पार्टीमा घनश्याम, सरकारमा प्रदीप वरिष्ठ

A+ A A-

प्रधानमन्त्री केपी शर्मा ओलीले पुनर्गठन गरेको मन्त्रिपरिषदमा नेकपाका नेता घनश्याम भुसाललाई नवौं वरीयतामा राखेको छ ।तत्कालीन एमालेका उपमहासचिव भुसाललाई उनीभन्दा जुनियर एमालेबाट सचिवमा निर्वाचित प्रदीप ज्ञवालीभन्दा तल राखिएको छ । मन्त्रिपरिषद्को वरीयताको पाँचौं नम्बरमा ज्ञवाली छन् ।

नेकपाको कुनै पनि पार्टी कमिटीमा नरहेका सूर्य चुनाव चिन्ह लिएर २०७४ सालको संघीय निर्वाचनमा सांसद जितेका हृदयेश त्रिपाठीलाई मन्त्रिपरिषद्को छैठौं वरीयतामा राखेर संघीय मामिला तथा सामान्य प्रशासन मन्त्रालयको जिम्मेवारी दिइएको छ ।

बिहीबार मन्त्रिपरिषद्का सदस्यको हेरफेर गर्दा नयाँ मन्त्रीको रूपमा आएका लेखराज भट्टलाई वरीयताको ११औं नम्बरमा राखिएको छ । तर, तत्कालीन नेकपा एमालेका सचिव योगेश भट्टराईलाई भने वरीयताको १२औं नम्बरमा राखिएको छ । भट्टराईका समकालीन प्रदीप ज्ञवाली भने मर्यादाको पाँचौंमा छन् ।

२०७४ को संघीय निर्वाचनको मुखमा तत्कालीन लोकतान्त्रिक फोरमको वरिष्ठ उपाध्यक्ष छोडेर तत्कालीन माओवादीमा प्रवेश गरेका रामेश्वर राय यादव २५ सदस्यीय मन्त्रिपरिषद्को १४औं वरीयतामा छन् । २०५१ सालको प्रतिनिधिसभाको कार्यकालमा सद्भावना पार्टीबाट विद्रोह गरेका हृदयेश त्रिपाठी र राय मन्त्री भएका थिए ।

मन्त्रिपरिषदमा आएका नयाँ अनुहार वसन्तकुमार नेम्वाङ र पार्वत गुरुङलाई मन्त्री बीना मगर, गोकुल बाँस्कोटा, पद्मा अर्यालभन्दा पछि अर्थात् वरीयताको २१औं र २२ औं नम्बरमा राखिएको छ ।

यसअघि मन्त्रिपरिषदमा मन्त्री पद्मा अर्यालभन्दा वरीयतामा अघि रहेकी मन्त्री बीना मगर यसपटक अर्यालभन्दा पछि छिन् । पहिले बीना २१ र पद्मा २२औं मर्यादाक्रममा थिए । यसपटक भने पद्मा १९औं र बीना २०औं नम्बरमा परेका छन् ।

मर्यादाक्रममा २५औं अर्थात् सबैभन्दा पुच्छरमा शहरी विकासमन्त्री रामवीर मानन्धरलाई ल्याइएको छ । मानन्धरको मन्त्रालयमा समाजवादीका सांसद इस्तियाक राई मन्त्री छन् । त्यस्तै यसअघि स्वाथ्यमन्त्री भएका उपप्रधानमन्त्री उपेन्द्र यादवलाई कानुन मन्त्रालयको जिम्मेवारी दिइएको छ ।

प्रदेश १ बाट ६ जना कर्णालीबाट एक मात्र

बिहीबार पुनर्गठन भएको मन्त्रिपरिषदमा प्रदेश एकबाट मात्र छ जना मन्त्री भएका छन् भने कर्णाली प्रदेशबाट शक्ति बस्नेत मात्र मन्त्री बनेका छन् ।

प्रधानमन्त्री ओली, स्वास्थ्यमन्त्री भानुभक्त ढकाल, पर्यटन मन्त्री योगेश भट्टराई, अर्थमन्त्री डा. युवराज खतिवडा, भौतिक पूर्वाधार मन्त्री वसन्त नेम्वाङ र उद्योग वाणिज्य तथा आपूर्ति राज्यमन्त्री मोतीलाल दुगड प्रदेश १ बाट निर्वाचित सांसद हुन् ।

त्यस्तै, प्रदेश २ बाट उपप्रधानमन्त्री उपेन्द्र यादव, शिक्षामन्त्री गिरिराजमणि पोखरेल, श्रम मन्त्री रामेश्वर राय यादव मन्त्री भएका छन् । प्रदेश ३ बाट पाँच जना, गण्डकी प्रदेशबाट दुई जना, प्रदेश ५ मा पाँच जना र सुदूरपश्चिम प्रदेशबाट तीन जना मन्त्री भएका छन् ।

८ प्रतिशत महिला

प्रधानमन्त्री ओली नेतृत्वको सरकारमा ८ प्रतिशत महिलाको मात्र प्रतिनिधित्व भएको छ । बिहीबार मन्त्रिपरिषद् पुनर्गठन गर्दा एक जना पनि महिला सांसदलाई समावेश गरिएको छैन ।

भूमि व्यवस्था मन्त्री पद्मा अर्याल र खानेपानी मन्त्री बीना मगर मात्र महिला मन्त्रिपरिषद् सदस्य हुन् । यसअघि थममाया थापा मन्त्री र रामकुमार चौधरी राज्यमन्त्री थिए । उनीहरूलाई पनि मन्त्रिपरिषदबाट हटाइएपछि मन्त्रिपरिषदमा ८ प्रतिशत मात्र महिलाको प्रतिनिधित्व छ ।

संविधानले राज्यका हरेक निकायमा ३३ प्रतिशत महिला प्रतिनिधित्व सुनिश्चित गरेको छ ।

प्रकाशित मिति: बिहीबार, मंसिर ५, २०७६ १४:०२