ट्रम्पको निर्देशनमा युक्रेनमाथि दबाब दिएको अमेरिकी कूटनीतिज्ञको बयान

A+ A A-

अमेरिकी राष्ट्रपति डोनाल्ड ट्रम्पमाथिको महाअभियोगको छानविनका क्रममा एक पछि अर्को बयानमा युक्रेनमाथि दबाब दिएको खुलासा हुने क्रम जारी छ । संसदीय समितिले गरिरहेको सार्वजनिक सुनुवाईका क्रममा ट्रम्पलाई संकटमा पार्ने बयान आएका हुन् ।

गएराति भएको चौथो सार्वजनिक सुनुवाईमा युरोपियन युनियनका लागि अमेरिकी राजदूत गोर्डन सन्डल्याण्ड उपस्थित भएका थिए । होटल ब्यवसायी तथा ट्रम्पको चुनावी अभियानमा समेत सहयोग गरेका सन्डल्याण्डले ट्रम्पको निर्देशनमा युक्रेनमाथि दबाब दिइएको बयान दिएका छन् ।

आफूलाई ‘लाइफ लङ्ग’ रिपब्लिकन बताउने सन्डल्याण्डलाई ट्रम्पले उच्च कूटनीतिक जिम्मेवारी प्रदान गरेका थिए । सुनुवाईको क्रममा राजदूत सन्डल्याण्डले राष्ट्रपति ट्रम्पले डेमोक्रेटिक प्रतिस्पर्धी जोए बिडेनमाथि अनुसन्धान गर्न युक्रेनलाई दबाब दिएको र आफूले राष्ट्रपतिको आदेशको पालना मात्रै गरेको बताएका छन् ।

आफूलाई ट्रम्पका व्यक्तिगत वकिल रुडी जुलियानीबाट निर्देशन आएको समेत सन्डल्यान्डले सुनुवाईका क्रममा उल्लेख गरेका छन् ।

राष्ट्रपति ट्रम्पमाथि आगामी राष्ट्रतीय निर्वाचनमा प्रतिद्वन्द्वी हुने सम्भावना रहेका बिडेनमाथि भ्रष्टाचार आरोपमा छानविनका लागि युक्रेनलाई दबाब दिन सैन्य सहायता रोकेको आरोप लागेको छ । ट्रम्पले आफूमाथि लागेको आरोप अस्वीकार गर्दै आएपनि एक पछि अर्को बयान ट्रम्पको विपक्षमा आएका हुन् ।
अमेरिकामा राजनीतिक स्वार्थका लागि विदेशी शक्तिको सहयोग खोज्नुलाई गैरकानुनी मानिन्छ ।

ट्रम्पले युक्रेनका राष्ट्रपति भोलोदिमिर जेलेन्स्कीलाई पूर्व अमेरिकी उपराष्ट्रपति बिडेन र उनका छोरा हन्टरमाथि भ्रष्टाचार आरोपमा छानबिन सुरु गर्न आग्रह गरेका थिए । त्यसकै लागि ट्रम्पले युक्रेनलाई दिइँदै आएको सैन्य सहयोग रोकेको र यसले ट्रम्पलाई व्यक्तिगत रुपमा राजनीतिक लाभ हुने आरोप छ ।

सुनुवाईको क्रममा इयुका लागि अमेरिकी राजदूत सन्डल्याण्डले ट्रम्पका वकिल जुलियानले जेलेन्स्कीलाई बिडेन र हन्टर माथि भ्रष्टाचार अभियोगमा छानबिन सुरु गर्ने घोषणा सार्वजनिक रुपमा गर्न बारम्बार आग्रह गरेको बताएका छन् ।

जुलियानीले ग्यास कम्पनी बरिज्माको नाम स्पष्ट रुपमा लिएको सन्डल्याण्डले बताएका छन् । युक्रेनी ग्यास कम्पनी बरिज्मामा जोए बिडेनका छोरा हन्टर बिडेन बोर्ड सदस्य थिए ।

प्रकाशित मिति: बिहीबार, मंसिर ५, २०७६ ०८:५३