सञ्जाल निर्माण गर्न मुख्य रूपमा राजनीतिक इच्छाशक्ति आवश्यक रहेको सन्देशसहित सकिएको छ ।

एसियाली देशहरूमा विद्युत् ऊर्जा स्रोतमा विविधता रहेको तथा माग र आपूर्तिबीच असन्तुलन देखिएको उल्लेख गर्दै पर्याप्त ऊर्जा उत्पादन । बजारको सम्भावनालाई अवसरको रूपमा रूपान्तरण गर्नुपर्ने र यसका लागि दह्रो राजनीतिक इच्छाशक्तिको अभाव रहेको ठहर सम्मेलनले गरेको छ ।

प्रकाशित मिति: आइतबार, मंसिर ८, २०७६ ०७:०९