उत्कृष्ट करदाताको सूचीबाट बाहिरिँदै टेलिकम कम्पनीहरू

A+ A A-

पछिल्लो एक दशकयता आक्रामक सेवा विस्तार गर्दै नाफा कमाएका दूरसञ्चार सेवा प्रदायक कम्पनीहरू उत्कृष्ट करदाताको सूचीबाट भने बर्सेनि टाढिँदै गएका छन् । आर्थिक वर्ष २०६७\६८ देखि उत्कृष्ट करदातामा नेपाल टेलिकम र उनसेलको नाम आउने गरेकोमा पछिल्लो दुई वर्षयता यी दुवै कम्पनी सूचीबाट बाहिरिएका छन् । आर्थिक वर्ष २०७४\७५ र २०७५\७६ को कारोबारमा सेवा क्षेत्रका यी दुई कम्पनीलाई पछि पार्दै उत्पादकमुलक क्षेत्र अगाडि आएको हो ।

आर्थिक वर्ष २०६७\६८, ०६८\६९ र ०६९\७० को कारोबारबाट नेपाल टेलिकम उत्कृष्ट करदाता तथा ०७०\७१, ०७१\७२ र ०७२\७३ मा मूल्य अभिबृद्धि करतर्फ अग्रस्थानमा थियो । पछिल्लो दुई वर्षको कारोबार भने सरकारले घोषणा गर्ने १५ उत्कृष्ट करदातामध्ये कुनै पनि शीर्षकमा अटाउन सकेको छेन । कम्पनीले आर्थिक वर्ष २०७५\७६ मा सरकारको ट्रेजरीमा ३२ अर्ब योगदान गरेको थियो ।

जसमा ७ अर्ब लाभांशबाट भए पनि बाँकी २५ अर्ब रुपैयाँ भने विभिन्न शीर्षकमा कर तिरेको छ । कम्पनीका प्रबन्ध निर्देशक डिल्लीराम अधिकारीले गत आर्थिक वर्षमा लाभांशबाहेक २५ अर्ब १७ करोड ६ लाख र आर्थिक वर्ष २०७४\७५ मा २१ अर्ब ६० करोड ६८ लाख रुयैयाँ तिरेको बताए । यस्तै, २०६९\७० र ०७०\७१ मा उत्कृष्ट करदाताको सम्मान एनसेलले पाएको थियो ।

ऐनसेलको माउ कम्पनी आजियटाले सार्वजनिक गरेको प्रतिवेदन अनुसार आव २०७१\७२ देखि २०७६ बैशाखसम्म सरकारलाई १२५.६८ अर्ब रुपैयाँ सरकारलाई विभिन्न शीर्षकमा कर तिरेको दाबी गरेको छ । नेपाल दूरसञ्चार प्राधिकरणका प्रवक्ता मीनप्रसाद अर्याल दूरसञ्चार सेवामा सरकारले तोकेकै बराबरको कर लाग्ने र सोहस् अनुसारको प्राधिकरणले नियमन गर्ने बताए । उनले पछिल्ला वर्षमा दूरसञ्चार सेवा सस्तो हुँदै जानुले पनि त्यसको असर करमा देखिएको हुनसक्ने बताए ।

अहिले टेलिकम क्षेत्रमा उच्च प्रतिस्पर्धामा टेलिकम र ऐनसेल छन् । अन्य लाइसेन्स होल्ड गरेका यूटीएल र सिजी टेलिकम सुस्त गतिमा छन् भने स्मार्ट हेलो नेपालको लाइसेन्स खारेज भएकोमा पुनरावलोकनका लागि गएको छ ।