कम्बल बाँडेपछि वडाध्यक्षविरुद्ध उजुरी

गैरसरकारी संस्थाको सहयोगमा स्थानीयलाई कम्बल हस्तान्तरण गर्दै पोखरा महानगरपालिका–१५ वडाध्यक्ष प्रकाश पौडेल । तस्बिरः नरहरि पौड्याल

A+ A A-

आशन्न उप–निर्वाचनको मिति नजिकिँदै गर्दा निर्वाचनलाई प्रभावित तुल्याउन नेपाल कम्युनिष्ट पार्टी (नेकपा) ले आचारसंहिता विपरीत कम्बल बाँडेको भन्दै कांग्रेसले निर्वाचन आयोगमा उजुरी गरेको छ । कास्की कांग्रेसले निर्वाचन आचारसंहिता लागू भएको अवस्थामा निर्वाचन प्रभावित पार्न पोखरा महानगरपालिका–१५ का वडाध्यक्ष प्रकाश पौडेलले पट्नेरीको बस्तीमा १२ जनालाई कम्बल बितरण गरेको आरोपसहित उजुरी गरेको हो ।

कांग्रेस जिल्ला समितिले प्रेस विज्ञप्ती जारी गर्दै पट्नेरीका १२ जनालाई वडाध्यक्ष पौडेलले कम्बल वितरण गर्दै आचारसंहिता मिचेको दाबी गरेको छ । वडा नम्बर १५ पनि उप–निर्वाचन हुने क्षेत्रभित्रै पर्छ । वडा अध्यक्ष पौडेल नेकपाबाट निर्वाचित वडाध्यक्ष हुन् । कास्की कांग्रेस सभापति कृष्ण केसीद्वारा हस्ताक्षरीत विज्ञप्तीमा पट्नेरी बस्तीका स्थानीयलाई कम्बल वितरण गरेकोप्रति आपत्ति जनाइएको छ ।

पार्टी सभापति केसीले निर्वाचन क्षेत्रभित्र मतदातालाई प्रलोभनमा पार्ने काम वडा कार्यालयबाट भएको भन्दै वडाध्यक्षलगायत कम्बल वितरणमा संलग्नलाई कारबाहीको माग गर्दै उजुरी दिएको बताए । विज्ञप्तीमा भनिएको छ, ‘निर्वाचनको मुखमा निर्वाचन क्षेत्रका मतदातालाई प्रलोभनमा पार्ने मनसायले कम्बल बाँड्ने कार्य आचारसंहिता विपरीत छ । तत्काल यस्ता कार्य बन्द गराउन तथा संलग्नलाई कारबाहीको माग गर्दछौं ।’

वडाध्यक्ष प्रकाश पौडेलले भने आफू अतिथिको रूपमा मात्र सहभागी भएको जनाएका छन् । त्यो हाम्रो कुनै कार्यक्रम होइन, ‘त्यो कार्यक्रमको आयोजना थ्री एन्जलको कार्यक्रम हो, म जनप्रतिनिधिको हैसियतले सहभागी मात्र भएको हुँ’, उनले भने । आचारसंहित उल्लंघनको उजुरी परेको निर्वाचन आयोग कास्कीका निर्वाचन अधिकृत महेन्द्रराज सुवेदीले बताए । प्रलोभनमा पार्नेगरी कम्बल वितरण भएको पाइएमा निर्वाचन कार्यालयले कारबाही गर्ने उनको भनाइ छ ।

प्रकाशित मिति: बुधबार, मंसिर ४, २०७६ ०९:००