ताप्लेजुङमा हेलिकोप्टर दुर्घटना, मन्त्री अधिकारीसहित ७ जनाको मृत्यु

दृर्घटनामा ज्यान गुमाउने व्यक्तिहरु ।

A+ A A-

आजको राजधानी दैनिकले ताप्लेजुङमा भएको हेलिकप्टर दुर्घटनाको खवरलाई प्रमुख समाचार बनाएको छ । ताप्लेजुङमा बुधबार भएको एयर डाइनेस्टीको हेलिकोप्टर दुर्घटनामा संस्कृति, पर्यटन तथा नागरिक उड्ययनमन्त्री रवीन्द्र अधिकारीसहित सात जनाको मृत्यु भएको छ । दुर्घटनामा यती एयरलायन्सका अध्यक्ष आङछिरिङ शेर्पा, प्रधानमन्त्री तथा मन्त्रिपरिषद् कार्यालयका उपसचिव युवराज दाहाल, नेपाल नागरिक उड्डयन प्राधिकरणका उपमहानिर्देशक वीरेन्द्रप्रसाद श्रेष्ठ, नागरिक उड्डयन प्राधिकरणका इन्जिनियर धु्रवदास भोछिभया, हेलिकोप्टर चालक प्रभाकर केसी र मन्त्री अधिकारीका पीएसओ नेपाली सेनाका जमदार अर्जुन घिमिरेको पनि मृत्यु भएको छ ।

तेह्रथुमको चुहानडाँडा विमानस्थल निरीक्षणपछि मन्त्री अधिकारीसहितको टोली पाथीभरा दर्शनका लागि गएको थियो । बुधबार दिउँसो १ बजे पाथीभरा मन्दिरबाट फर्कने क्रममा सो हेलिकोप्टर दुर्घटनामा परेको हो ।
ताप्लेजुङको लिङखिम र फुरुम्बु गाउँपालिकाको बीच भागमा अवस्थित सिस्ने खोलाको भीरमा सो हेलिकोप्टर दुर्घटनामा परेको होे । खराब मौसमका कारण हेलिकोप्टर दुर्घटना भएको प्रारम्भिकबाट खुलेको छ ।

मन्त्री अधिकारीसहितको टोली दुर्घटनामा पर्नुअघि तेह्रथुमको चुहानडाँडास्थित निर्माणाधीन विमानस्थल अवलोकनपछि ताप्लेजुङतर्फ लागेको थियो । दुर्घटनाग्रस्त हेलिकोप्टर टुक्राटुक्रा भएर आगो लागेर जलेको अवस्थामा भेटिएको थियो । खराब मौसमका कारण उद्धार कार्यमा निकै समय लागेको थियो । दुर्घटनामा मृत्यु भएकाको शव बिहीबार बिहान मात्र काठमाडौं ल्याइने भएको छ । मृतक सबैको शव बुधबार रातिसम्म ताप्लेजुङको सुकेटारमा बोकेर ल्याइने र बिहीबार बिहान हेलिकोप्टरबाट काठमाडौं ल्याइने तयारी गरिएको गृह मन्त्रालयका प्रवक्ता रामकृष्ण सुवेदीले बताए ।

बहालवाला मन्त्री हवाई दुर्घटनामा परी मारिएको यो दोस्रो घटना हो । यसअघि ताप्लेजुङकै घुन्सामा पनि बहालवाला मन्त्रीको हवाई दुर्घटनामा मृत्यु भएको थियो । यो दुर्घटनालाई दोस्रो घुन्सा घटनाका रूपमा लिइएको छ । यसअघि सन् २००६ मा ताप्लेजुङकै घुन्सामा भएको विमान दुर्घटनामा तत्कालीन वन राज्यमन्त्री गोपाल राई र भूगर्भविद् डा। हर्क गुरुङसहित २३ जनाको ज्यान गएको थियो ।